天使原來是男生（舊名：魯莽天使）[小甜][變身][男變女][籃球]: 41
~「...早晨呀...表姐。」一去到m記就見到表妹好鬼精神咁坐左喺度喎。
「…嘩...表妹你...竟然冇遲到，仲要咁精神咁嘅...。」我好愕然咁講。
「...咩喎，我成日遲到架咩...。」表妹整左個金魚咀咁講。
「…er....唔係唔係。」我答佢。
表妹今日著左件白色薄羽絨下身就著左條牛仔褲，
側邊就放左個豹纹大喼係度。
而我呢，今日著左件連身裙加legging，外面再加件毛毛褸，
拖住個黑色細喼。其實我邊有喼姐，個喼係泳琳借比我嘅。
食緊早餐果陣我都不忘整理多次行李，睇吓有冇啲咩野帶漏左。
睇睇先...手提電話有...地圖有....仲有唔洗問屋企人借嘅無線電話添....嘻嘻，
再睇睇....最重要嘅特區護照同身份證都喺齊度啦。
吖....冇同大家講添....，本護照係上個月堂姐離食飯果陣整比我嘅，
當時堂姐連埋回鄉咭一齊比我，佢話遲吓我同老豆返福建都應該用得著喎，
所以整定比我，仲有今次台灣之旅都係佢幫我簽名我先去到架咋，
返到離一定要買返多啲手信孝敬吓堂姐先得。
好啦...所有野都帶齊啦。
「…喂...表妹你都check吓有冇帶漏野啦。」整理完之後，我問表妹。
「放心啦，出門口前拎哂出離check過哂啦。」表妹一路咬住個薯餅一路講。
我同表妹食完早餐之後，就各自拖住個
喼，慢慢行過去巴士站果邊等巴士啦。
巴士站已經好多人啦，全部都係等巴士返工嘅人，
我地兩個女仔拉住兩個喼幾經辛苦先攝到埋去搭機場巴士果個站位。
因為事前已經上定巴士公司個apps睇左個開車時間，
所以我地等左大約五分鐘左右，部機場巴士就準時到達啦。
我同表妹揪左個喼上車之後，就即刻將兩個喼放喺車門附近嘅行李位度，
可能因為我地樓下個站唔係總站啦，所以到我地上車果陣已經冇哂地下果啲行李位
，得返啲頂位。
「…嘩....咁高點揪上去喎。」表妹喺度叫緊救命。
事實又真係幾高嘅，就算我嘅高度可以掂到，
但係要將個咁重嘅喼揪上去都真係唔係咁易。
「...小欣....等我離啦。」正當我諗緊點將啲行李揪上去果陣，
一軍突然喺上層行左落離，可能佢啱啱喺窗口位見到我地上車啦。
其實呢，依班機場巴士就係喺一軍屋企樓下個巴士總站開出離嘅，
加上成半個鐘先一班車，所以撞到都唔算好出奇嘅。
「...咁唔該哂一軍哥啦喎，我地上去先啦...嘻嘻。」
表妹見一軍落左離幫手，所以一枝箭咁衝左上上層。
「...小欣...你都上去啦，我搞得掂架啦。」
一軍見我冇跟住表妹行上去，所以同我講。
「…er....咁....好啦...唔該哂。」好啦，
既然一軍幫手咁我就上去先啦。
一上到上層見到表妹已經坐左喺kimmy隔離啦。
「...嘻嘻...。」表妹同kimmy兩個仲要四萬咁口對住我笑。
咁我唯有坐喺佢地前面個咭位度啦。 之後一軍就上左離，順理成章就坐左喺我隔離啦。
「…食左早餐未呀...小欣，我有三文治喎。」
一軍喺個背囊度拎左盒三文治出離。
「...er...食左啦...多謝。」我微笑住講。
「…一軍哥...你地未食早餐架咩?...」坐喺後面嘅表妹問一軍。
「…er...阿妹囉，落左街行到去茶餐廳先話唔記得帶護照，
之後我返到去幫佢拎又唔知佢塞左喺邊喎，
結果搵左成半個鐘先搵得返。」一軍有啲悔氣咁講。
「…原來又係kimmy個懵婆。」表妹斜睥住kimmy講。
「…嘻嘻....對唔住囉阿哥...。」kimmy笑笑口咁講。
而家一軍坐喺我隔離，一手攬住個背囊，另一隻手就拎住件芝腿治喺度食緊。
「…得件芝腿治...夠架拿?...」我坐喺隔離細細聲問一軍。
「…ok架啦...一陣上飛機有飛機餐食架嘛。」一軍一邊食一邊講。
「...er...咁又係喎...嘻嘻。」我都唔知添，原來有飛機餐架。
我同一軍傾吓啲無聊野，好快就到左香港國際機場啦。
我地喺一號客運大樓落車，kimmy同表妹就即刻拎左兩部行李車埋離，
將啲行李放哂上去之後，一軍同我就一人推住一部車入去機場裡面啦。
嘩...原來香港個機場真係幾靚架喎，我咁大個仔都未搭過飛機架，
之前返福建都只係會搭火車。
我地跟住好清晰嘅指示，好快就搵到集合點，
中華航空嘅檯位。
離遠已經見到卜sir同miss cheung企左喺度，
因為今次交流團咁多女仔一齊去冇個女老師始終唔係咁方便，
所以搵左同樣喺教體育嘅miss cheung一齊去。
miss cheung呢，都係一個靚女離架，廿幾歲，
好似話啱啱喺體院畢業冇耐架咋，可能做開運動嘅關係啦，
身形真係fit到爆架，今次卜sir就發達啦。
「…早晨呀...，卜sir，miss cheung。」我地一齊講。
「...早晨。」佢地微笑住答我地。可能有miss cheung喺度嘅關係啦，
卜sir而家都即刻斯文左好多。
「...咦...原來我地最早到牙。」kimmy見周圍冇人，所以咁問。
「…唔係呀...倪同學，大部份人都到左架啦，不過見仲早，
佢地有啲就話周圍行吓，有啲就去左食早餐咋。」miss cheung同kimmy講。
「…哦...miss cheung牙，不如你叫我kimmy啦，
倪同學好似怪怪地咁呀...嘻嘻。」kimmy笑笑口咁講。
「…哦...原來你叫kimmy牙，好吖...咁我叫你kimmy啦，er...咁你地呢。」
miss cheung答完kimmy之後望住我同表妹講。
「...er...你叫返我地子欣同家蔚得架啦，miss cheung。」我同miss cheung講。
「…你係子欣...你係家蔚...ok記得哂。」咁多人miss cheung真係個個都記得咩?
