【自殺之後，我遇見死神小姐】救贖七個自殺者的故事: 後記

由妹妹嘅願望而誕生嘅故事，總算告一段路。唔知大家睇完七個自殺者嘅故事之後，會有咩感受，喺經歷每個故事中，主角除咗係救贖者，亦係觀察者，遇見唔同嘅自殺者，佢得出唔同嘅感受仍，領悟唔同嘅道理，到最後佢要面對嘅係對自己嘅反思。

七篇故事，我想做到每篇有感觸位之餘，又可以有唔同嘅變化，例如Cathy身處於無法改變嘅絕望，阿立對生命自主嘅選擇，達叔同Stephanie過去做過無可挽救嘅錯事，甚至可恨之人阿Yan到底值唔值得可憐等等。如果每篇故事都好似Cathy或者達叔咁，應該覺得好悲慘，但同時只會千篇一律。所以出現咗如同Stephanie同阿Yan嘅自殺者。

呢個結尾表達得比較平淡，主要係用於解伏筆，但真正嘅結尾早已喺Case 7末段出現，所有事情已經完結，我諗無必要為呢篇故事添新嘅一筆，如果遲啲有機會可能會改寫下個結局都未定。不過如果有留意Case 7最後哥哥同妹妹講嘅嘢，就會發現呢個結局有啲端倪，我都唔寫太白，等讀者自行發掘。

無論係想呢類型嘅故事，定係呢類型嘅主角，對我嚟講都係個好大嘅挑戰。我知呢類型故未必可以好吸引人眼光，但我想試下喺自己嘅故事中刻畫自己嘅想法，令呢個故真真正正變成我筆嘅作品……不過我諗以後應該唔會再寫呢類型嘅故事喇……會轉寫其他類型嘅故事，可能會係長篇，大家就拭目以待啦！

最後就係多謝各位讀者嘅支持！不過死神小姐外傳重未完結，外傳最後一節，將會係呢個故事嘅Secret Ending！大家密切留意Facebook同紙言啦！同埋遲啲會帶新嘅故同大家見面！再見各位！