【自殺之後，我遇見死神小姐】救贖七個自殺者的故事: 序—(1)
有無諗過，嗰啲自殺嘅人，死咗之後會去邊度？
天堂？
地獄？
答案係兩者皆否。
自殺嘅人，既唔會上天堂，亦唔會落地獄。佢哋嘅靈魂會留喺人間，每日都重覆住自殺嘅情景，作為輕視自己生命嘅代價。
呢個情景，稱之為——自殺輪迴。
自殺輪迴並唔會有終結嘅一日，自殺者需要永遠承受自殺嘅痛苦，無投胎嘅機會，始終不能解脫。
除非……
還清生前所有罪孽為止。
－－－－－－－－－－－－－－－－－
唔……
頭好痛……
我打開雙眼，映入眼前嘅係一大片蔚藍嘅天空。我坐起身，望下周圍嘅環境，呢度係大廈嘅天台。
發生咗咩事……呢度係邊度……唔！當我一回想，額頭突然痛起嚟。
『你醒喇？』一把女性聲音由我後面傳出，我轉頭一望，喺我眼前係一個身穿黑色低胸連身裙嘅啡髮少女，打扮十分性感，翹起腳飄浮喺空中。
「呢度係……」
我揜住額頭，嘗試去回想返發生咩事……但係咩都記唔起……並唔係記唔起點解自己會喺度，而係一切一切……都好似記唔起一樣……
黑衣少女瞇起雙眼望住我，似乎佢係唯一可以解答到我嘅人。
「發生咩事……同埋妳係邊個？」
『啊哈！你重好意思問發生咩事？』黑衣少女掛起意味深長嘅笑容。
「吓？」
『你呢……』
『已。經。死。咗。喇』
「我死咗……？我係點死㗎？」我再試圖回想返發生咩事，但依舊毫無印象，點諗都諗唔起。
我試下搣自己塊臉，如果我係活人嘅話應該會有感覺。
但係我毫無感覺。
『你真係想知？』黑衣少女飄過來我面前，距離唔夠十厘米，臉上淡淡嘅黑色眼影，微粉嘅臉頰，鮮紅色嘅嘴唇，一一映入眼前。明明喺我眼前嘅係一副傾國傾城嘅臉貌，但我卻感到股陰冷嘅寒意。
佢指一指地下，嘴角上翹，講：『聽實喇……』
『你。就。喺。呢。座。大。廈。跳。落。去。自。殺。死』
我聽完之後，只能呆木若雞站在原地。
我有一刻未能相信佢嘅話，繼續嘗試去回想，但係記唔起任何事情。點解我會自殺，發生過咩事，甚至我係一個點樣嘅人，我嘅名字……通通我都記唔起，就好似被人洗走哂記憶一樣。
況且，眼前呢個黑衣少女並唔係普通人，佢既能道出我已死嘅事實，又咁啱喺我隔籬出現，似乎並唔係故弄玄虛。
至少佢到依家仍然腳不掂地就係最好嘅證明。
「咁妳係死神定天使？妳係嚟帶我走？」我問。
『啊哈！死神、天使，抑或惡魔都無所謂，反正都係一個叫法。』黑衣少女向我嗤之以鼻，然後後退飄回上空，『既然你清楚依家自己嘅立場，咁我問你啊！你覺得，自殺死嘅人應該上天堂地落地獄呢？』
黑衣少女掛起意味深長嘅笑容，似乎好期待我嘅回答。
以耶教來講，自殺係一種唔容許嘅事，因為自殺就即係違背自然，剝奪性命嘅行為，至少已經犯下謀殺罪，如此罪大惡極嘅罪行，應該落地獄先啱。
但係一個人上天堂定落地獄並唔應該係以單單一件事嚟判斷。比喻說有個人曾經殺過人，但佢曾經救過好多人，做過好多善事，甚至功大於過，佢重應該因為殺過一個人而要落地獄。
又或者，如果有個垂死嘅病人，每天承受住劇烈嘅痛苦，而且命不久矣，咁最後點都係死，自殺令自己早啲解脫嘅話，唔通又係一種罪？
判斷係上天堂定落地獄，並唔應該睇單單自殺呢件事，而係睇一個人一生嘅功德而論，就好似以前啲道佛傳說，閻王會睇每位死者嘅一生功德，再判斷死者使唔使落地獄受罪。
