【自殺之後，我遇見死神小姐】救贖七個自殺者的故事: Case 2 與病魔爭鬥的少年—(7)
而家我喺酒店某間房嘅床，死神小姐雖然畀咗個銀包我，但同Cathy嘅約會中，我已經用得七七八八，計埋入住酒店嘅錢，我已經變得一文不剩。
死神小姐，喺唔喺度？
無人應，睇嚟聽日開始可以食剩菜同瞓街。
我沖咗個涼，然後睏喺床上，回想死神小姐講過嘅話。
自殺者因為唔同嘅原因而自殺，有好多人係因為一時衝動而自殺，但亦有人唔係一時衝動，而係因為其他原因而自殺。
有人為贖罪而自殺，
有人係為咗承諾而自殺，
有人想脫離痛苦而自殺。
就好似Cathy咁。
自殺嘅理由有千百萬種，每個自殺者必有其痛苦之處。
並唔係個個自殺者，都可以賜予希望去了結心願。如果得嘅話，佢哋就唔會自殺。
救贖自殺者並唔係容易嘅事，Cathy嘅例子亦只係偶然。
我感覺到嚟緊我面對嘅自殺者，會更加棘手。
甚至，其實我都係一個咁麻煩，咁棘手嘅自殺者，只係而家嘅我失咗憶，所以唔知道。
究竟我係一個點樣嘅人？
望住天花，我不自覺就合上沉重嘅眼皮，漸漸進入夢鄉中。
天台上。
「唔好……唔好呀！」有個人喺我眼前大叫，眼前映像十分模糊，我看唔清佢個模樣。
「……對唔住……」
「唔好咁做呀！」佢往我衝過來。
「再見！」
之後眼前只見天藍色嘅天空，重有……
『醒喇！』
我一開眼，就見到死神小姐嘅臉貼到我臉前。
「哇！嚇死我咩！」我當堂嚇咗跳。
『你睇下而家幾點？』死神小姐叉住腰問。
我揉揉眼睛，望望房間嘅鐘，「依家先十一點啫……」
『十一點啦？你仲睏？而家要搵下一個自殺者喇！』
我整理好自己後，就出發到下個目的地。喺出發之前，我問死神小姐：「係喎，我無哂錢喇，可唔可以再變啲錢畀我呀？」
死神小姐皺起眉頭，不滿地說：『有無搞錯呀？明明畀咗五百蚊你，你一日就使哂？』
「有咩計呀，香港樣樣嘢都要錢㗎嘛，睇戲又要錢，食飯又要錢，物價又貴，特別酒店錢燒得重勁，妳又無畀地方我住，我又完全唔識人，只可以住酒店。」
『真係麻煩……』死神小姐又做變魔法手勢，『得喇，今次畀咗一千蚊你，你慳啲使呀！今次使哂就唔畀你㗎喇！』
「收到。」其實我覺得一千蚊都唔會夠，不過袋住先。
我跟隨死神小姐嘅指示，去到目的地。今次目的地係人來人往嘅街道。同之前一樣，去到嘅時侯會感受到股拉力，將我牽引到某處。
到某個位置後，拉力消失，但我周圍仍有唔少人。目標人物並唔顯眼，我雖然見到鬼，但喺我眼中鬼同人一樣無分別，所以我分辨唔到邊個係人，邊個係鬼，睇嚟我要搵一搵司棋姐幫手。
我觀察咗陣，大部份人都會好快經過呢段路，但唯獨有個人企喺原地無郁過。嗰個人係同我差唔多年紀嘅少年，佢戴住冷帽，著灰色運動衛衣同窄腳運動褲，個樣有少少似後生版嘅吳彥祖，佢插住衫袋，遙望馬路，似乎思考緊某些事情。
我穿插人群，行到佢隔離。
經過上次經驗，我明白到直接叫佢哋嘅話，作為鬼嘅佢哋係唔會咁快意識到，所以今次我決定用個快啲令佢哋意識到嘅方法。
我拍一拍佢膊頭，佢即刻轉過頭。
「Hello！」
「你係……？」佢表情有些微驚訝，反應唔算太誇張。
「我係……」
