【自殺之後，我遇見死神小姐】救贖七個自殺者的故事: Case 1 憧憬希望的絕望少女—(5)
返到商場。
喺鏡入邊，只會見到我伸出手嘅怪異姿勢，彷彿拖緊一個FF出嚟嘅女友，比毒撚更毒。旁人用住疑惑嘅眼光望住我，喺佢哋眼中，我係一個行為怪異嘅人，伸出手扮拖緊手，又同空氣講嘢，就好似痴線佬一樣。
但只有我先知道，Cathy係真正嘅存在。
Cathy喺我後方，拖住我嘅手，低住頭行。我轉過頭，只見佢獨自傻笑，又有種愁眉苦臉嘅感覺，但一見我盯住佢，就即刻回過神。
「妳重有無地方想去？」我問。
「嗯……我想去海旁到行下，睇吓日落。」
「日落……」原來而家已經開始天黑。
我拖住佢嘅手，離開商場，行去附近海旁。
我同Cathy之間嘅約會對Cathy嚟講究竟代表咩，佢最後嘅心願係咩？
我睇唔透。
海旁附近比較少人，鹹鹹嘅海風吹過嚟，淡藍色嘅天空掛起由金漸紅嘅霞彩，金黃色的夕陽散發耀明嘅光芒，可惜混濁嘅海水映射唔到咁靚嘅景象。
「日落好靚呀！我好耐未試過睇日落喇！」Cathy感嘆地說。
「係，我都係第一次睇咁靚嘅日落。」
「天使先生無睇過日落㗎？」Cathy驚訝地問。
「唔知，或者有，但我唔記得咗。」
我同Cathy挨住岸邊圍欄，觀賞如此美景，任由海水嘅鹹味道飄入鼻中，任由海風輕輕打喺臉上。
「如果，可以既話，我想日日都睇到咁靚嘅日落。」Cathy展露平淡嘅笑容。
既然係咁，點解妳要自殺，放棄妳嘅生命？
「狗狗！」Cathy伸出雙手，作狀抱狗狗公仔，我亦將狗狗放喺圍欄上面。
「狗狗，我哋一齊睇日落呀！」佢仍然好歡容咁笑。
「媽媽雖然抱唔到你，但你要生生性性呀！」Cathy作狀輕撫狗狗。
「以後爸爸會照顧你，你要好好咁聽爸爸話呀！」
點解妳重可以咁開心咗咁笑？
「記住呀狗狗！爸爸，你都……」Cathy轉過頭，但無再繼續講落去，而係愕然咁望住我。
「天使先生……你點解要喊……？」
原來眼淚不知不覺間滴咗落嚟。
「天使先生，我係咪有咩做錯咗，搞到你唔開心呀……？」
我將臉上淚痕抹去。
「點解妳要勉強自己？」
「咩勉強自己？」Cathy唔明白咁問。
「點解妳要強行撐起笑容，表現到一副好歡樂，好有希望嘅樣？如果妳係真心想笑，點解妳眼神中又蘊含住悲傷嘅感覺？」
Cathy聽完我嘅話，收起笑容，沉默地企喺我面前。
「既然係自殺，點解又要一副依依不捨，留戀世間嘅樣？既然係自殺，唔係應該對世間完全絕望，毫無留戀咩？」
至今Cathy嘅行為我完全不能理解。
Cathy視線從我雙眼移開，轉頭望向海邊。
「天使先生，你覺得點解人會自殺……？」
點解人會自殺？即使作為自殺者嘅我，但喺失去記憶情況下，根本體會唔到嗰方面嘅感覺。
但係短短幾個鐘內，我思考過呢方面嘅事——人點解要自殺？
因為壓力太大，因為事業失敗，因為失戀，因為生活走頭無路，因為唔死嘅話會有更悲慘嘅下場……呢啲都係諸如此類嘅理由，驅使一個人自殺。但係，人對生無戀，對死亦會懼，自殺並唔係一件簡單嘅事，要自殺必須先克服死亡。
「因為絕望，當對世間完全無希望，失去生存意義，生存所帶嚟嘅空虛感令自己連死都唔驚嗰陣，就會決定自殺。」
呢個係我嘅答案。
Cathy聽完後，展露微笑。
「我……喺呢個世界上有好多嘢想做，想好似啱啱咁去打機睇戲，想偶爾觀賞下周圍美麗嘅風景，想好似細路女咁同公仔玩下煮飯仔……我並無對世界感到絕望，反而反而我有好多嘢想做，我嘅笑容並唔係強行歡笑，而係發自內心嘅笑容，可以嘅話，我都想繼續做自己鍾意做嘅事。」
「既然係咁，點解要自殺？」
「自殺，唔係因為我對世界絕望，」
「而係世界無畀過希望我。」
我一時間未明白到Cathy話中含義，但下一秒，Cathy轉身面對住我，將冷衫除咗，再將校服嘅鈕扣解開。
「妳做咩……」我即刻叫停佢。
當佢除咗佢件校服時，我感到驚呆，原因唔係因為佢突然喺我面前除衫，
