【自殺之後，我遇見死神小姐】救贖七個自殺者的故事: Case 2 與病魔爭鬥的少年—(9)

阿立仰望住白茫茫嘅天花，

「咁樣就好……多謝你帶我嚟見佢哋，果然我係無辦法得到佢哋嘅原諒。」

阿立轉過身，準備離開。喺轉身嘅一刻，我見到阿立眼角有點淚光。









原本打算離開嘅阿立，聽到一句話，令佢停留喺原地。

「姐姐……我，從來無怪責過哥哥自殺。」

阿立愕然地望住細佬。

細佬企起身，抹去臉上嘅淚痕。

「我知道㗎，我知道哥哥一直好努力，我只係埋怨自己，點解無睇穿到哥哥嘅大話，無明白到哥哥嘅感受，哥哥為咗我哋唔好擔心，扮作好堅強，但實際上佢一定係非常痛苦！每次我見到哥哥偷偷去廁所嘔，哥哥趁我哋唔為意露出嘅痛苦表情，之後向我們擺出副好堅強嘅樣，我重天真以為哥哥頂得順，無睇穿佢面容下嘅真相！」





此時此刻，阿立再忍唔住，眼淚緩緩流下，望住細佬，佢既感動又內疚，佢估都估唔到，細佬竟然道出呢番言語。

「點解……佢一直都唔肯同我哋講？」阿瑤愕然地問細佬。

「哥哥唔係唔想同我哋講，而係唔可以同我哋講，因為每次我哋探佢時，都會擺出一副積極嘅樣去鼓勵，佢驚破壞我哋嘅期望，驚我哋會擔心，所以就只好一副堅強嘅樣面對我哋！所有嘢都唔係哥哥嘅錯……我怪嘅就只有自己！」

「唔通你就唔怪我，無遵守到約定咩？」

雖然阿立嘅聲音並無傳入細佬耳中，但細佬彷彿知道阿立就喺隔籬一樣回應。





「就算佢自殺，我都唔會怪責佢，哥哥由細到大都為人著想……所以，所以呢次佢為自己著想，我都唔會怪佢。哥哥並無做錯，一切嘅錯都係病魔嘅錯！就算佢依家已經唔喺度佢堅強戰鬥嘅證明，就存活喺我嘅心中！」

細佬掛住紅腫嘅雙眼，展現出如同陽光一樣燦爛嘅笑容。

「細佬……」

「所以姐姐妳都唔好咁傷心，如果哥哥見到嘅話，佢一定想我哋開開心心，連埋佢嗰份開心落去！」

細佬伸出拳頭對住少女，少女用不敢相信嘅眼神望住細佬，大概無估到原本安慰嘅對象，調轉頭講啲咁正面嘅說話，安慰自己。

原本以為細佬應該會好痛恨哥哥無遵守到約定，但佢由頭到尾都無埋怨過哥哥。

阿瑤望住細佬，然後破涕而笑。

「係……連你呢個細佬仔都咁識諗，我做大人嘅點可執輸……」阿瑤抹去臉上嘅眼淚，「我唔應該再沉醉於悲傷之中……我會用我嘅雙眼，代阿立去睇美好嘅將來。」





佢哋二人喺呢刻，就算眼睛紅腫，淚流滿面，仍撐起燦爛嘅笑容，積極面對現實。

雖然呢個笑容可能係臨時撐出嚟，返到屋企後望住以前嘅想，諗起以前嘅回憶，依然會攬住張被大哭一場，但至少佢哋踏出咗第一步。

「我講過喇，佢哋一定會明白你嘅心意。」我打從心底微笑道。

「多謝……多謝細佬，多謝阿瑤，多謝你哋！」阿立低頭哭泣住，我輕輕搭住阿立嘅膊頭。

身邊重要嘅人離逝，沉醉於傷心之中乃人之常情，無可能一時三刻就可以企返起身，至少要經過時間嘅洗禮先可以復原。

但至少喊完，傷心完，就要嘗試企起身，唔可以原地踏步，沉醉於悲傷之中。哪怕再一次跌倒都好，跌到滿目瘡痍也好，都要嘗試。

無法振作，唔單止會成為面前嘅障礙，更會成為對逝者嘅侮辱，因為逝者已經燦爛地活下人生最後一頁。





逝者作出呢個選擇嘅話，咁活著嘅人要做嘅，並唔係埋怨逝者點解要咁做，而係尊重逝者最後嘅選擇，俾佢哋嘅人生可以完美地蓋下最後一頁。

「雖然你已經死去，但你並無離佢哋而去。」我指一指阿立嘅心口，「你仍然活於佢哋心中。」

佢哋流下嘅眼淚，唔係源於悲傷，而係源於生命帶來嘅光輝。

佢哋嘅笑容，代表住希望，替死去嘅人邁向人生新階段，完成佢哋未能達成嘅夢想。

我以為人死後留下嘅，係悲傷同悔恨。

的確，樹葉總有一天會從樹上掉落地上，但唔代表佢已經毫無價值。樹葉將回歸大地，作為肥料，然後孕育出更高更壯嘅大樹。

容許我糾正一下自己嘅講法。









人死後留低嘅，係生命帶來嘅吶喊，以及逝者傳達畀生者嘅思念與希望。

逝者嘅思念與希望，將會推動生者前進，走出更美好嘅人生。