天使原來是男生（舊名：魯莽天使）[小甜][變身][男變女][籃球]: 40
~說時遲那是快，一軍將波帶到三分線附近，竟然離一個急停跳射喎。
我緊張到企左起身，點解...打快攻一軍竟然會選擇射一個咁急嘅三分呢?
係邊度離嘅自信令到佢可以喺咁緊張嘅情況都可以做出咁驚人嘅選擇呢?....
可能依樣就係一軍吸引我嘅地方啦...。
~…插.....~
穿針
一軍成功將比分拉開至四十二比三十五。
依一球封阻，無疑係對對方隊長一個極大嘅信心打擊，
反而幫我地提升左唔小士氣。
之後對方開始崩潰啦，比一軍同世邦分別射入兩球三分，
最後我地以四十八比三十五大勝，成功衛冕。
雖然大家都好開心，但係又唔係話真係好興奮咁，
此終精英賽先係主菜，d1都只不過係小菜一碟姐。
「…恭喜哂喎。」一軍返埋離之後，我笑笑口咁同佢講。
「…哈哈...多謝小欣，係呢...我今日表現還可以嗎?...」一軍好輕佻咁喺度扮葉問講野囉。
「…er....快攻果球你點解會走去射三分架...咁冒險...。」我有小小質疑佢。
「...因為我好有信心囉，有小欣喺度，我會更加有信心好似充滿力量咁。」
一軍一路講一路谷起手臂隻老鼠仔。
「...誇...張。」我瞇起對眼話佢。
大會頒完冠軍獎杯之後，一軍順理成章拎左mvp，
之後一軍話想同我去食飯慶祝喎，唉...見佢今日連mvp都拎埋就順下佢意啦。
等一軍沖完涼換完衫之後，一軍就帶住我行到出告士打道搭260巴士入赤柱，
去到赤柱，我地落左巴士之後沿住海旁慢慢行到去美利樓，
一軍繼續帶住我搭扶手電梯上到去二樓嘅一間餐廳。
「...依度...?」係餐廳門口，我好驚訝咁問一軍。
「…係呀小欣，...我一早book左位架啦。」一軍微笑住同我講。
原來條友早有預謀架囉....諗住我一定會同佢離咁.....哼.....可惡呀。
喺門口等左一陣，侍應生就帶左我地入到去露臺嘅位置坐低。
依度嘅環境真係好正囉，好有情調，我地可以一邊欣賞住咁靚嘅夜景一邊享受美食，
聽一軍講依度係食德國菜架，其實呢，我都唔知德國菜係食咩嘅...我望住個餐牌，
淨係知道今餐唔方會平囉。
「…好貴呀....。」我細細聲同一軍講。
「...放心叫啦小欣，一餐半餐姐，我今日好開心呀最緊要高興。」
一軍講果陣個樣真係好開心嘅。
「…er...我唔識叫呀，不如你叫啦。」我繼續細細聲講。
「...咁好啦，等我話事啦。」一軍講。
一軍好快就點哂野食，好似一早做左research咁。
好快就有野食到左啦，侍應生放低左一個包同兩碟醬，
好似話係咩(農夫包)喎，質地好煙韧咁。
之後就離左個煙三文魚配薯餅，一軍仲叫左幾枝啤酒添。
「…小欣...你飲唔飲架?」一軍斟完比自己之後問我。
「...er....ok嘅。」其實我又冇話鍾意飲啤酒，但係又唔抗拒咁囉。
之後一軍斟左杯比我，咦....又幾好飲喎，唔知係咪德國啲啤酒真係好飲啲架呢?
主菜咸豬手都離埋啦，隻豬手外皮烤得好脆呀，
但係入面啲肉又唔會老喎，仲係好嫩滑咁，真係幾好食架。
最後仲離左個叫(火焰雪山)嘅甜品，上面仲寫住小欣兩個字添...，
之後場內嘅歌手無啦啦走左埋離我地度唱歌...氣氛真係好好，
店員仲幫我同一軍影左張即影即有相送返比我地添。
今餐真係食得好滿足呀，食完之後一軍提議過沙灘坐下，
所以我地就慢慢散住步咁行過去啦。
落到沙灘，我地揀左個冇咩人嘅位置坐低左，望住個咁靚嘅星空，
再加上好有節奏嘅海浪聲，令人有種好舒服嘅感覺，所有煩惱都已經拋諸腦後啦。
可能飲左小小酒，個人有小小睡意啦，我由坐嘅姿勢慢慢向後攤左喺度，
而家眼前嘅星空更加壯闊....正當我對眼半開合咁享受緊咁美麗嘅環境果陣....，
一軍忽然喺側邊趷左起身，本來訓喺我右手邊嘅一軍，而家個身側側地咁，
將隻右手放左喺我左手邊，塊面對正住我，而家成個夜空都比一軍遮住，
我眼前只係淨低 一軍果塊飲完酒紅紅地嘅面。
我唔知一軍喺咪飲醉左，因為佢而家個樣同平時見佢個樣有小小唔同，
表情好似好興奮咁，但係又帶小小疲態。我地對望左十幾秒，
可能我都飲左酒嘅關係啦，大家塊面都已經好紅啦。
「...小欣...。」一軍微弱嘅聲線，再加果對半開合嘅眼，
我相信佢應該有小小醉意，佢一邊叫住我個名一邊慢慢將佢塊面痴埋離我度，
訓左喺度嘅我，其實都有醉意，雖然有啲尷尬，但係我冇任何反應，
只係繼續訓喺度將對眼合埋，...好快....一軍嘅嘴唇已經同我嘅嘴唇緊貼住啦，
果種暖暖嘅感覺，再一次出現，係一種幸福嘅感覺，依個情況維持左一分鐘左右，
我地雙唇分開左之後，一軍就成個人攤左喺我上面，訓著左啦。
而我喺咁溫暖嘅一軍包圍住之下亦都好快訓著左，
到我訓醒嘅時候，一軍已經坐返喺我隔離，將佢件褸褸左落我身上面。
「…你唔凍咩...，得件tee。」我訓喺度同一軍講。
「...咦...小欣你訓醒啦。」一軍擰一擰頭望一望訓左喺度嘅我。
「...嗯...。」我嗯左一聲。
之後一軍就送左我返屋企，我唔清楚我地依家到底算係咩....
