【自殺之後，我遇見死神小姐】救贖七個自殺者的故事: Case 6 得到惡報的扭曲之人—(38)
我企喺校門面前，心裡諗住小妹妹會無啦啦彈出嚟，同我講係呢個係佢嘅惡作劇。
但小妹妹無出現。
啱啱從學校地下同阿Yan上到五樓為止，小妹妹一直跟住我隔籬，但我去問人阿Yan自殺嘅線索時，卻忽略咗小妹妹，連佢幾時唔見咗都唔知。
如果小妹妹係去咗校舍第二度，我啱啱大叫嗰陣佢應該聽到，但佢依然無出現。
我腦海完全無線索話畀我知，點解小妹妹會無啦啦唔見，同埋小妹妹去咗邊度。
完全無方向點樣搵小妹妹……
方向……線索……地點……經歷……！
有一個地方可以瞭解到小妹妹嘅經歷，亦係唯一一個我所知道小妹妹事情嘅地方！
我馬上出發到嗰個地方。
我到達目的地嘅門前，從褲袋中拎起不規則嘅萬字夾，扭成其他形狀，插入門鎖中，將門打開。
眼前嘅景象依然無變，殘舊嘅傢俬鋪上滿滿嘅灰塵，當日嘅垃圾依然原封不動擺咗喺度，甚至多咗幾隻蚊飛嚟飛去，隱約聞到啲臭味。
呢頭家，睇嚟當日之後就無人返過嚟。話唔定喺我嚟之前，已經好耐無人喺度居住。
呢度係我當日扔低小妹妹之後，同佢再次遇見嘅地方。
呢度亦都喺小妹妹記憶中嘅其中一個地方，係同小妹妹有關連嘅地方……或者就係小妹妹嘅家。
屋內所有房門都係打開嘅狀態，係我當日嚟搵小妹妹時將所有房門打開，屋內情況一覽無遺，小妹妹並唔喺呢間屋度。
我望向兩間房間，其中一間入面有張雙人床，另一間房係碌架床。我望向碌架床嗰間房，記起原本應該有筆錢喺入面。
係小妹妹引導我嚟呢度，我先幫達叔搵返佢筆錢。
但我唔清楚達叔、小妹妹、偷達叔錢嘅嗰個人，同筆錢有咩關係。
我伸出手摸木櫃，手指沾滿上灰塵，殘舊嘅霉木味傳入我鼻中，但我唔覺得臭，反而早就習慣咗呢道味道。
呢個大宅係小妹妹回憶嘅其中一部份，同時我對呢個大宅有好熟悉嘅親切感。
呢個大宅，都係我回憶嘅一部份？
木櫃上面有啲殘舊嘅玩具擺設，一睇就知舊時士多賣嘅便宜假貨，重有一支支嘅酒放喺木櫃上。
一件熟悉嘅物品映入眼前，係放喺木櫃上嘅音樂盒。我扭動音樂盒嘅發條，再次播放音樂。
今次我更留心聆聽呢首音樂，一開頭嘅旋律有啲憂傷嘅感覺，但慢慢節奏加快，而且變得浪漫起嚟，音樂盒上嘅兩個人形木板就好似透過音樂表達出佢哋嘅心情。
佢哋嘅憂傷，佢哋嘅快樂。
等等……呢首音樂，我聽過！
喺學校設計室門口望向啲學生拎住手製嘅音樂盒時，眼前忽然浮現咗個情景！我喺學校門口等待個女仔放學，個女仔整咗個音樂盒畀我！
無論係外型，定係播放嘅音樂，都同呢個音樂盒一樣！
點解……點解會咁……？
小妹妹，就係我妹妹？
我拎住音樂盒，入去當日我同小妹妹相遇嘅房間，裡面有一張碌架床同木書檯。碌架床嘅床單同枕頭好殘舊，而書檯亦早已補殘守缺。
書檯上放著幾個殘舊嘅M記玩具，同埋一堆塗鴉過嘅白紙。我放低音樂盒，翻閱白紙，每張白紙都有唔同嘅內容，有意義不明嘅塗鴉，有喺紙筆玩嘅小遊戲，重有好多係人像嘅畫。雖然啲人畫得臉形扭曲，身型唔啱比例，但好清楚見到係一男一女。
雖然我對呢度毫無記憶，但我感覺到呢度嘅事物載滿回憶。
既然係咁，你哋可唔可以同我講小妹妹去咗邊？
就喺我咁諗嘅時候，我頭忽然一痛！我揜住額頭，強忍住劇痛。
「喂！睇我帶咗啲咩嚟！」我揭開草叢，鑽入草叢後方一個小空地。
「係咩嚟㗎？」妹妹早就坐喺小空地等緊我。
