【少少重甜】《用甜筒打喪屍！！》（完）: 第18回 - 逃

警衛毫無預警向我撲來！！ 

幸好我一直有唔錯既反射神經，於是我一腳前蹬，向警衛既腹部前錫！！警衛立即被我踢開幾步距離。 

哈，睇來武術底子終於有返多少作用。 

我向前踏出兩步，再拉近距離，準備趁住對方被錫到退後而混亂幾秒既硬直時間直攻佢腳部關節。 

可惜我估計錯誤……佢無所謂既混亂時間。 



或者話佢從一開始已經沒有混亂的資格。 

「o拍！」警衛既膝關節被我右腳側踢而踢斷，發出嘔心既斷骨聲。 

可惜，我隻腳正正成為警衛既獵物！佢竟然將上身完全扭曲，血盆大口向我小腿進迫！ 

剎那間我本能地腎上腺素直升，立即縮開右腿。不過我知道我既反應速度係唔會避得切。 

但我總是幸運的。 



一大件超重的行李一下子壓落警衛頭部，正好阻住佢牙齒同我既小腿！我望向行李來的方向，原來是變態男救左我！ 

「走！！」變態男話。 

我即刻後退同警衛拉開距離。拖住詩音想即刻就調頭走。 

「點聯絡你！！」我同變態男講。 

「我叫做Kelvin！！」變態男話。香港人總喜歡改洋名。 



然後我地就被人群迫出機場。 

即使我地想走，我都根本搵唔到用咩工具走好。最方便一定係地鐵，不過地鐵站入口已經塞滿哂恐慌既人！我個心仍然跳得好快，不斷咁問自已而家其實係咪發緊夢？我明明頭先係好無緊張感架喎！   

我地已經無時間再諗，因為又多隻喪屍衝左出黎。呢個時候有警察包圍住佢，大大聲對住隻喪屍類似叫佢停呀我就快開槍之類既日文。呢個場面唔陌生，因為香港d慈母都係咁對示威者架啦。 

日本警察我覺得唔係話廢，不過硬係無乜霸氣，男警都溫柔d。再加上佢無香港慈母果種有你無你打勁左先果種覺悟，就令到佢地犯下最嚴重既失誤。因為...當你當一隻喪屍係人類既時候你就已經開始錯了。 

「呀！！！」一名警察大叫，因為佢已經被一隻身中多槍既喪屍咬中。 

我有一刻希望佢有抗體，或者好似Leon咁，死左都唔會變喪屍。不過呢... 

「唉..」我另轉頭唔想睇到友善既日本警察又開槍射爆自己同僚個腦。 

我地已經迫在眉睫，的士已經比人上哂！ 



「uber… call uber！！」虧佬話。 

詩音即刻羅起佢呢部上到網既電話，唔洗一分鐘已經有電話打比詩音。詩音同日文同電話入面既男人溝通。再一分鐘，已經有架benz係我地面前停下。真係不得不比十個珍比uber。 

「快走！」詩音大叫。