「 ..咁子欣牙，你地跟我過去寄左行李先啦。」
miss cheung講完之後就帶左我地埋檯位寄行李啦。
冇左個喼喺度陀手褦脚個人即刻輕鬆哂。
原來我地班機十一點鐘先起飛，但係而家連九點鐘都未到，
所以我地就諗住係機場四圍行吓啦。
機場依度呢，比我想像中大呀，咩野舖頭都有，所以就算早到左咁多都唔怕會悶嚫呀。
當我地經過左間大快樂果陣，我見到一軍喺度望緊掛喺牆上面果啲餐牌喎。
「...不如入去食囉。」我開聲講，
因為我見到一軍個樣就知道頭先件芝腿治根本就唔夠一軍攝牙罅。
「...阿嫂你未飽咩?...」kimmy問我。
「...er...係呀，不如你同家蔚行吓先啦，一軍陪我食咪得囉。」我講。
「……er...咁好啦，一陣見啦。」kimmy講完之後就同表妹繼續行。
而我呢，就捉住一軍行左入大快樂入面啦。
「...er...小欣...乜你肚餓咩?...」一軍好疑惑咁問我。
「...唔係我肚餓，係有人肚餓。」我瞇起對眼同一軍講。
「…哈哈...小欣，比你發現左添。」一軍而家一隻手拗住頭...笑笑口咁講。
「…傻佬...，買野食啦，我過去搵定位等你啦。」我講。
「...嘻嘻...唔該你呀...小欣。」一軍講完之後就行左埋去櫃檯度買野食啦，
而我呢，就搵左個冇咩人嘅位置坐低左。
一軍好快就拎住盆野食返離啦，佢買左滑蛋魚柳再加個火腿通粉添...
男人嘅食量果然係唔同啲嘅....。
「…小欣牙，不如你都食啲吖。」而家一軍將塊魚柳份成好多細舊咁。
「...er....是但啦。」其實我今朝都係同表妹share食一個全餐，
所以其實又唔係話咁飽嘅。
「...拿....小欣。」一軍用叉拮左舊魚柳比我。
「...哦....唔該。」我答。
之後我就同一軍一齊食多份咁豐富嘅早餐啦，不過其實我都只係拮左幾舊魚柳食姐...，
其他野都係一軍掃哂，我見佢食完個樣其實都好似唔係咁飽架咋...嘻嘻...
可能越高大嘅人真係會越大食架。
我地食完喺果度坐多一陣，表妹同kimmy就斯斯然咁行到返離啦。
「…咦....喂.....阿成點解你喺度架?」我好疑惑咁講。
而家表妹，kimmy同阿成三個行左埋離。
「...嘻嘻...早晨呀欣姐，一軍哥。」阿成笑笑口同我地講。
「...阿成話要陪我去台灣喎，所以就跟住我地通告上面嘅航班同酒店資料，
自己買哂機票同訂定酒店房啦。」kimmy講。
嘩....阿成....果然係有錢就是任性呀....。
「.......。」我而家個樣o哂咀咁，都唔知講咩好。
「...阿哥阿嫂，阿成話到時帶我地去食好西喎。」kimmy好興奮咁講。
就係咁我地幾個人一路傾一路行，轉眼間已經差唔多十點鐘啦。
我地行返去集合點，等所有人返齊哂離，之後卜sir就帶住我地廿幾人入閘啦。
第一次真係好緊張呀我，入完閘之後就係過安檢啦，之後就係出境啦。
我行左去e道果邊排隊，排緊果陣我都真係驚驚地架....始終我張身份証都唔係真架嗎....，
但係有時真係越驚就越見鬼，到我入到去e道入面就出事啦，打手指模果陣打極都打唔到呀....，
點算呀.....唔記住左子欣根本冇打過手指模又點會打到喎....今次死緊啦....嗚。