［回憶］［校園］一個信息改變左我嘅中學生活: 續（三十四）負心

阿妍？呢個名好似好熟咁，係咪都係一樣讀6A班架？阿心托住個腮好認真咁回憶返呢一個名。
我醒起啦！係咪嗰個戴眼鏡，塊面好圓，同我差唔多高嗰個啊？我仲記得佢有一個特徵架，死啦，一時醒唔起添。阿心對住我自言自語。
我心入面諗：雖然阿妍留比我嘅記憶比唔上阿心嘅十分之一，但估唔到依家我連佢個樣都唔太記得，咁我係咪好負心呢？曾經嘅一段戀情，依家竟然樣都唔記得⋯⋯
假如有一日，我忘記哂所有同阿心嘅野，咁會點呢？
如果記憶可以選擇嘅話，咁幾好啊啦。我好感慨咁對住地下講。
算啦，都唔係咩重要野姐，唔洗咁執著啦。知道左咪得囉。依家最緊要係幫我搵一份工啊，咁樣你先有得讀大學架。我好坦白咁對住阿心講。
阿心聽完就擺出左一個好明白嘅樣，但眼神睇得出對我嘅質疑不斷增加。尷尬之下，我嘗試令到阿心唔好打開我嘅回憶錄。我以為呢個問題可以平息嘅時候，阿媽突然好多口咁講左句：好似幾得意喎，咁你地兩個點識架？
呢句野大大咁刺激左我嘅反應，我眼角睇一睇阿心嘅表情，見佢咁啱打緊喊路聽唔到阿媽講咩，於是我亦都學佢一樣，扮聽唔到阿媽聽咩，然後閂埋房門。
眼見身邊咁多嘅煩惱纏身，我好快咁上左床打算訓醒先再諗點算，唔訓由自可，一訓就發生左啲我都估唔到嘅野。
「阿銘，你覺得我地兩個可唔可以一生一世啊啦？」




「 對唔住啊，我諗唔可以應承你啊。」