天使原來是男生（舊名：魯莽天使）[小甜][變身][男變女][籃球]: 36
~唔...唔會走左掛...？我有小小緊張咁四圍搵緊...，
廁所...冇嘅....?.....之後我行左入自己間房度睇吓。
原來一軍行左入我間房，而家企左喺我床邊度四圍望緊。
「...喂....點解你行入女仔房咁冇禮貌架....。」我依家瞇起對眼同一軍講。
「…er....唔...唔好意思呀...小欣，你叫我四圍望吓架嘛...哈哈。」
一軍一見到我，成個人嚇到彈起左，之後笑笑口同我講。
「.....er....。」咁我又真係講過嘅。
「…咦....果日隻多啦a夢喎。」一軍指住我床上面隻多啦a夢講。
其實我而家晚晚都會攬住隻多啦a夢離訓架。
「...er....係....係呀。」我面紅紅咁答。
「…不如...出去食飯先啦。」我再講。
「…係喎，唔記得左添...試吓小欣嘅手勢先...哈哈。」一軍笑笑口咁答我。
之後我地就一齊行返出廳啦。
「...ng....原來小欣煮野咁好食架...。」一軍食第一啖已經讚不絕口啦，
之後仲越食越讚得誇張添....講到好似食神入面個薛家燕咁。
「 ...洗...洗唔洗講到咁誇張喎。」我面紅紅咁講。其實心入面不知幾開心。
「...真架，我咁大個仔都未食過咁好味嘅住家飯架....，
kimmy個衰妹就唔得啦，連煎隻蛋都煎燶嘅。」一軍繼續讚我。
「…咁...下次有機會咪再上離食過囉。」我口窒窒咁講。
「…好呀，下次我地一齊煮吖。」一軍好開心咁講。
「…嗯....。」我點一點頭。
餐飯就喺歡樂嘅氣氛中渡過。
食完飯之後一軍就走左啦。我洗完碗就沖涼訓覺。
之後幾日一切都如常，泳琳冇嬲到我繼續都係每日都同我一齊返學，
而一軍呢，都係keep住做我嘅秘密私人教練囉。
但係果次之後一軍暫時都冇再上過離我屋企食飯，練波果陣我地都係求其喺商場食啲野就算。
kimmy同阿成就繼續打得火熱，聽kimmy講，原來果晚阿成媽咪離到醫院之後，
就即刻幫阿成轉左去最貴嘅私家病房啦喎，
之後過兩日阿成就冇事出左院啦。
一切都回復到正軌。
秋季旅行終於都到啦，琴晚我已經興奮到訓唔著，
到今朝一早我同泳琳，表妹喺樓下食完個早餐之後就出發返學校集合啦。
「…早晨...呀。」返到學校籃球場，kimmy同我地講。
佢同一軍一早已經返左離，連阿成同anna都已經喺度。
「...洗唔洗咁早呀...倪金兒，又唔係比賽。」表妹仲係未訓醒咁同kimmy講。
「……係你先鍾意遲到架姐...豬蔚...。」kimmy串表妹。
「…吖...唔知邊個上次去海洋公園遲到呢....呵呵。」表妹反擊。
「…死人豬蔚...記咁耐...。」kimmy比表妹串到冇得反抗。
就係咁，有表妹同kimmy兩個開心果喺度，我地就繼續有講有笑咁等夠鐘啦。
因為去旅行嘅關係，我地唔係上課室，全部人都係喺籃球場度集合。
miss wong終於都離到啦，今日佢同平時唔同，平時嘅佢一身斯文look，
但係今日就著左套運動衫同波鞋離，仲咩住個大背囊添。
「....miss wong今日好sporty喎。」kimmy講。
「...ng...冇計啦，宿營有好多戶外活動要進行，所以一定要咁著。」miss wong嘆一嘆氣講。
集合時間已經到左，而家我地所有人企哂喺籃球場度集合，
今次宿營係中五，中六學生一齊去嘅，所以一軍都喺度。
吖....我好似冇同大家交代過添，我同kimmy佢地係讀中五嘅，
而一軍...阿亮同檸檬佢地就係讀中六嘅...。
中五中六夾埋總共有六班人一齊去，而家我地分開哂六班排好哂喺籃球場，
miss wong就行埋離為我地逐一點名。
校長循例上檯同我地講解吓今次嘅宿營呀，講吓啲要注意安全呀...
