［回憶］［校園］一個信息改變左我嘅中學生活: 續（三十三）阿妍

做咩會全部人無視我？明明我未去廁所之前好正常架喎！
喂！阿心，應下我啊！
阿媽，你出句聲啦！ 我好無助咁係原地大叫。
我忽然靈光一閃，會唔會因為阿心嬲左我唔肯直接同佢講？無理由啊，明明我就扮哂肚痛喎。我心入面出現左好多嘅問號。 照咁睇，應該都係因為我件事架啦，唯有搏一搏睇下可唔可以單車變摩托啦。係個一刻，我一下拍左去枱面。啪！
輕微吸引到阿心嘅注意，之後再沖過去一下攪實佢。阿媽同埋阿心都嚇到眼都大埋，而我亦都模仿韓劇嘅情節，一下就嘴大左落阿心塊面，再我浪漫咁講一句：對唔住，阿心。我唔應該避開個問題，我依家就同你講清楚啦。
一講完呢句，阿心好似被我深深咁感動左，對眼含情脈脈咁望住我講：原本我係好嬲架，不過見你咁有心機氹翻我，姑且原諒你一次啦。
呢段嘅對話，即使講得無熱戀嘅情侶咁肉麻同真摯，但係我地兩個都好似返到初初相識嘅時候嘅一份感覺。
我同阿心一齊坐係梳化上面，開始解釋呢段我最難捉摸嘅感情。阿心，你仲記唔記得五年前，我地迫住兩個要分手個陣嘅野啊。 係分手個陣，我完全接受唔到，我為左呢件事亦頹左好耐。估唔到中三開學，就有個人插班入黎。最先開始，我對班上面嘅野都已經毫無興趣，但個女仔一開口，就係佢自己介紹嘅個一秒，我立即所有精神要翻哂黎，因為我聽到佢用一把同你好似嘅聲，講出：大家好，我叫阿妍。呢六個字。而係嗰一刻，我已經將佢代入左你嘅身份。