而係Cathy身上滿佈一條又一條嘅傷疤。
「呢啲係……！」
「我被繼父虐打嘅痕跡。」
我對眼前嘅景象感到十分震驚。
「我係喺單親家庭出世，淨係得媽媽無爸爸，阿媽以前出去玩，意外地有咗我，連經手人係邊個都唔知。後來阿媽帶咗個男人返嚟做我繼父，我一開始好開心，終於有個阿爸，但後尾先發現佢係個人渣。當佢唔開心或者飲醉酒嗰陣會搵我出氣，當我係出氣桶，打我，踢我。有一日，母親唔喺屋企時，佢走過嚟除咗我啲衫……侵犯咗我！」
Cathy拉起佢條裙，喺戲院時我唔小心昅到Cathy裙底，但睇唔清係咩痕跡，而依家我睇得一清二楚，喺大腿內側，係一道又一道既煙頭痕。
「阿媽一直坐視不理，任由我被個人渣搞……就咁樣一直到升中學，屋企無錢，佢哋為咗錢，竟然迫我去做援交幫佢哋賺錢。我不斷咁被唔同嘅陌生男人搞，一路被人搞，一路賺錢畀我嘅人渣父母！試過被人好粗暴咁對待，被人搞完之後覺得自己好污漕……我每一日都受盡呢啲折磨，好辛苦，好絕望，曾經諗過死咗去算，脫離呢個地獄。但我腦海中仍抱住僅餘一絲希望，堅信會好似童話白馬王子救白雪公主咁，我都會有個白馬王子嚟救我，將我從地獄拉出嚟，攬住我，同我講『妳已經無事喇』。」
Cathy開始哽咽。
「直到一年前，我識咗個男仔，佢對我好好，好錫我，呢次係我第一次感受到愛。佢令我感受到未曾感受過嘅愛，令我覺得佢可以將我從痛苦不堪嘅地獄拯救出嚟，我終於唔受再受苦。但原來，原來現實中並唔存在童話。有一日，我做援交嘅事被曝光，至此之後所有人都以奇異嘅眼神望住我，男嘅會用色情嘅目光望我，而女嘅就會用鄙視嘅目光，佢哋不斷用言語攻擊我，排斥我。嗰時，我重以為呢個世界上至少重有一個人會企喺我身旁。」
Cathy合上眼睛，深呼吸一口氣，然後張開眼。
「但原來係錯，當佢知道事實之後，佢無去理解我，重要……強姦咗我！」
一滴又一滴眼淚，早就從Cathy臉上缺堤而下。
「嗰刻我先明白，所有希望都係我癡心妄想，現實係殘酷，並唔存在童話。從一開始好似我咁嘅人，就無資格得到其他人嘅愛，其他人知道我嘅嘢之後，只會用有色目光去對待我。我都想好似個普通人咁平平凡凡地生活，做自己想做嘅事，被人所愛護住。就算被呢個殘酷嘅現實折磨到痛苦不堪，我都有嘗試去掙扎，去堅強咁撐落去！但係，唔係我對世界失去希望，而係世界無畀過希望我！就算我心中抱有希望，換嚟嘅係一次又一次嘅絕望！」
「我已經好攰，再撐唔到落去，與其係一次又一次嘅絕望，倒不如死咗去，告別呢個殘酷嘅世界……但係，但係……就算係咁，我都無放棄過自己嘅希望，直到呢一刻，我都想去見一見同我無緣嘅世界……」
「想去真正咁去被人愛一次。」
Cathy雙手掩面，崩潰嘅眼淚奪眶而出。
夕陽嘅身影已經消失，留下昏暗嘅天空，就如失去希望一樣，彷彿控訴世界嘅不公，然而微絲細雨早就已經散落於大地，滴在我心。
呢個係Cathy真正嘅心聲。
出身於絕望之境中，於悲慘嘅人生中極力掙扎，換來傷痕累累嘅身心都好，直到最後一刻，佢都無放棄過自己嘅希望，就算世界無畀過希望佢都好。
但係，佢已經攰，無法再同呢個世界周旋，無法再一次從絕望中掙扎。或者，或者放棄，對佢來講係最好嘅選擇，可以從地獄中解脫，唔需要再受任何痛苦。
至少對佢嚟講係真正嘅幸福。
我行上前，幫佢披返上校服，然後將佢擁入懷中，任由佢嘅眼淚沾濕我嘅胸膛。Cathy流下嘅唔係悲傷嘅眼淚，而係一次又一次絕望，已經再無力氣行落去，失去希望嘅眼淚。
或者，呢個世界就係咁現實，咁唔公平。有人身處幸福之中但唔識珍惜，只會埋怨一切，有人身處絕望之境但如同螻蟻一樣去掙扎，懷抱有朝一日可以脫離困境嘅諗法，就算機會多麼渺茫。
但從來無人為螞蟻可憐，人類見到螞蟻只會毫不猶豫去踩佢，無論佢哋幾慘都好，因為只要唔關自己事，就無必要去理解其他人感受，隨意傷害他人，無論係Cathy嘅母親、同學和男朋友。
