【自殺之後，我遇見死神小姐】救贖七個自殺者的故事: Case 1 憧憬希望的絕望少女—(2)
我依照住死神小姐嘅指示前往目的地。
因為唔知黑衣少女嘅真正身份，所以叫住佢死神小姐先。佢個樣既唔似和善嘅天使，又唔似無惡不作嘅魔鬼，似乎死神對佢嚟講係最恰當嘅暱稱。
目的地係呢條街道某棟唐樓樓下。
街道有點殘舊，兩旁都係舊式唐樓建築同店鋪，舊式街道嘅建設，有啲雜物喺街道旁，係典型嘅舊式街道設計。呢度鳥無人煙，無咩特別，得幾間店鋪做緊生意，同埋有幾個阿婆阿伯喺街道上。
突然，我感覺到有股吸引力，嘗試呼喚我去某一個地方，我順應住嗰道引力，沿住街道繼續前進。
行到某條街道，嗰股引力就消失咗。喺我眼前嘅係空無一人嘅街道，街道上一間店鋪都無開，只有幾架貨櫃車泊咗喺馬路。
除咗離我不遠處有個少女企咗喺某棟大廈下。
我感覺到，呢個少女係我要搵嘅人。
少女紮起秀亮長髮，身穿白恤衫同格仔裙，胸前打個蝴蝶結，再外搭件深藍色冷衫，一雙高筒白襪，係典型嘅中學校服嘅服式。
望住少女嘅打扮，我不自覺就靠近。佢有一對水汪汪嘅雙眼，皮膚白滑得嚟有少少瑕疵，有青春嘅感覺得嚟又有種清純氣質，可愛之餘瘦削嘅臉頰同身型令人萌生憐愛感，如同鄰家女孩一樣。
有如此美貌嘅少女，單靠樣貌應該可以得到好多嘢，朋友、追求者、錢，無一會缺少。
呢種女仔根本就唔似會係自殺嘅人，
如果我無睇到佢嘅眼神嘅話。
雖然死神小姐無講過自殺者嘅外貌，但憑我直覺我肯定，佢就係第一個自殺者。
既然遇到自殺者，下一步我應該點做好呢？我心裡卟通卟通跳起來，要同一個唔認識嘅自殺者講嘢有種尷尬嘅感覺，特別眼前嘅係一位外貌不俗嘅少女。
死就死啦！
我慢慢走到去少女面前，而佢都好似察覺到我嘅接近，同我對視一眼之後，視線又從我身上移走，望向街道風景，彷彿當見唔到我咁。
係喎！而家我係人，佢係鬼，正常人應該係睇唔到鬼，所以佢都以為我睇到佢。
我向佢揮一揮手，嘗試引起佢反應。但無反應，於是我又係佢面前撻手指，佢都係無反應。
「Hello！小姐。」我直接叫佢，連續叫咗幾聲，到第四聲時佢終於肯轉過頭望我。
佢定格咁望住我，眼神充滿住疑惑，於是我再叫多句：「小姐，我叫妳呀，唔好望風景住。」
「你……見到我？」佢訝異地望住我。
「係呀，我見到妳呀。」
「你係……咩人？」
「我係嚟救贖妳嘅人。」
「……救贖？」
「嗯，救贖。」
我講完呢句之後，少女呆咗呆，然後突然眼泛淚光，好似想喊咁嘅樣。
「喂！等等！唔好喊住，我係咪講咗啲咩錯嘅嘢？」
少女搖頭，雙手抹去眼淚。
「無嘢，我只係無諗過真係會存在。」
「咩真係會存在？」
「天使……」少女笑道，「我一直相信，如果世界上有天使，佢一定會幫助有需要嘅人。」
「啊……」我急忙揮手道，「我並唔係天使嚟。」
「咁……你係……？」
「我……無咩特別身份，純粹係嚟幫妳嘅人！」
「點解你會嚟幫我嘅？」少女歪頭問。
「呃……無咩點解，人死咗之後總會有放唔低嘅嘢，而我就係嚟負責幫妳完滿心願，令妳對呢個世上再無牽無掛。妳有無咩心願，或者有咩嘢係放唔低，可以同我講，我會幫妳了結去。」
