天使原來是男生（舊名：魯莽天使）[小甜][變身][男變女][籃球]: 35
~睇真啲...啲對手...點解...，係肥恆嘅.....，再望多兩望連黑仔都喺度，
其他對手原來都係我以前學校啲人....，點...點解會咁橋架.....？
黑仔肥恆佢地打籃球架嘛.....無啦啦踢乜鬼野波姐...。
好彩而家依度都幾多人，加上我同kimmy都坐得幾遠吓...，所以佢地望唔到我。
而家我地坐左喺度，欣賞緊佢地嘅比賽，聽kimmy講，唔好睇阿成細細粒咁呀，
原來佢係學校足球隊前鋒離架，而家場入面踢緊果啲全部都係學校足球隊啲人，
所以見到佢地對住肥恆同黑仔佢地簡直就好似大人同細路仔比賽咁。
阿成踢到成個美斯咁，一個左插花之後再加個施丹轉身輕鬆過左黑仔同肥恆，
再求其踢左個波入網，之後仲同啲隊友笑哂口咁細聲講大聲笑。
其實諗都諗到啦，一隊籃球隊同一隊足球隊比賽踢足球喎，點會有得踢架。
我見到黑仔個樣好唔忿氣咁，其他舊同學見到阿成咁招搖都好唔据佢。
因為冇人跟隊，所以黑仔佢地要求踢多場，於是比賽再次進行。
今次黑仔佢地好認真....，但係點認真都好...雙方技術距離實在差太遠啦，
阿成佢地好似玩馬騮咁...猜離猜去，黑仔佢地根本連波皮都掂唔到。
依家黑仔佢地頂唔住頸啦，開始用超技術，加一啲搏擊技巧...開始球球都推人同起踭。
阿成佢地都意識到對方打矛波，而家雙方都各不相讓，最後黑仔將阿成推左落地下。
「…喂....食屎狗，唔夠人踢就發爛渣。」阿成即刻彈返起身小黑仔。
「...想打你好耐啦，屎忽鬼。」黑仔未講完，已經揮拳打向阿成，阿成還拖，
舊同學一湧而上，將阿成打到訓左落地下，因為黑仔佢地以前喺籃球場打交都真係多過食飯，
所以而家打起上離，完全處於上風。
「…吖....唔好打呀。」kimmy忍唔住衝左出去阿成果邊。
「...喂....kimmy好危險架。」我見kimmy衝左出去亦都跟住跑出去。
kimmy跑到阿成身邊雙手推開左打緊阿成嘅一個舊同學阿豪。
阿豪向後退開左幾步之後，變得更嬲....而家衝向kimmy，想一拳打向kimmy。
~嘭.....~
我及時趕到一腳踢開左阿豪，阿豪成個人飛開左幾呎。
「…死八婆吖....郁尻我兄弟。」舊同學阿銘見到阿豪比我踢開左，
亦都想衝埋離我度開我波....就喺依一刻。
~嘭…………~
肥恆見到我，之後衝左埋離一手推開左阿銘，因為阿銘係好瘦果啲人，
比肥恆一推直頭飛開左幾米應聲倒地。
其他人見到咁嘅情況都停左落離呆左。
「...喂...傻撚左牙肥恆你。」訓左喺地下嘅阿銘完全唔知發生咩野事，
而企左喺肥恆身邊嘅黑仔見到我之後都唔敢再出聲。
「...邊個夠膽郁我小欣，我同佢死過。」肥恆向住阿銘大叫，眼神仲相當之凶狠。
依個時候突然有成班警察出現，原來有人一早已經報左警。
「...喂...全部停手....踎低...雙手擺頭 。」警察喝令所有人。
而家阿成仲係訓左喺地下度，成塊面腫哂....透哂大氣咁，
而kimmy就跪左喺佢身邊扶住佢，我就繼續企左喺kimmy身邊。
「...嗚....阿成.....你唔好有事呀...嗚。」見到阿成傷成咁，kimmy忍唔住喊左出離，仲攬到阿成實一實。
「....傻....傻....豬....我....冇....冇....事....吖。」阿成連講野都講唔到咁濟話比人聽冇事都冇人信啦。
「....k....kimmy...，可....可唔...可.....以.....比.....多.....次.....機會......我....呀?」
奄奄一息嘅阿成用盡全身嘅奶力講出對kimmy最後嘅請求。
「…嗚...可...可以呀...你唔好死呀...成成。」kimmy終於都應承阿成啦，
佢地幾經辛苦，經歷九九八十一難，終於都修成正果。
企喺隔離嘅我都睇到感動流涕....。
