【自殺之後，我遇見死神小姐】救贖七個自殺者的故事: Case 2 與病魔爭鬥的少年—(10)

我同阿立離開醫院。

「多謝你，了結我最後嘅心願。」

「唔使，其實我都無做過啲咩，解開你心願嘅，係瞭解你一切嘅佢哋。」

「至少你將懦弱嘅我帶咗過嚟，如果唔係我都唔夠膽有面目去見佢哋。」阿立苦笑道。

「你唔懦弱。」





阿立露出驚訝表情，問：「點解咁講？」

「你望望個天空。」我指一指頭上蔚藍嘅天空，「你見到啲咩？」

阿立瞇起眼望住天空，「咪就係一片天空同太陽。」

我指一指天空某處，「其實重有個月亮，不過日頭嘅時候平常人難以見到，夜晚先會發光發亮，咁唔通你就判斷呢個月亮係唔光？每個人都會有懦弱嘅一面，但你亦有勇敢戰鬥嘅一面，就算最後放棄咗，並唔代表你係個懦弱嘅人。」

當望住太陽月亮時，腦海就好自然浮現呢段話。





阿立聽完之後，先係驚訝，然後露出意味深長嘅微笑。

突然，我感到身體力量被抽空嘅感覺，就如上次幫完Cathy之後一樣，而阿立停咗咁望住我。

「你……」阿立驚愕地望住我。

「無事……唔使擔心我，應該每次都係會咁。」

阿立身體發出金黃色光芒，逐漸化為光點，慢慢飄上天空。





「引導者先生……」

「嗯？」

「多謝你帶我見證我所選擇最後嘅結局，我唔知我所選擇嘅路係咪啱，但你一定要幫自己搵出正確嘅答案！」阿立飄喺空中微笑道。

答案……？阿立係想我幫佢搵出對生命正確嘅答案？

我未來得切問佢，佢已經消失喺我眼前。

我再次幫助一個人達成心願，突然有種空虛嘅感覺。



肚子有啲餓，我行過街口，隨便搵間餐廳食個飯醫下肚。





從一開始，呢個救贖任務就有啲奇怪，點解其他自殺者唔需要做，淨係得我一個要咁做？點解，死神小姐要我救贖七個人，真係字面上咁解，令我可以脫離自殺輪迴？

既然係咁，點解要到我完成任務，先將我消失嘅記憶還返畀我？

我開始對呢個救贖任務感到疑惑，同時暗地裡感覺到呢件事同我有千絲萬柳嘅關係。

「哎吔！」

一把女聲傳出，有個大約一米五嘅女仔喺我面前跌低。啱啱諗嘢諗得太入神，唔小心撞跌咗個小妹妹。

小妹妹嘟起嘴巴，眼神無辜地望住我，唔知點解我竟然覺得佢個樣好萌。

「妳有無事呀？」我慢慢扶起小妹妹，小妹妹無出聲。





小妹妹身型瘦削，身穿校服，款式同Cathy差唔多，不過係藍色格仔裙，再外搭件米白色嘅冷背心。

我見小妹妹無回應，又無咩事，於是直行直過繼續搵餐廳。

大概過咗兩個街口，搵到間睇落比較抵食嘅餐廳，諗住入去時，我發覺有人扯緊我衣角。

「哥哥，我蕩失路呀！」係啱啱個小妹妹。

「吓？！」