「吓！你咁一時間問我……」少女將手指放喺下巴到思考，「我都唔知我有咩心願……有咩想做……」
令人頭痛了，最熟悉當事人嘅人莫過於當事人，如果連佢都唔清楚自己嘅心願，點幫佢完成心願呢？
唯一嘅方法……瞭解佢嘅過去，同自殺原因，或者可以俾我知道佢嘅心願。
「如果……唔介意嘅話，我想更加瞭解關於更多妳嘅事，妳介唔介意話畀我知？」
「啊？感覺上你好似溝女咁。」少女笑道。
「唔係呀！我唔係講笑㗎！我係為咗完成妳嘅心願而嚟，如果幫唔到妳完成最後嘅心願，我就會一直跟住妳。」
「咁呀……」少女低頭思索，「真係一定要講？」
「我純粹想嚟幫妳，並無惡意。但如果呢刻妳唔想講嘅，可以唔講都得，我唔會逼妳！」
我都唔知點解我會講啲咁矛盾嘅說話，明明我係想嚟幫佢，先知多啲有關佢嘅事，但見佢唔想講，我又唔忍心難為佢。
「我知喇！同你講都無所謂嘅，不過企喺條街到講好似好奇怪，無咩氣氛咁……」少女說完，突然笑起來，「哈哈！但係我好似已經死咗，都唔會有人見到㗎啦！」
「無所謂，妳想嘅話去邊度都得。」
「咁呀……」少女靈機一觸，「我……想去附近嘅商場！」
「附近嘅商場？」
「係呀！我會帶妳去行㗎！天使先生。」
「哈哈！都話我唔係天使！」我尷尬地說。
「咁我唔叫你天使先生，應該叫你咩好？」
「啊……」我自己都唔知自己叫咩名，「我都唔知應該點叫我好……」
「既然係咁，咁我就叫你天使先生喇！你咁好人嚟幫我，對我嚟講已經如同天使一樣。」
「真係無妳乎，妳鍾意叫我天使先生就天使先生啦！」
「係嘅！天使先生。」
喺呢一剎那，少女展露出燦爛嘅笑容，我心頭突然一緊。既然佢選擇咗自殺，咁佢一定有啲好痛苦嘅經歷，點解佢重可以咁開心咁笑？
我重以為，我去救贖自殺者，佢哋只會以負面嘅心情去講述令佢絕望到要自殺嘅生前經歷，或者以解脫嘅心情去講述自殺嘅緣由，而唔係好似少女咁，以燦爛笑容訴說想去其他地方玩。
呢個笑容背後，究竟隱藏咗啲咩嘅痛苦……
「天使先生可唔可以拖住我行？」少女低頭，就好似一個羞澀嘅少女向我伸出手。
「無問題。」
望見佢開心嘅神情，同佢自殺者嘅身份兩者對比，我感到心酸嘅感覺，萌生出想盡可能滿足佢嘅情感，手就好自然放在佢手上，握緊少女嘅手……
咦？點解我握到佢隻手嘅？
明明佢係鬼魂，我係人，我應該掂唔到佢。雖然掌心並無傳來溫度，但我望住眼前呢雙互相握緊嘅手，卻係確確實實握住佢隻手……
唔通我可以接觸到鬼魂？或者作為救贖自殺者嘅人，呢個係死神小姐特賦畀我嘅體質，不過我已經唔覺得驚訝，反正從醒嗰刻遇到嘅所有嘢已經唔出奇。
「妳叫咩名呀？」我問。
「我叫Cathy呀。」
「Cathy，我叫……」正當我想自我介紹時，我先記起我連自己叫咩名都唔知。
「你係天使先生嘛！」Cathy水靈雙眼望住我，然後會心一笑。
「係……我係天使先生。」我苦笑道。
天使先生……我只不過係個同妳一樣，都係自殺者，點會配得起呢個稱號呀！
不過，如果呢個世界上真係有天使嘅話，Cathy嘅眼神就唔會蘊含咁深嘅憂郁感。
除非天使嘅存在唔係為人類帶嚟幸福。
儘管如此，我希望今日可以暫時成為Cathy嘅天使。