【自殺之後，我遇見死神小姐】救贖七個自殺者的故事: Case 7 被愛著的那個人—(49)
過咗成個禮拜，我依然一蚊都無賺到。
就算我去搵兼職，學生嘅我無可能賺到好多錢，根本無可能賺到父親要求嘅金額。
況且，我已經決定咗唔會屈服於父親之下。
只要帶妹妹離家出走，去一個遠離呢度嘅地方，唔俾父親知道嘅話，就可以脫離父親嘅魔掌。不過，我應該去邊度好？居所之處嘅問題又點樣解決？如果問題係欠缺錢，只要我去搵錢畀妹妹就無問題。
但最大問題係，假如父親發現我哋逃離之後，佢一定會報警搵我哋，甚至將我做過嘅事話畀警察知，到時就會前功盡廢。
無論我逃到去邊，都無法逃脫父親嘅魔掌嗎？
呢個時候，屋企電話忽然響起，我拎起話筒接聽。
「喂。」我講。
「係我呀，記唔記得我呀？」一把熟悉嘅聲音傳入我耳中。
「記得。」我無諗過話筒另一邊嘅人會打電話畀我。
「我哋都好耐無見，其實係咁……」對方將詳細事情講畀我知，我聽完之後感到嘅驚訝又疑惑。
「就係咁樣……我唔知同邊個傾好，所以就打畀你。」
「好……咁我哋聽晚見。」
我唔明白我點解會應承一個咁耐無見過嘅人出嚟，更何況我從來無視其他人係我嘅朋友，但係我覺得同佢見面或者係一個轉機。
為免獨自留妹妹喺屋企同父親共處，我呢晚帶埋妹妹出嚟，叫佢喺附近麥當勞度等我，而我就上去大廈天台，同約咗嘅人見面。
上到天台，頭頂只有一片黑暗籠罩，周圍有微弱嘅街燈照耀住，而透過微弱嘅燈光，我見到對方等待緊我。
「Hello！我喺呢度。」對方坐喺天台嘅邊緣，我拎住佢委託買嘅嘢，行到去佢面前。
眼前呢個人面色蒼白虛弱，而且戴住頂冷帽，睇落好似就嚟死咁，佢係我小學嘅同班同學。佢喺電話中同我提到，自己患咗血癌，已經到咗末期，長期瞓喺醫院令佢感到太無聊，所以佢偷偷地逃出醫院，想搵個地方輕鬆下。
我將佢要嘅嘢放喺佢面前，係幾罐啤酒。佢從褲袋拎咗張一百蚊畀我，還返啲酒水錢畀我。
「好耐無見！我哋乾返杯先！至從病以嚟，我都好耐無飲過酒喇……」佢拎咗兩罐啤酒，將其中一罐畀咗我，「我預咗你㗎！」
我出世到而家都無飲過酒，只有見過父親喺屋企飲。我見阿立係個末期病人，就當好心順下佢意，陪佢飲幾啖。
我哋傾咗唔少以前小學嘅事情，重有大家升到中學之後嘅經歷，受到酒精影響，我唔單止個人愈嚟愈暈，我不自覺間將一啲心底話講咗出嚟……例如點解我小學時個人奇奇怪怪，例如我家庭嘅狀況……呢啲嘢，大概我只同Cathy講過。
「係啦！其實今日出嚟，其實我想做件事。」阿立佢連第一罐酒都未飲完，睇嚟佢自從病以嚟，的確變得好虛弱。
「咩事？」相反我不自覺沉醉於酒嘅快感之中。
「我想自殺。」阿立認真講咗句。
「吓？」我以為自己聽錯，但阿立嘅表情好認真，一啲都唔似開玩笑。
「我個病已經末期，醫返嘅機會率好微，每日要受盡化療副作用嘅折磨，好辛苦，所以我想死咗去。」阿立企喺天台邊緣，從高空望住眼底下嘅街道。
「咁你依家跳落去就得喇。」受酒精影響，我不自覺衝口而出。
「哈！我都想，但係我驚阿爸阿媽傷心，驚跌落去嗰下會好痛，同埋……驚破壞同其他人之間嘅約定。」
