【自殺之後，我遇見死神小姐】救贖七個自殺者的故事: Case 2 與病魔爭鬥的少年—(6)

晚上，一間餐廳。

「點呀？死神小姐，唔好喺度咁無聊玩餐具。」我一邊咀嚼，一邊說。

『啊哈！我係嚟睇下你點啫！』死神小姐單手托住頭，另一隻手拎住支叉喺度轉。

「妳咁樣玩，周圍啲人只會見到有把叉同有把刀喺檯到自己轉，佢哋會以為有鬼。」以我常理推測，周圍嘅人應該見唔到死神小姐先啱。

『我可以任意調校自己嘅透明度，我鍾意見到就見到，見唔到就見唔到。』佢咁講，我諗周圍嘅人應該見到死神小姐。





我拎起檯頭上嘅熱好立克，慢慢品嘗。我發覺自己係好鍾意飲好立克，當侍應問我飲咩時，我毫不猶豫叫咗好立克，好立克應該係我生前鍾意飲嘅嘢。

「妳嚟搵我做咩？咁快要到下個目標喇？」

『係呀！你而家先成功幫咗第一個人達成心願咋！之後重有六個人呀！』死神小姐舉起「六」嘅手勢，『天使先生。』

「乜妳睇到我哋發生嘅事？」我激動到將口入面嘅好立克噴出來，死神小姐被我噴到滿臉都係。

死神小姐顫抖住，強行歡笑拎起紙巾抹臉。





「Sor！我無心……」

我懷住內疚之意跟死神小姐道歉，但望住眼前情景，令我心中不禁油然而生，死神小姐滿臉白色液體，有啲沿住輪廓慢慢流落嚟，由於死神小姐係著黑色低胸連身裙，所以好立克就直接滴喺佢嘅肌膚上。

「我真係無心……」

死神小姐粒聲唔出咁抹臉，而我感覺到我點著咗炸彈嘅引線。

「呃……係咪要話畀我知第二個人喺邊？」





『你食屎啦！』

哐啷！檯上碗碟發出震動聲，死神小姐將支叉插咗落檯。

『我個妝化咗好耐㗎！依家被你噴一噴咩都無啦！』

死神小姐狠狠地睥住我，但其實而家佢個樣都好靚，我實在睇唔出佢化妝同無化有咩分別。都好，至少好過化妝前後判若二人。

「我唔係特登噴妳，唔好嬲喇！」我安慰道。

『哼！』

雖然有啲內疚感，不過心入邊係幾爽，平時寸哄哄，而家被我噴到一臉都係，好有征服感。

『第二個目標嘅地點，我聽日會講畀你聽，你聽日先搵喇，今日你就休息吓。』死神小姐少有地露出和善嘅笑容。





「我又唔會有其他嘢做，而家搵都無所謂喇。」

『呢段時間唔係俾你做其他嘢，而係俾你重整下心情。你心裡面應該有好多諗法，我想你自己消化一下，同埋唔好影響搵下個目標時嘅情緒。』

「好多諗法……」腦海浮現起Cathy嘅笑臉，「的確係。」

『如果你抱持依家嘅心態，係幫唔到其他嘅自殺者。』死神小姐突然認真起來，『並唔係嗰個自殺者都好似Cathy，單純地賜予希望就能夠幫佢哋達成心願。其他自殺者嘅心願會真係確確實實要做啲實在嘅事，當中有啲心願將會好難……甚至幾乎無可能去達成。你抱持住依家呢種半桶水嘅心態一定幫唔到佢哋。』

「無可能達成心願……？」

『係，你遲啲就會明白，並唔係單純畀希望去達成佢哋心願，更多更多，佢哋嘅心願同塵世有關。你將要做嘅係實實在在嘅嘢去為佢哋達成心願，而唔係亂咁畀假希望人。』死神小姐指嘅係我同Cathy嘅事。

「我無畀假希望佢，所有言語都係出自我嘅真心。」





『真心還真心，做唔做到就另一回事。你已經死咗，無論你之後向佢哋承諾咩都好，你都無可能做得到。』

「但係，但係至少我可以開解到佢哋嘅心情。」

『做唔到嘅承諾就等同謊言，如果你係真心想承諾，就應該喺未死嘅時候就咁做，而唔係等到死咗之後先識咁做。』

「如果我生前識識Cathy，我一定會幫佢！唔會俾佢咁難過，咁絕望。」我敢斷定嘅原因，係因為假如我同Cathy係識嘅話，佢第一眼就認得我。

死神小姐沉思幾秒後，『係呀……咁你就即管繼續去幫埋剩低嗰六個人喇，用你自己嘅辦法。』

死神小姐飄起來，『聽日我會再搵你，我走先，拜拜！』

一息間，死神小姐已經喺我眼前消失。

死神小姐嘅話語，我當然明白。嚟緊我將面對嘅係更困難嘅挑戰，單純對自殺者唸經並唔足夠，不過就算幫佢哋完成心願都好，我都想用我嘅言語去解開佢哋心中嘅枷鎖……





或者咁樣可以令我思考到人生嘅意義，以此去面對我自殺嘅真相。

我食完飯，埋咗單之後，我發現咗一個重要嘅問題。

我今晚去邊度睏呢？