比賽活動果陣要有團隊精神之類嘅野啦，之後我地就分班出去上旅遊巴出發啦。
一上到旅遊巴，緊係揀返個尾位坐啦，我同泳琳即刻衝左去車尾度坐，
之後kimmy阿成同表妹都跟左上離，所以我地五個人係坐哂成行尾坐嘅...，
至於anna呢.....，自從佢知道阿成同左kimmy一齊之後都小左痴埋我地，
而家一個人坐左去車頭位置。
坐定左之後，我就整理吓自己個背囊，睇吓有冇帶漏野咁啦，
我今日帶左個行山用嘅大背囊離呀，其實我都真係幾鍾意咩背囊架，
因為真係好方便，而且又可以放好多野入去。
搞掂，咩野都帶齊啦。因為我地而家出發嘅時候係著學生運動服去嘅，
但係去都營地第二日就可以著返便服，所以我都帶左幾套衫，準備到時替換。
而家車上面仲嘈過街市，大家都好鬼死興奮，kimmy同表妹兩個繼續搞爛gag，
我同泳琳就繼續負責笑，一個鐘頭嘅車程轉眼就過。
10點鐘左右，我地終於到左西貢戶外康樂中心啦。
我地全部人落車之後就喺停車場側邊嘅大空地再一次集合，
miss wong再一次同我地點名，確保所有人都落哂車，
點完名之後等所有車都離齊哂之後，負責籌備今次宿營嘅卜sir同朱miss就幫我地分配宿舍。
我地跟住大隊慢慢行過去宿舍果邊。
「...咦...籃球場喎。」經過籃球場果陣，kimmy講。
「...倪金兒，平時仲練唔夠咩，離到依度打死都唔打籃球囉。」表妹黑哂面咁同kimmy講。
我地經過籃球場，再穿過兒童遊樂場就到達宿舍嘅所在地啦。
原來依度每間房有八張床架，我同kimmy，泳琳，表妹，anna，
再加三個冇咁熟嘅女同學編埋一間房，真係好彩呀，miss wong同另外六個女同學訓第二間房。
因為女仔宿舍喺一樓而男仔就喺二樓嘅關係，所以阿成就同其他男同學編左上二樓嘅兩間房度。
miss wong比我地自己揀床，於是我地每個人揀啱自己張床之後就放低哂啲行李啦。
我地四個㨂左最入嘅四張床，我同泳琳梗係痴住啦，kimmy同表妹就訓我地對面果兩張床。
喺房度hea左陣之後，miss wong就過離叫哂我地落樓下。
因為而家係班時間，所以只係我地自己班集合，
miss wong都真係唔係咁鍾意戶外活動嘅關係，所以叫我地自由活動吓啦。
啲男仔一見到個繩網就好興奮咁爬望爬去，而我地幾個女仔，仲有阿成就跟住kimmy。
「...不如我都去踩滾軸溜冰先吖，好近架咋。」kimmy好興奮咁講。
「…er...我唔係咁識喎，會唔會好難架。」表妹驚驚地咁。
「…且....跌吓跌吓就識架啦。」kimmy講。
我地好快就去到滾軸溜冰場。
咦....可能今日係平日啦，而家個場得小貓三四隻，
而且多數都係我地學校啲人添。
我地好快換完鞋，就開始玩啦。
「...wu.....倪金兒...，救命呀。」表妹真係完全唔識，叫哂救命咁死拉住kimmy。
kimmy就溜得幾好，阿成可能有踢開波，平衡力都唔錯，而家跟左喺kimmy後面。
而泳琳呢，就緊係翹住我一齊溜啦，因為泳琳都係唔識溜，所以翹到我好實呀...而我呢，
因為小學果陣堂姐送過對滾軸溜冰鞋比我，果陣日日放學都落樓下踩，所以完全冇難度囉...嘻嘻。
kimmy仲比表妹拉跌左幾獲囉...。
我地玩左一個鐘左右就轉場啦，我地去左室內活動中心，
果度有美式桌球玩架，我地成班都冇個識玩，拎住枝棍喺度亂咁離囉。
到一點左右，終於都夠鐘食飯啦，因為餐廳就喺室內活動中心隔離，所以我地好快就行到過去。
嘩....好多人呀，因為所有人差唔多同時間放飯嘅關係，依家餐廳人頭湧湧，
嘈到好似去左街市咁，我地搵返寫住我地班號嘅枱坐低左之後，就有人放低啲飯餸埋離啦。
啲飯餸就.....唔好期望咁高嘅其實都ok嘅....，我地食完飯之後，
下午嘅時間就係去體育館玩一啲班際嘅競技比賽呀，都係啲無無聊聊得啖笑果啲啦。
玩完之後，晚餐就係喺燒烤場燒野食啦。
其實我都好耐冇燒野食啦，對上一次係同泳琳啲屋企人上漁排燒。
去到燒烤場，學校已經分好哂每班嘅爐，但係其實啲人都喺走離走去，
所以一軍過左離我地個爐度同我地一齊燒。
燒緊果陣泳琳坐我隔離，而一軍就比kimmy逼佢坐我另一邊隔離，
於是我成晚就比佢兩個夾住離坐啦。
全程我就照顧住泳琳，又幫佢吉野食同搽蜜糖咁，
而一軍就好似我對泳琳咁對返我，個情況其實都真係幾奇怪架。
kimmy，表妹同阿成佢地同我地都係一樣三人行，不過分別就係咩野都阿成做哂囉...嘻嘻。
大家都飲飽食醉之後，戲肉就出現啦，係(班際黑夜定向比賽)呀。