【自殺之後，我遇見死神小姐】救贖七個自殺者的故事: 【外傳】Case X 神秘的死神小姐—(1)

我坐喺天台上，雙腳懸空伸出，欣賞住高樓林立嘅大廈，四通八達嘅道路，蜂擁蟻聚嘅人群，同埋頭頂呢片蔚藍嘅天空。

最近多咗好多人自殺，大概每日都有人跳樓，原因不外乎學業、愛情、工作等等原因。

自殺係一件大家都唔想見到嘅事情，因為有自殺發生，即代表悲劇嘅存在，但無論喺邊度，呢樣嘢都一定會發生。

如果有個城市每日都不停有人自殺，咁嗰個城市一定係痴咗線。

就好似我腳底下嘅呢個城市。





「啊……哈……」我打咗個喊露，伸咗個懶腰。

又要準備去下一個自殺者嘅地點。

今日我一改風格，無著到黑色低胸連身裙，改咗著黑色嘅高領露背針織毛衣，半球會從側邊露出，用毛衣嘅長度去遮擋下半身，連褲都唔使著……聽講咁樣會比起單純嘅低胸裙誘惑性大增十倍。

下身著咗一對黑色長皮靴，臉上化上淡妝，由於某個粉腸關係，我決定換咗用防水妝。

微微嘅清風吹動著我啡色嘅曲髮，我望住腳下如同蟻般嘅人類，又開始用思考打發下時間……





有無諗過，自殺嘅人，死咗之後會去邊度？

呢個係一個好值得反思嘅問題。有人認為自殺本身就係一種罪，所以應該落地獄；有人認為應該睇一個人一生嘅功德而論，所以無論天堂或者地獄都有機會去。

但自殺究竟是對是錯？

呢件事，我唔會作任何評論。

死亡唔同玩泥沙，城堡冧咗可以再砌過，人死咗就無法返守頭，身邊嘅人亦因此而哭泣，但死亡係件無可避免嘅事情，或者有日會因為患病、意外而死去，就算人生安然無恙，總有一日會老死。





人生在世，理應好好享受人生。若然一時衝動而了結寶貴嘅生命，帶嚟嘅後果可以係非常嚴重。

所以，對於不珍惜自己生命嘅人，佢哋將會陷入自殺輪迴，靈魂困於現世之中，每日重覆著自殺嘅情景，而且俾佢哋感受下死後無法再做任何事情嘅感覺……如果佢哋感到後悔，就盡情俾佢哋去後悔，俾佢哋望住至親嘅人傷心感受悔疚感，俾佢哋望住想做嘅事情而無法再觸碰任何事物。

自殺輪迴，係一個俾自殺者反思嘅機會。

講咗咁耐，但大家都唔知道我係邊個。

唔同人對我哋有唔同嘅稱呼……天使、惡魔、死神、引導者……種種唔同嘅神話稱呼代入我哋身上，至於我哋實際上係咩？唔重要啦！

只要知道我哋嘅職責，係負責引導死者嘅靈魂，同埋監視陷於自殺輪迴中嘅人，就已經足夠。

至於我嘅本名？嗯……歷史太悠久啦，耐到我自己都唔記得咗自己嘅名字，因為自我死後就一直再無使用過名字呢樣嘢。

我係個自殺者。





幾時自殺，邊度自殺，自殺方法，自己生前嘅經歷……我都唔記得啦……

不過我記得喺我自殺之後，我遇到個奇怪嘅男人，我依舊記得，

佢好煩。