【自殺之後，我遇見死神小姐】救贖七個自殺者的故事: Case 7 被愛著的那個人—(48)
我今日無返到學，而係去咗另一個地方。
我踏入五金舖，從雜亂無章嘅貨堆中，搵出我要嘅嘢，膽怯地拎出嚟。
究竟我應唔應該咁做……？呢一刻我嘅內心重喺度猶豫，絲毫嘅良心喺度勸喻緊我唔好咁做。
但係，就算我可憐其他人，又會有其他人嚟可憐我咩？
我唔需要同情佢，因為我早就抹殺咗自己嘅良心，我只需要嗰個人為佢講過嘅嘢付出代價。
我將嗰樣嘢拎到老闆面前，準備埋單。老闆用咗個疑惑嘅眼神望住我，再望一望件貨，然後問：「你買嚟係做咩？」
「屋企廁所個渠塞住咗，我父親叫我買嚟通渠。」我平淡地回答。
老闆望多我兩眼，跟住收下我嘅錢。
今日我著咗一件黑色嘅衛衣，將帽笠起嚟，大概老闆唔會認得我嘅樣。
我拎住個支嘢，去到學校門前等待。
叮噹——學校鐘聲響起，已經到放學時段，同學們陸陸續續離開校園，而我亦見到我嘅目標。
阿Yan拖住個男仔，嘻嘻哈哈咁離開學校，望住佢嘅笑臉，我就覺得嘔心起嚟。
既然我無幸福嘅生活，我都唔會俾妳有幸福嘅生活。
我要妳試下跌落地上嘅滋味。
我跟隨阿Yan嘅背後，阿Yan同個男仔分開之後，獨自一個返屋企。一路上都比較多人，而且太開揚，唔係落手嘅好時機。
我跟阿Yan到佢屋企樓下，呢度附近無咩人，係個落手嘅好機會！
我將鏹水嘅蓋扭開，急步接近阿Yan背後。突然，阿Yan無啦啦擰轉身。
「你做咩……」
我被阿Yan突如其來嘅轉身嚇咗嚇，打亂咗節奏，但目標就喺我眼前，我咩都唔理，急忙咁將鏹水淋過去。
「啊啊啊啊啊啊啊啊！」阿Yan即刻揜住佢塊臉，發出極尖嘅叫聲。
我一時急忙，淋嘅時候淋歪咗，不過依然淋中阿Yan嘅左眼位置。
阿Yan叫得十分大聲，我驚會引到其他人過嚟，到時我就會被人發現，然後被人拉。
我轉身就跑，有幾遠跑幾遠，跑到途中見到有個大型垃圾箱，即刻將鏹水扔落去，然後無視途人嘅眼光，不停地跑不停地跑。
唔知跑咗幾耐，直至我跑到一個唔知邊到嘅地方，確認周圍附近無人，先停低落嚟。
我雙手撳住膝頭，大啖大啖咁唞氣。
我成功咗啦！阿Yan最自豪嘅容貌被我毀咗……我幫妹妹幫咗仇啦！
雖然眼前無鏡，但我見到自己係笑得好開心……
我將頂帽拉返落嚟，扮咩事都無咁慢慢行返去屋企。沿途我一直覺得周圍嘅途人望住我，就好似知道我啱啱做過嘅嘢，當我轉彎時，就覺得彎位有個人佈緊我咁，我膽戰心驚咁加快腳步地行，快啲返到去屋企。
我終於返到屋企，面對空無一人嘅家，我竟然第一次對呢個家感到安全感。
我冷靜落嚟後，回想返啱啱做嘅事件，先知到底有幾嚴重，如果被人發現嘅話，我就會被人拉！
我開始感到驚。
我甚至驚到唔敢落街，無去接妹妹放學，妹妹等唔到我放學，去咗神秘基地又搵唔到我，結果先返嚟屋企。
第二日，電視新聞喺度播：『昨日XX邨一名少女放學回家途中遭人以鏹水淋臉，事後兇手逃去，女事主臉部和左眼遭到灼傷，目前尚未抓到疑兇……』