可能就係所謂嘅曖昧啦.....返到去之後，我成晚都訓唔著，
我唔知自己依家咁到底係啱定錯.....，咁算唔算係收兵呢?......
之後到星期一放學練緊波果陣，卜sir突然間叫哂我地所有人埋去。
「...籃球交流團?」kimmy大叫左出離。
「…係...，為左備戰精英賽，離緊嘅聖誕節假期入面嘅其中四日，
我地會去台灣同當地嘅一間高中籃球隊進行交流，至於費用方面，
學校會負責球員嘅費用....，你地拎份通告返去比家長睇睇啦，
如果有人去唔到嘅，就早小小同我講，等我好安排。」卜sir同全部人講。
到練完波之後，我地喺更衣室換緊衫果陣。
「…好野呀，我咁大個女都未去過台灣架....。」kimmy好興奮咁講。
「...我都未去過。」小田和應kimmy。
「…阿嫂...你就應該冇咩感覺啦，你啱啱先喺台灣返離...嘻嘻。」kimmy突然問我。
「…吓....er....都係嘅...嘻嘻。」我好尷尬咁答。
「...到時有啲咩野好玩好食嘅野，就靠哂阿嫂你啦。」kimmy搭一搭我膊頭講。
點算呀....，我識鬼台灣邊度有好野食咩，雖然堂姐話我喺台灣返離之後我都有上網惡補吓資料.....，
但係真係去到台灣，又係另一回事架啦，都唔知應唔應付到添架....今日開始又要多啲上網做資料搜集啦。
練完波之後，卜sir幫我地度高磅重，可能係要交啲資料比台灣果邊掛。
「倪金兒...164cm，下一個。」原來kimmy都唔矮喎，有164，
唔知我依家幾高呢....對上一次度都已經係暑假前啦。
「…伍家蔚...163cm，下一個周子欣。」終於都我啦。而家我企左埋把呎度。
「…周子欣...172cm，下一個。」嘩...原來我而家有172囉，
暑假前度仲係170架...唔通暑假果陣我高左?定係女性早發育嘅關係，
所以原本嘅周子欣本身就係咁高呢?
點都好啦，總之就係高左啦，好野呀，好開心添...。
「…陳偑檸...177cm，下一個。」嘩....檸檬都真係幾高喎，
有成177，男仔都唔係咁多有177啦。
之後就到男仔度啦，原來一軍有183cm，
而阿亮呢就有成189cm高到離哂譜架。
之後就係到磅重啦，至於我地到底幾重呢....嘻嘻...依啲係女仔嘅秘密離架嘛，
點可以話比人知呢。
練完波之後，我同表妹一齊行返屋企。
「...表姐...你去架呵?」行行吓果陣，表妹問我。
「...er...ok嘅，又唔洗錢咪去囉。」我答表妹。
「…咁就好啦，我幾驚表姐你唔去呀。」表妹好似鬆返一口氣咁。
「…點解你會覺得我唔去呢?」我問表妹。
「…咁泳琳又冇得去，我驚你會留喺度陪佢吖嘛。」表妹講。
「…er....係喎，我都唔記得左泳琳冇份添，不過都係幾日姐，泳琳應該唔介意掛。」我講。
到夜晚果陣，泳琳叫左我上去食飯。
我地坐左喺梳化等食果陣。
「...去台灣?...」泳琳聽完我講之後，反應又唔算好大喎。
「…係...係呀，四日三夜嘅籃球交流團喎。」我口窒窒咁答。
「...哦....會邊幾日去呀?」泳琳再問。
「...er....通告上面好似寫住12月22-25日。」我諗一諗之後答。
「…咁咪冇得同小欣你過聖誕囉。」泳琳有啲失望咁講。
「...er...傻...傻豬，返離之後仲有幾日假架嘛，
到時陪返你夠本咪得囉。」我笑笑口咁同泳琳講。
「…唯有係咁啦...。」泳琳一邊講一邊攬住我，好失望咁嘅樣。
好彩泳琳冇話唔比我去姐....。
唔知點解而家我真係有啲期待今次嘅台灣之旅。
時間過得好快，十二月二十二日終於都到左啦。
因為要朝早八點半前去到機場集合，我同表妹七點左右就喺樓下食左個m記早餐。