「嗱！妳睇！」我將手中嘅M記玩具拎出嚟，係一隻上鏈先識郁嘅斑點狗，不過外表睇落十分殘舊。
我扭動發條，然後將斑點狗玩具放落地上，等佢自己郁。但放落地上之後，斑點狗玩具依然留喺原地唔識郁。
「咦……點解會咁……」我嘗試上多次發條，但斑點狗玩具依然唔識郁。
我鬱鬱不樂望住件玩具，難得先喺人哋手中拎到件玩具返嚟，但原來係壞。
但妹妹反而露出開心嘅表情，將斑點狗玩具捧喺手中，講：「唔緊要啦！呢隻狗狗好得意呀！多謝哥哥！」
見到妹妹露出開心嘅表情，我就感到安心。
「我哋下次可以帶埋狗狗嚟呢個秘密基地。」我講。
「好呀！好呀！有埋狗好玩啲呀！」妹妹天真燦爛地笑道。
「呢度以後就係我哋嘅秘密基地，無人會再騷擾到我哋！」
我撥一撥地下嘅沙石，然後坐落地上，從書包拎咗啲紙筆同鐵盒出嚟。
「今日老師教我哋寫時間錦囊，所以我帶咗紙筆嚟。」
「咩嚟㗎？」妹妹歪頭問。
「老師話將自己嘅願望寫落時間錦囊度，裝落個盒度然後將盒埋咗去就得喇！」
「我要寫！我要寫！」妹妹雀躍地講。
我遞紙筆畀小妹妹，然後一齊將我哋嘅願望寫入時間錦囊中。
「妳寫咗咩呀？」我偷睇小妹妹嘅時間錦囊。
「唔得！哥哥唔睇得！」妹妹將自己嘅時間錦囊收起。
「點解呀？最多我畀妳睇返喇！」我遞我個時間錦囊畀妹妹。
「唔得！總之唔得就係唔得！」妹妹堅決唔畀。
「嘖！唔睇就算！」我收返埋自己嘅時間錦囊。
我哋寫完之後，將時間錦囊放入鐵盒，然後埋喺土中。
「十年之後，我哋再嚟呢度打返開嚟睇，睇自己嘅願望有無實現到！」我講。
「嗯！」
埋完時間錦囊之後，我哋喺呢個秘密基地玩咗大半日，玩到身水身汗，玩到天昏地暗。
我哋除咗斑點狗玩具，就無其他嘢玩。即使如此，我同妹妹依然玩得開心，開心唔在於我哋玩嘅嘢有幾好玩，
而係只要妹妹喺我身旁，我就會感到開心。
「天黑啦！我哋……係時候返去……」時間過得太快，我唔捨得啱啱玩樂嘅時光。
「係呀……唔緊要啦！只要哥哥喺我身邊就滿足。」妹妹講。
「我都係。」我笑道。
「哥哥，可唔可以應承我一件事？」
「咩事？」我問。
「哥哥可唔可一直陪住我，永遠都唔會離開我？」妹妹用佢天真嘅眼神望住我。
「啊……但係妳都會有妳嘅生活，總有一日會離開我㗎。」
「我唔䎺！」妹妹搖頭扭計，「我唔要離開哥哥身邊！」
「妳都要結婚㗎嘛！唔通妳結婚之後重黐住我呢個哥哥咩？」我嘆氣講。
「咁我唔結婚就得啦！」妹妹靈機一觸道。
「咁邊得㗎？」
「總之我要留喺哥哥身邊！」妹妹堅決地講。
「好啦好啦！」
「真係嘅？」
「真呀！」
「咁勾手指尾啦！」妹妹伸出手指尾，我跟住伸出手指尾。
「我哋以後要永遠喺埋一齊，永不分離。」妹妹講，「講大話嘅人要吞一千支針！」
「好！」
我倆手指尾勾起，代表呢個誓言正式生效。
如果可以同妹妹永遠一齊，感覺都幾好……因為，
妹妹就係我嘅全部。
眼前場景返番嚟房間之中。
啱啱嗰段回憶……唔通就係我同小妹妹之間嘅回憶？
嗰種感覺，好真實。
我同小妹妹曾經有段咁美好嘅回憶，但點解我會自殺，點解小妹妹會死去？
嗰一日，發生過咩事？
如今我嚟到與小妹妹命定之地，但都無法搵到小妹妹嘅線索，唯一嘅方法係盡快完成救贖七人嘅任務，拎返我失去嘅記憶！
我將音樂盒拎起，打算放返原處……不過音樂盒係載滿我同小妹妹嘅回憶之一，我想再次細心聆聽觀賞多次呢個音樂盒。
我將音樂盒捧在手中，然後離開呢間大宅。