如果人與人之間可以多一點關心，多一點體諒，或者Cathy就唔會選擇自殺。
Cathy自殺嘅原因，係因為世界一次又一次賜予絕望畀呢個堅持住希望嘅少女。
眼淚忍唔住，一滴一滴滴喺Cathy嘅膊頭上。
「天使先生，做咩喊呀？好似我呢啲人，你唔需要喊喎……」
「天使先生，其實我無諗過講出來，搞到你喊好對唔住……」
「天使先生……」
甚至連做人最基本嘅價值觀，都慢慢被絕望而扭曲。
世界畀到妳嘅，就只有絕望，而沒其他。
既然世界無畀到希望妳，就由我給予妳希望。
我雙手搭住Cathy膊頭，堅定地望住Cathy嘅臉龐，
「就算世界上無人愛妳，至少呢刻，妳眼前有個人愛妳。」
Cathy緩緩抬起頭，紅腫而淚汪汪嘅雙眼同我嘅雙眼對視住。
喺我心中，對Cathy有兩種感覺，包括對佢嘅憐愛之情，同另一股莫名嘅愛意，連我自己都唔知點解會有呢種感覺。
我好清楚，我係愛上咗呢個女仔。
我明白，無論係我定係佢都係已死之人，我哋發展嘅感情，都係唔會有將來，但我希望可以將我最後嘅感情，確確實實傳到佢心扉之中。
Cathy嘴巴顫抖，緩緩吐出一句，
「天使先生，你係安慰我咋嘛……」
「我係認真，由我第一眼見到妳，我就深深被妳吸引，我有種好想保護妳，疼錫妳嘅感覺，我不知不覺就愛上妳。」
「無可能……無可能……我身體早已被人沾污得骯髒不堪，已經無資格去被愛，天使先生點會鍾意好似我咁嘅人？」
「如果真心鍾意一個人，係唔會介意有無俾人沾污。況且，妳好純潔，就好似妳嘅名一樣，世界上再無人比妳更加純潔。」
Cathy用無法相信嘅眼神望住我。
「你點解會知……」
「Cathy，係解純潔嘅意思。妳嘅心，好純潔，係最高貴嘅靈魂。」
我唔知點解我會知Cathy呢個名嘅涵義，突然間就喺我腦海浮現出來。
Cathy泣笑起來，眼淚又不停流下。
「呢個英文名，代表住我對我自己嘅一絲幻想……我真係厚面皮，竟然幫自己改個咁嘅英文名……」
「呢個英文名並唔係幻想，妳已經確確實實做到。」
「多謝你，多謝你……無論你係講真定安慰我，都多謝你……」
我輕撫Cathy嘅頭，雙眼同佢對視，佢臉頰泛起兩抹紅暈。
「我係講真。」
Cathy翹住我條頸，然後突然就錫咗落嚟！
嘴唇傳嚟軟軟嘅觸感，臉頰被佢濕潤嘅臉沾濕，嘴唇混和淡淡嘅香味同鹹鹹嘅淚水味。
既香又鹹嘅味道，正代表住Cathy嘅一生，擁有比其他人渴望幸福嘅純潔，但一生受罪，無法享受甘甜嘅幸福。
佢移開嘴唇，與我對視。
「多謝你，天使先生，你已經完成我嘅心願。」滿臉眼淚嘅Cathy，展現前所未見嘅燦爛笑容。
我感受到，呢個係真摯嘅笑容，臉頰滴落嚟嘅眼淚，就如晨曦嘅露水一樣，迎接新嘅夕陽，新嘅希望。
突然，我有種力量被抽走嘅感覺，身子一剎那突然感到軟弱無力。我感覺到，好似有種違和感咁。
「天使……先生？」
違和感好快就消失，但眼前又出現另一樣嘢——
Cathy身體亮起金黃色嘅光芒，然後飄上空中。
我伸出手捉住Cathy嘅手。
「Cathy！」我叫道。
Cathy先愣了愣，先係既悲又喜，最後露出安慰嘅笑容。
「如果可以嘅話，我都想同你一齊，但睇嚟我要離開喇！」Cathy另一隻手指住圍欄上面嘅狗狗公仔，「你就當佢係我，要好好咁錫佢，唔準拋棄佢呀！」
我感覺到手中嘅感覺開始消失，Cathy嘅身體開始化作光點，消散喺空氣中。我趁住最後嘅時間，講出我最後嘅說話。
「妳要記住，希望，係永遠都存在！重有，如果有下世，妳唔好周圍識男仔，因為我一定會要硬妳！」
「嗯，一言為定！」
最後一滴淚水滴落來，但未觸碰到我嘅臉頰，就化為光點消失。
Cathy身體化作光點完全消失，我嘅臉頰再感受唔到濕潤嘅感覺，嘴唇再感受唔到嘴唇嘅香味同淚水嘅鹹味。
金色嘅光芒，象徵住歷經受難後，終於得到嘅幸福。
天空雲彩漸漸飄散，剩低嘅，
只有逝者嘅思念，以及最後的希望。