「有咩好顧慮，想做就去做囉？一直以嚟，我嘅人生都係咁樣捱過去。」
有時望住其他人，我會諗到底我應唔應該表現得好似個正常人，應唔應同人有正常嘅社交，但我嘅心同我講唔得，出生於貧困同悲劇之中嘅我係唔可能生活得同正常人一樣，而且我重守護住我最愛嘅妹妹。既然係咁，就做返自己就夠。
阿立聽完我嘅話，睜大眼睛深思咗一下。
「係呀……忠於自己……」阿立仰視住黑色嘅天空。
我將剩低嘅酒開哂畀佢，同佢講：「如果你自己無勇氣，就將呢度啲酒飲哂去，咁你就可以跳到落去。」
阿立拎起其中一罐酒，一掃而盡。我明白阿立本身就有求死嘅慾望，佢同我講嘅真意唔係想問我嘅意見，而係想搵一個人肯定佢嘅諗法。
人就係咁搞笑，問人意見嘅目的唔係真係想聽下其他嘅意見，而係想有人肯定佢嘅諗法，給予佢勇氣去做佢想嘅決定。既然係咁，我就講出順佢意嘅答案，反正佢真係跳落去都唔關我事。
「如果有來世，我唔想住喺呢個城市，我寧願住喺瓦努阿圖，雖然嗰到啲人窮同埋缺乏物質，但係佢哋生活得好簡單，所以唔會有任何煩惱，可以好開心咁生活。」
「瓦努阿圖……？」
「嗯，你無聽過？係一個太平洋嘅島國嚟。」
「無。」
「咁呀……」阿立企喺天台邊緣搖搖慾墜，好似下秒就會跌落去咁。
「你點解會搵我？」我好奇地問，佢有自己嘅朋友又唔搵，搵一個咁耐無見過啲舊同學。
「因為同朋友講唔出口呢啲嘢，最重要嘅係佢哋一地勸你唔好自殺，同你講人生無絕路呢啲話。」阿立搖一搖頭嘆氣，「呢啲話個個都識講，但唔會真正切入我嘅心。我想搵個我可以無顧慮暢談一番，又會明白我感受嘅人，諗下諗下就諗起你。」
「原來係咁。」
我放低空嘅酒罐，轉身拖住左搖右擺嘅身軀離開呢個天台。至於阿立嘅死活，就與我無關。
我落到樓下麥當勞接等待我已久嘅妹妹。
「哥哥，點解你咁大陣味嘅？」妹妹問。
「無，無嘢。」我搖頭回答，然後拖住妹妹返去屋企，而離開途中我聽到嘅一啲碰撞聲，碎裂聲，人嘅尖叫聲同嘈吵聲，我一律無理會。
我腦海中有嘅，就只有「瓦努阿圖」呢四隻字。
之後兩日，我不停地上網搜尋瓦努阿圖嘅資料，得出嚟嘅結果大概都係全世界最快樂嘅國家、太平洋島國、貧窮國家、快樂指數最高……等等結果。總括嚟講，瓦努阿圖係一個落後嘅太平洋島國，嗰度物質貧乏，但由於當地人無憂無慮，知足常樂，所以佢哋生活得好開心。
我再搜尋前往瓦努阿圖嘅方法，就只有搭飛機呢個方法，但先唔論錢呢個問題，我無護照，無可能去到搭飛機……我再搵其他去瓦努阿圖嘅方法，但似乎無。
我將地圖搵出嚟，再搵出香港同瓦努阿圖嘅位置，兩者都幾遠，被太平洋相隔住。我嘗試搜尋划船去瓦努阿圖，但搵唔到結果，我再搜尋太平洋划船，然後搵到個新聞：
『史上第一 英探險家獨自划船橫渡太平洋』
我撳入去睇，內容係有個英國探險家由美國出發，用咗二百幾日划船去到澳洲。我望向地圖，美國同澳洲相隔嘅位置遠比香港同瓦努阿圖遠，咁美國可以划船去澳洲，香港都可划船去瓦努阿圖啦！
我用咗幾日時間畫咗張由香港去瓦努阿圖嘅地圖出嚟，然後搵定可以租船划嘅地方。所有嘢已經準備好，唯一欠缺嘅係租船同買糧食嘅錢。
