【自殺之後，我遇見死神小姐】救贖七個自殺者的故事: Case 6 得到惡報的扭曲之人—(39)
我準備返去中學，繼續救贖阿Yan嘅道路。
雖然阿Yan對我敞開心扉，但我未諗到方法去救贖阿Yan，因為阿Yan嘅本心就唔想被救贖，心底裡自然無所謂嘅願望。
定係重施故技？如同我對Cathy同狗狗做過嘅一樣，阿Yan嘅自殺原因係因為身邊一切嘅虛假，只要令阿Yan再次感受到人情冷暖，改變唔想被救贖嘅心，或者可以救贖到阿Yan嘅靈魂。
既然係咁，我就以行動去證明畀佢睇，呢個世界並唔係虛假。
至少我救贖過嘅五個人，佢哋嘅感情全都係真實，係有血有肉嘅存在。
只要擁有感情嘅存在，全部都係有血有肉，不存在虛假嘅構造。
我踏上路途，再一次向第六個救贖者進發。
我返到去學校門前，而家應該差唔多放學時份，校門亦打開著。
「咦？點解你又會喺度？」係我今日過嚟嘅時侯第一個搭話嘅男仔，計起嚟我已經第三次撞到佢。
「無，咁啱啫……」我隨便帶過。
「話說你有啲似我某個同學。」男仔突然講。
「邊個？」我感到好奇，竟然會有人似我。
「其實我都唔知似唔似，因為我都唔識你，唔知你份人，不過你畀我個感覺就幾似佢。」
「哦……」
喺我同呢個男仔對話時，我聽到隔籬另一班人嘅對話內容。
「唉……如果我當初有同佢講到，或者個結局就唔會係咁……」
「成件事都唔關你事，你有無講到，個結局都會係咁，根本你點做都無法改變事實。」
「都係嘅……但係……」
「唔使但係喇！反正係佢衰先，你無義務去幫佢。」
呢番對話……
「你做咩喺度發吽哣？」我眼前個男仔講。
「無……無嘢。」
「我走先啦！Bye！」
我同男仔道別之後，馬上上去搵阿Yan。
上到去之後，阿Yan依然喺啱啱條走廊等緊我，但眼前卻發生咗另一件事。
阿Yan低住頭默默地流眼淚，佢嘅身體開始產生透明閃爍，甚至睇得清楚佢身後嘅景象。
我好快明白到發生咩一回事，有兩男一女企喺阿Yan隔籬講話。
「喂，你唔使去睇下你條女咩？」有個女生講。
「唔啦！佢係生定死關我鬼事咩，我又唔係真係鍾意佢，當初係佢見到我啲錢先黐埋嚟我身邊，我見佢個樣又唔錯咪同佢玩下囉！我對呢啲淨係見錢開眼嘅女人根本無興趣！」其中一個男生講。
我望見阿Yan嘅表情，加上呢個男仔講嘅嘢……唔通佢就係阿Yan嘅男朋友？
「你唔好咁衰啦！」佢身邊個女生答。
「咁係呀嘛！佢變成咁嘅樣之後，我諗住佢會自動收皮喇！點知重要喺咁問我重會唔會鍾意佢，係咪唔介意佢嘅外表！喂大佬！呢啲嘢你話電視劇裡面就會發生啫，佢又真係夠厚面皮走過嚟問我，又唔諗自己咩新鮮蘿蔔皮，平時佢對啲仔咪又係玩……真係臭雞一條。」
「咁又係呀！佢依家個樣真係好鶻突，塊面岩岩巉巉咁，望多幾秒都打冷震！」另一個男仔講，過幾秒後佢突然靈機一觸，「話唔定佢可以去拍嗰啲康復中心廣告，或者整容廣告都得！」
「喂！你呀……我鍾意！」最初講嘢個男生笑埋一份。
「你會唔會好似對嗰個八婆咁對我㗎？」女生問。
「梗係唔會啦！佢邊似得妳，佢只不過係個用嚟玩下，攝下時間咋……」男生將女生擁入懷中，
「我根本就無將我個心放落佢到，我對妳先係最真心。」
阿Yan聽到呢句話，睜大眼睛望住眼前兩人，露出崩潰嘅表情。
「哈！算你喇！」女生笑道，然後同嗰兩個男生離開。
作為旁觀者嘅我，呢刻望見阿Yan嘅表情都不禁憐憫起嚟，更何況……
「喂！你同我停低！」
對住踐踏人心嘅賤男，我竟然變得憤怒起嚟！
「做乜嘢呀？」男生攬住女生，同不屑嘅語氣講。
「你啲咁嘅賤男食屎啦！」
我一拳打落男生嘅臉，將佢嘅表情打得凹陷起嚟，佢後退咗幾步，由另一個男生扶住。
「痴線㗎！你做乜撚嘢？」男生揜住個鼻大聲鬧。
「我做乜嘢？好似你淨係識玩女嘅人，而且重不停侮辱死者，你呢啲人我見一鑊就打一鑊！」我指住佢個鼻鬧。
「吓？你係佢邊個呀？佢啲咁嘅女仔淨係識收人兵，當人水魚，唔通我重當佢韓劇女主角咁服侍呀？我梗係當玩下就算喇！抵佢俾人玩……喂，話時話你又佢邊個……唔通你係佢隻兵？」男生重要變本加厲地講。
「你食屎啦！」
我二話不說，就衝上前繼續毆打佢，打到另一個男生不停擋住，而女生不停叫救命，直到有個老師衝咗上嚟，大叫發生咩事。
「喂！快啲走！」
阿Yan過嚟捉住我隻手，想拖走我，但係佢拖嗰下卻遲疑地望返我轉頭。