既然係咁，我又應該屬於邊種人？
二揀一答案。一條簡單嘅問題，可能係純粹用嚟考下我，亦有機會係我答邊個選擇，我就會去邊度。
但係我而家嘅失憶狀態，莫過我嘅一生，連我細個有無踩死一隻螞蟻都不得而知。既然係咁，唯有憑直覺揀個我覺得最接近嘅答案。
「地獄。」
反正做人唔好咁自負好。
當我答完，黑衣少女微微一笑，揮動食指。
「咁即係天堂？」
當我滿心期待，以為有得上天堂，見下所謂嘅伊甸園時，黑衣少女突然大笑起嚟，重要係大聲嘅恥笑。
佢嘅恥笑令我感到面紅耳赤，真係想搵窿瓹。
黑衣少女笑完後，飄上空中，一臉冷笑地道：『你就想！好似你啲咁嘅人想上天堂？答案係兩者皆否呀！既不上天堂，亦不落地獄，而係——』
黑衣少女神情突然認真起來，
『進入自殺輪迴，每日重覆自殺嘅情景，永遠承受自殺嘅痛苦。』
自殺輪迴……？當我聽到呢四隻字時，我重未明白到個意思，但當我將個情景幻想出嚟，先明白其可怕性……如果我係跳樓死，即係我每日都要由咁高嘅大廈天台跳落去，一定好痛……我並唔知道自己嘅死狀係點，好彩嘅話就爆頭粉身碎骨死，唔好彩嘅話吊住半條人命痛苦地死去……
黑衣少女見我驚青嘅樣，露出玩味嘅笑容。
『呢個係對自殺者嘅懲罰，身為帶罪之人，為咗逃避罪孽而自殺，從你自殺開始呢，就要永無休止承受自殺嘅痛楚。呢個係對自殺者嘅懲罰，同生前嘅功德毫無關係，除非……』
「除非咩嘢？」我急不及待去問。
『除非……你贖去自己嘅罪孽。』
黑衣少女舉起「七」嘅手勢，咬起嘴唇，
『救贖七個自殺嘅人。』
「救贖……？」我問。
『有七個人同你一樣自殺而死，佢哋死後心願未了，而你要去救贖佢哋，當完成到第七個嘅時候，你就可以恢復記憶，脫離自殺輪迴。』
「點樣救贖？」
『佢哋同你一樣都係自殺者，所以死後都會進入自殺輪迴，進行永無止境嘅自殺。不過如果你願意去救贖哂佢哋既話，唔單止可以令佢哋等到救贖，脫離自殺輪迴，而你亦可以贖去你嘅罪孽，一同脫離自殺輪迴。』
聽落唔係咩刁鑽事情，但我腦海中仍然有個疑問。
「點解大家同為自殺者，我需要去救贖佢哋，而佢哋只需要等我嘅救贖？」
黑衣少女皺起眉頭，露出猶如見到蛆蟲一樣嘅厭惡嘅表情，低沉地講咗句：
『依家你無選擇權，你只可揀去將七個人救贖，又或者日日喺度跳樓。』
黑衣少女嘅表情有啲可怕，似乎我無選擇嘅權利。
「好好好……咁救贖嘅意思即係點？」
『既然話佢哋心願未了，咁救贖就梗係幫佢哋達成願望，令佢哋對世上再無依掛。』
滿足佢哋嘅願望，似乎係不得了嘅麻煩事，不過事到如今，我都無拒絕嘅權利，只好跟隨住佢嘅意思去做。
「好，咁我而家要點做？」
『我會同你講佢哋魂魄所在嘅地點，你過去自然會知。』
黑衣少女好似魔術師咁食指空揮打圈，然後指過來，我感覺到原本虛無縹緲嘅身體開始有種實質嘅感覺，感受到大氣嘅溫度，感受到微風吹碰皮膚嘅感覺。我搣下自己塊臉，果然有感覺，係真正嘅身體！
黑衣少女左手抱胸，右手撐頭一邊思考一邊道：『啊哈……睇下先，第一個自殺者，好近……就喺呢度附近一棟大廈樓下。好喇！即將要去救贖第一個自殺者啦！』
除咗我之外，重有七個自殺嘅人，佢哋都有著唔同嘅故事，唔同嘅自殺理由。
第一個自殺者，究竟係一個點嘅人？
『出發喇，自殺者。喺救贖七個自殺者同時，好好反思一下人生。』
『直至你還清所有罪孽為止。』