我聽到呢段新聞，不斷冒出冷汗……尋日都無咩人留意到我，我諗我應該唔會被人發現先係……
但萬一真係被人發現，我就會被人拉。如果我被人拉，我就見唔到我妹妹，唔可以陪喺妹妹身邊……最重要嘅係，就會剩低父親同妹妹兩個人喺屋企，到時唔知父親會對妹妹做出啲咩事情出嚟……
我唔可以被人拉……我一定要陪喺妹妹身邊！
「哥哥，你做咩重唔換衫嘅？」妹妹換好哂校服，等埋我一齊出門。
「無，今日我都唔返學啦！妳出門先啦！」今日都係避一避風頭，唔好返學住。
「喔。」妹妹孭起書包，揈住辮子出門返學。
我望住妹妹嘅背影，妹妹嘅書包有啲殘舊，等我有錢嘅時候一定會幫佢買個新。
我返入房打算睏覺。忽然，我父親無啦啦打開房門，問我：「做咩又唔返學？你知唔知學校尋日打咗次嚟？」
我無好氣答佢，隨便答：「唔想返咪唔返囉！」
父親突然一巴摑落嚟，我揜住塊臉被打嘅位置，狠狠地睥住佢。
「你唔係尋日偷偷地去五金舖買鏹水咩？你唔好以為我唔知！」
「你點會知？」我驚訝地問，心裡冒出冷汗。
「我重以為你個衰仔想拎嚟淋我，重諗定咗方法嚟對付你。啊……定係你係啱啱個篇新聞嘅疑兇呀？」
「唔係！」我即刻大聲反駁。
「你唔好扮喇！你咁大反應，即係啦！疑兇又係著黑色衛衣，你尋日又係著黑色衛衣，唔係你係邊個？」
「我唔係！」我堅決反駁。
「報警試下咪知係唔係囉！」父親展露出奸詐嘅笑容。
我無法反駁，萬一父親真係報警，就有機會被警察發現我做過嘅事……我唔可以坐監，唔可以離開妹妹身邊。
「你想點？」我問。
「無咩想點……我養到你咁大，你都無咩點回報過我。」父親隻手做出錢銀嘅手勢。
父親想要嘅係錢，佢用呢件事去威脅我去搵錢畀佢，如果我唔順從佢，佢就會將件事爆出嚟，以佢嘅為人佢的確會做得出咁嘅事。
為咗可以陪喺妹妹身邊，我只能夠順應佢嘅意思。
「哈哈！果然係爛泥扶唔上壁，養咁辛苦養件垃圾出嚟。」父親舉起幾隻手指，「我要咁多。」
「咁多？」我不忿地講。
「有意見？咁報警囉！」父親走去拎電話。
「等等！咁多就咁多。」我截停父親嘅舉動。
「咁咪識做囉！」父親露出一副奸詐嘅笑容，然後離開房間。
嗰個金額……我只係個學生，除非我退學，如果唔係根本無可能賺到呢個金額，但係我唔應承父親就會報警……點算好？
而且……就算我賺到呢個金額嘅錢，佢都唔會放過我……既然我有把柄被佢捉住，就算我今次滿足佢，下次佢都會用呢樣嘢威脅我。
萬一……佢將呢件事同妹妹講，用呢樣嘢威脅妹妹嘅話……
唔得！過去十幾年，我已經被父親嘅魔掌折磨得好慘，我唔可以再因為我，而令到妹妹受父親禍害！
過去嘅人生，我一直漫無目的咁生存，我唯一嘅生存目的，就係令妹妹有個健康嘅童年，愉快嘅校園生活，可以同其他細佬一樣正常咁成長，邁向幸福嘅道路。為咗呢個目的，就算我承受幾多苦都無所謂。
如果因為我做過嘅錯事，而令妹妹受苦，我會內疚一世。
喺我嘅一生，令我最自豪嘅就係妹妹。如果要妹妹幸福，我唔可以再原地踏步……
我決定咗……我要脫離父親嘅魔掌！
我要帶妹妹逃離呢個地方！