哦！阿Yan係拖唔郁我，因為佢係無質量嘅靈魂，呢點已經經小妹妹同狗狗試驗過。
但我還是拖住阿Yan嘅手，無視嗰對狗男女同老師，拖住阿Yan離開現場，直到離開學校，跑到離學校遠少少嘅位置。
「喂！你傻咗呀？無啦啦郁手打人。」阿Yan講。
「我只係唔gur佢個人先出手打佢。」
「佢講得啱，我淨係識玩人，就算依家被人玩返轉頭都係抵死。」
「我唔咁認為。」我講出我嘅心聲。
阿Yan呆咗咁望我，我繼續講：「的確妳玩人係一件事，唔代表人哋可以理直氣壯咁玩你，如果係帶報復性質都叫情有可願，但啱啱個男仔只係單純睇唔起妳玩返妳轉頭。就好似一個賊仔都有權保護自己本身嘅財產，賊仔偷過人嘢，佢應該要將贓物還返畀人，然後承擔自己嘅罪行，但唔代表其他人可以理直氣壯去搶走賊仔本身嘅財產。呢種行為只係借私刑同正義為名，滿足自己醜陋嘅慾望。」
「其實……喺你走咗之後，我前思後想，已經諗通咗啲嘢……你一直以嚟無介意過我係一個人渣，同我講道理希望教醒我，明明係自己作嘅孽，你都不斷安慰我嘅心，直到啱啱你重挺身而出幫我，我好多謝你。但係，呢個世界上的確有不配被拯救嘅人，我今時今日嘅下場都係我自己攞嚟，你要拯救嘅應該好似Cathy咁活於悲劇之中嘅人，而唔係我呢啲人。我覺得已經足夠……你再唔使再拯救我啦！」
阿Yan嘅透明程度變得更厲害，身體彷彿就嚟同睇唔到一樣。
「喂！妳等等！我講過無論係咩人都好，佢哋都有同一拯救嘅價值，即使妳曾經做過好多錯事，都唔代表妳嘅存在係比較低賤，更何況妳依家已經洗心革面，我更加無可能放棄妳！」我嘗試說服阿Yan，嘗試將佢嘅情緒穩定落嚟。
「多謝你，其實你已經幫咗我好多，之後嘅事就由我自己嚟面對……其實你會嚟救贖我都係因為嗰個死神小姐畀你嘅任務，你先會咁做……只要我同死神小姐過唔需要你嘅救贖就得啦。」
「唔好！」
但我遲咗一步，阿Yan將死神小姐召喚咗出嚟，死神小姐憑空出現喺我哋二人之間。
「我想……」
『我聽到哂。」阿Yan說話未完，就被死神小姐截斷，『你記唔記得我臨走前同你講過嘅個番話。』
「如果我能夠救贖今次嘅自殺者嘅話。」我將死神小姐講過嘅嘢重覆一次。
『如果你願意答應當時人嘅要求，我可以當你第六個人嘅救贖完成。』
死神小姐手指住向我，佢竟然提出咁好嘅條件。
只要我應承，我就可以即刻完成第六個人嘅救贖，而我亦唔使去大費周章幫助阿Yan，更快去救贖埋第七個人，取回記憶，完成任務。
『老實講，既然當事人都唔想被你救贖，咁你就無謂再做無謂事。反正佢講得啱，並唔係個個人都值得拯救，而且你唔係因為Cathy嘅事情而對佢懷恨於心咩？呢個係一個好機會，放棄佢，對佢對自己都有利。』死神小姐就好似惡魔咁慫恿我。
「一單還一單，佢的確對Cathy做過過份嘅事情，但我唔會放棄佢！」
如果阿Yan做過啲事係令我憎恨到佢入骨嘅話，可能我會選擇放棄佢，到現階段嚟講，就算佢對Cathy做過過份嘅事情，我唔覺得要對阿Yan見死不救。
我唔清楚無法被救贖嘅人下場會點，可能會灰飛煙滅，或者一世困於自殺輪迴之中，但佢哋嘅心靈一定會承受極大痛苦。
無論點都好，都要將阿Yan從痛苦之中拯救出嚟，填滿佢內心嘅空洞。
死神小姐忽然大笑起嚟，『你竟然為咗佢而唔要呢個機會？如果呢刻選擇放棄佢，你唔單止可以快啲完成任務，取回記憶，重可以快啲見返小妹妹。』
「妳知道小妹妹嘅下落？」我驚訝地問。
『嗯哼，我當然知，只要你完成任務，就可以知道所有嘢，搵返你最愛嘅妹妹。』
最愛嘅妹妹……果然，小妹妹就係我妹妹！
我好擔心小妹妹嘅安危，我好想知道一切嘅真相，我好想將小妹妹擁入懷中……只要我選擇放棄，就可以更快邁進事情嘅終焉！
但我嘅回答係……
「我唔會放棄救贖阿Yan。」
無論係死神小姐，定係阿Yan，均以驚訝嘅眼神望住我。
『你講真？』
「係，我會竭盡所能將阿Yan救贖。」
死神小姐沉思咗幾秒，然後忽然大笑起嚟。
『哈哈！我對你刮目相開！既然你選擇咗，咁你即管去嘗試啦！』
死神小姐留下呢句，就消失喺我哋兩人眼前。
「咁樣好咩……你都有自己嘅嘢去做，而且我講過……我根本無可能得到救贖，你咁樣即係浪費自己嘅時間啫！」
「妳唔好再咁多廢話，時間無多！」
我拖起阿Yan嘅手，拉住佢跑去一個地方。
「將不可能變做可能係我嘅宗旨。」我笑住同佢講。