我應該講自己係咩好呢？無理由又叫自己天使先生，眼前呢個係男人，一陣佢「天使先生」咁叫我，真係打冷震。
而且「天使先生」係我同Cathy嘅回憶。
「我係係嚟引導你嘅人，我見得到你嘅存在。」
少年聽到我嘅話後並無特別震驚嘅感覺，反而反問我：「你好……引導者先生，我喺度等咗好耐，你係咪嚟帶我走？」
「算係，不過作為自殺者嘅你，本應係要墮入自殺輪迴，留喺度每日重覆自殺嘅場景。而我係嚟幫你達成你最後嘅心願，令你可以安心咁離開呢個世界。」今次我亦唔轉彎抹角，決定單刀直入，將從死神小姐聽返來嘅嘢搬字過紙講返畀少年聽。
少年點頭回應，我繼續說：「為此，我想瞭解你自殺嘅原因，同埋有無咩嘢喺心中放唔低。」
「無問題，我會將我嘅事一一講畀你聽。」少年微笑地說。
佢個微笑並唔虛假，係從心而發嘅安心笑容，並無怨恨任何事物，並無絕望嘅感覺，彷彿早已放下世界一切，準備去迎接生命最後嘅時刻。
喺佢身上，我感受唔到悲傷嘅情緒，係一種與Cathy截然不同嘅感覺。
鑒於喺大街到同空氣講嘢嘅行為極為怪異，所以我同少年去附近較少人嘅公園到。
「都係呢度比較舒服，以前細過成日嚟呢度玩。」
「嗯。」
「引導者先生，係咪想聽下我嘅背景同自殺原因？」
「嗯，咁樣先可以幫你更快搵出你未完了嘅心願。」
「無問題。我叫阿立，一個平平無奇嘅中學生，外貌好平凡，性格好平凡，生活好平凡，係個咩都好平凡嘅人，無特別過人之處嘅人。」雖然阿立自嘲平凡，但至少佢個樣其實唔差，大約中上。
「咁點解你要自殺？」我問。
「因為癌症，我半年前被驗到有血癌，半年嚟我一直接受各種化療，但病程並無好轉，更加有開始轉壞跡象。到前幾日，醫生同我嘅癌症已經到末期，治癒嘅機會率好細，如無意外只會剩低一個月命。」
係因為病痛而自殺嘅人。
「你有無聽過疼痛指數？」阿立問。
「係咩嚟？」我問。
「疼痛指數係醫學上用嚟測量疼痛程度嘅標準，零分最低，十分最高，而癌症係九至十分，排名比起生仔更要高。然而生仔只不過係承受幾個鐘，最多一日之痛，而癌痛係每日都會有痛到生不如死嘅感覺，重要唔知幾時會無啦啦痛起嚟。」
阿立嘆了口氣，「好似感冒咁發高燒嘅感覺，好似暈船浪咁頭暈想嘔嘅感覺，四肢麻痺無力嘅感覺，以上所有感覺一次過發生喺我身上，因為化療同藥物帶嚟嘅副作用。我每一日都承受住癌痛同副作用，只能夠睏喺病床上，望住白茫茫嘅天花，等一日又一日過去。」
阿立脫下冷帽，帽下已經無任何毛髮，係化療嘅副作用。
「我最初以為自己可以好堅強，捱過呢個最艱苦嘅時刻，但癌症嘅痛楚同化療嘅副作用，我慢慢失去堅持嘅慾念。我知，就算機會多麼渺茫都好，只要有一線生機，都應該積極撐落去。但我撐唔落去，但同時我都唔敢去自殺。」
「我曾經多次想過去自殺，我唔驚自殺所帶來嘅痛楚，相比癌痛，自殺亦不過一瞬間嘅痛楚，但我擔心死咗之後就變得一片漆黑，再感受唔到任何事物。」
阿立將冷帽戴返，「或者我真係好懦弱，無咁嘅決心去捱埋最後嘅關頭，又無膽去自殺。嗰陣我遇見我嘅朋友，佢畀咗勇氣我，我終於成功從天台上面跳咗落嚟，了結自己嘅生命。」
阿立低住頭，彷彿慨嘆自己嘅懦弱同無力感，除此之外，重有一種感情從佢嘅神情中流露出來。