只要划船去到瓦努阿圖，我哋就可以永遠脫離父親嘅魔掌，自由地生活落去。
我哋終於可以自由……！
就算嗰度嘅物質貧乏都無所謂，我唔需要咩物質，只要有妹妹喺身邊，就已經好幸福！
呢張地圖，係我哋最後嘅希望！
時間一日一日過去，阿Yan出院後因為被毀嘅容貌而遭受到班上同學嘅排斥，而我無理會到佢，呢啲係佢自作孽，我唯一擔心嘅係佢知道係我淋佢鏹水，但佢似乎唔知道。
呢幾日，父親開始催迫我畀錢佢。
「我要嘅錢呢？你唔係一蚊都賺唔到返嚟呀？」
「無，賺唔到咁多。」
「咁少少都有啦掛？」
「無……」
我一蚊都畀唔到佢，父親摑咗我一巴，「你唔記得如果你無錢嘅話，我就會將你做過嘅事話畀差佬知咩？定係你真係想我報警話畀差佬知呀？」
我強忍怒氣，低聲下氣同父親講：「我會盡快賺到錢畀你……」
父親再摑多我一巴，「哼！無用嘅垃圾。」然後離開房間。
只要我賺到足夠嘅錢，我就可以脫離你嘅魔掌，唔使再受你擺佈……唔使喺你嘅陰影之下生活……
只差一步！
我唯有出去搵兼職做，賺取外快，但為免留妹妹一個喺屋企，我會帶埋佢一齊去返工，留佢喺附近餐廳溫書做功課，直到我收工。
我將一部分嘅錢交畀父親用，然後偷偷地儲起一筆錢，雖然要儲夠目標重有好長時間，但只要諗起我同妹妹離開呢度，去到瓦努阿圖嘅生活，我就變得有動力去賺錢同等待。
直到有一日夜晚放工時，我同妹妹搭巴士返屋企時，對面坐咗個中年男人，佢似乎十分疲倦，坐喺度頭耷耷睏著咗，而佢隔離放咗個黑色袋。
最初我並無為意，後尾巴士轉彎時個袋跌咗落地下，個男人重繼續睏，無察覺到，於是我幫佢執返起個袋。
我感受到個袋有啲重量，一望，原來係錢！我忍唔住拉開拉鏈，袋入面全部都係錢，重要有好多錢！呢筆錢就算我點返工都無可能賺到！
只要有咗呢筆錢，我就可以實驗我嘅夢想，帶妹妹離開呢度！
我見個男人睏得好冧，完全無動靜，既然係你睏著無留心，就唔好怪我！
巴士停站，我小心翼翼一手拎起個袋，另一手拖住妹妹嘅手。
「做咩……」妹妹突然出聲，我即刻揜住佢個口。
「噓！」我示意妹妹唔好出聲，然後拖住佢落車。
落咗車後，妹妹皺眉問我：「點解哥哥要拎走叔叔個袋？」
「因為只要有個筆錢，我哋就可以離開呢度，脫離父親嘅擺佈。」我同妹妹講。
「但係，偷人嘢係件唔啱嘅事……」
我雙手搭住妹妹嘅膊頭講：「我咁樣做係為咗妳，只要可以令妹妹幸福，哥哥無論係咩事情，都會願意做。妹妹幸福嘅話，所有嘅罪惡由哥哥一力承擔就夠。」
我對妹妹展現安心嘅微笑，妹妹扁住嘴望住我欲言又止，然後低頭講咗一句：
「對唔住……係妹妹無用……」
我烏低身攬住妹妹，輕掃佢嘅背脊，同佢講：「點會呢？妹妹一直陪喺哥哥身邊，哥哥已經好開心，哥哥會竭盡所能，令妳有幸福嘅生活。」
我感覺到膊頭有點濕嘅感覺，原來妹妹喺度喊緊，我即刻緊張地安慰佢：「傻豬……妳做咩喊呀……？」
「對唔住……對唔住……」
呢一刻，我唔明白妹妹講對唔住嘅意思……
我哋嘅幸福就喺我哋眼前，只差一步就可以捉到……我本以為係咁……
但始終，我哋最後都係得唔到幸福……