但我無諗到，阿立最後自殺嘅動力，係源於佢嘅朋友，咁嘅話阿立算唔算基於自己嘅意願去自殺？如果嗰個人無慫恿到佢，阿立就有可能唔會自殺，繼續生存落去。
咁講嘅話，豈不就係嗰個人害死阿立？
阿立似乎睇穿我諗法，馬上補充：「我自殺的確係基於我嘅意願，我自己想自殺，唔關任何人事。」
「你唔會覺得好傻咩？」我問。
「傻？點解傻？」阿立好奇問。
「如果你撐落去嘅話，有可能會得救，而且亦都係最後一個月。既然你都撐咗半年，點解唔撐埋落去？」
阿立聽完我嘅話，擠出一個笑容，說：「大概係我無勇氣再堅持落去。一次又一次同我講有機會醫到癌症，然後一次又一次同我講病情惡化，就好似不斷帶我上天堂，又打返我落地獄。喺希望同絕望之間嘅徘徊，我慢慢感到疲倦，與其係繼續痛苦落去搏取渺茫嘅機會，有時放棄未必係壞事。」
阿立仰望住天空，繼續說：「堅持有可能生存，放棄就一定會死，既然有一線生機，點都要去搏一搏，到呢刻先嚟放棄係一件好蠢嘅事。但係……」
「唔通我連俾自己解脫痛苦嘅權利都無，一定要喺痛苦中掙扎求存？」
阿立嘅眼神中，流露出堅定同深遠，佢嘅決定唔係一時衝動而作出，而係經過深思熟慮，下定決心得出嚟嘅最後答案。
「自從得到癌症以嚟，我嘅人生就無再自由過，一直做化療，睏喺病床上，唔可以好似其他人咁自由地做自己想做嘅事，就好似被個天玩緊一樣。到呢個階段，我唔想再繼續被束縛，而係自由地選擇自己人生最後嘅路。我唔知呢個選擇係啱與錯，但但至少我直觀自己感受之後，選擇自己人生最後嘅路，無論最後如何都好，我都唔會後悔。」
自殺，真係一件完全唔啱嘅事？我唔知道。
以正常人嘅諗法，人係唔應該自殺，或者人生中會遇到唔少挫折，但烏雲過後總有陽光，只要堅持不懈，面對逆境，一定會有更好嘅未來。
但自從遇到Cathy之後，我先明白有啲絕望嘅環境並唔係我哋所想咁易解決，而呢啲絕望可以係普通人眼中好簡單嘅事，如同阿立嘅病。喺旁觀者嘅角度，我哋只會不斷支持，鼓勵住病人，給予佢生存嘅動力，令佢唔會有自殺嘅念頭。但如果有日因為懦弱，無法堅持而自殺，唔通咁又係自殺者嘅錯？
聽完阿立嘅自白，我稍微明白到佢自殺嘅原因。
但係眼前嘅佢，似乎稍微講咗少少大話。
「我都唔知你嘅答案究竟係對與否，但若然你真係咁睇得咁透，你唔應該會驚自殺之後再感受唔到任何事物。你會驚，係因為你對麈世間某啲事物仍存有眷戀。」
阿立稍微瞪大雙眼，我繼續說：「如果無估錯，你係放唔低你身邊嘅人。」
阿立會意而笑，「被你睇穿咗添……的確係，就算我決意自殺，我心裡面確係有放唔低嘅人。」
「嗰個人係……？」
「係好重要嘅人，我曾經同佢哋約定，就算點樣都好，我都會捱落去，一定會好返。」
係約定，呢個應該係阿立對人世間唯一嘅眷戀。
「既然係咁，不如見下最後一面？」
「我唔知重有無面目去見佢哋……講真，我無後悔過自殺，但係我破壞咗同佢哋之間嘅約定，總係有種內疚感。」阿立露出憂愁嘅表情。
「你唔係話你唔會後悔嘅咩？既然唔後悔，就相信自己嘅選擇。」
「我……都唔知……」
「如果你對佢哋嚟講係重要嘅人，我相信佢哋一定會明白你！」我拍一拍阿立嘅膊頭，「見佢哋最後一面，完成最後嘅心願。」