之後警車同救護車都離左，經救護員協助下，阿成訓左上擔架，
要靠氧氣面罩輔助呼吸再由救護員送上救護車，而kimmy就跟救護車一齊去醫院。
經警察查問後拉左有份打阿成嘅六個人，當中包括黑仔，肥恆，阿豪同阿銘都比警察帶上手銬押左上警車，
上警車途中，我見到有兩個疑似記者嘅人喺佢地旁邊係咁影相....唉....佢地聽日上緊報紙都得啦。
而我呢，而家企左喺度成碌木咁都唔知做咩好。
最後我因為有啲膽心肥恆佢地，所以一條友走左去差館。
一入到去報案室，已經有好多人坐左喺接待處前面啲櫈度，但係就唔見肥恆佢地。
「...er....小姐有啲咩野可以幫到你呢?」坐喺接待處嘅阿sir見到我喺度周圍望所以問我。
「…er....我有個朋友因為踢波果陣打交，應該比人拉左離依度架...，我想了解吓情況姐。」我好緊張咁問。
「…打交...，哦...水庫打人果六個波牛，而家關左入拘留室，至於其他野呢，我都唔係好清楚....。」阿sir答我。
「...er....咁佢地會唔會有事架?」我繼續問。
「...er...好難講，打到人地咁傷應該想冇事都幾難....不過佢地全部都未夠秤，
應該守行為多...。」阿sir好認真咁答我。
「...er...咁...牙。」我又啲不知所措咁講。
「...唔洗咁膽心喎...妹妹，有咩消息我地警方會通知佢地屋企人架啦，
你都係返去等消息啦。」阿sir安慰我講。
「...er...咁...唔該哂。」我答阿sir。
唉....專登走離差館，估唔到咩野都做唔到，冇辦法啦，唯有走啦。
之後我就去左醫院睇阿成。
去到醫院就見到kimmy坐左喺急証室啲櫈度。
「…kimmy...。」我行左埋kimmy度。
「...阿嫂....。」kimmy抬一抬頭。
「…阿....成....佢。」我問kimmy。
「…頭先一離到...，啲醫護人員就即刻推左阿成入去，跟住就叫我坐喺度等啦，
我都唔知阿成而家點.....嗚嗚。」kimmy喊住口咁講。
「…放...放心啦....應該冇事嘅...。」我講果陣都口窒窒冇咩信心咁，
因為阿成離果陣帶哂氧氣面罩咁都好似好嚴重，但係為左令kimmy冇咁擔心都要安慰吓架啦。
我陪kimmy等左一個鐘左右，之後有個好似係護士姐姐嘅人行左埋離。
「...妹妹，你係咪黃家成朋友呀?」護士問kimmy。
「...係呀...係呀...，阿成佢....點呀?」kimmy企左起身，好緊張咁問。
「...佢頭先送入離果陣雖然有啲呼吸困難，但係用氧氣面罩供左氧一段時間之後，呼吸已經穩定返啦。
但係頭部同面部就比人打到多處瘀傷同外傷，咁頭先我地都幫佢個頭聯左針架啦，但係就要留院觀察多日先，
不過冇生命危險嘅....放心啦妹妹。」護士詳細講解阿成情況。
「...唔...唔該哂，咁...佢...而家呢。」kimmy聽完之後心情都平復返唔小。
「...佢而家會轉去外科病房，咁一陣你地可以上去睇佢架啦，...吖。..仲有呀，
妹妹你地跟我去幫佢辦入院手續先順便幫我通知埋佢啲屋企人吖。」護士姐姐講完之後，
我同kimmy就跟左佢去辦手續，期間kimmy仲打左電話比阿成屋企人添。
搞掂哂所有野之後，我同kimmy就上左病房探阿成啦。
阿成而家換左病人衫，個頭包哂沙布訓左喺床上面，但係就見到阿成而家嘅狀態係清醒嘅。
「...嗚...阿成...，你見點呀?...」一見到阿成，kimmy就忍唔住衝左埋去床邊喊啦。
「……我...我冇野喎...。」阿成而家都仲係好虛弱，講野仲係冇咩氣咁。
「…嗚....咁有冇啲咩野唔舒服吖....，有嘅記住話比護士聽呀...。」
kimmy而家輕輕撫摸住阿成個頭，貼左塊面埋去阿成度講。
「…ng....我…知道架啦。」阿成雖然虛弱，但係都睇得出佢答得好開心。
「...吖....欣姐...。」阿成望一望企左喺kimmy後面嘅我。
「...ng....咩呀?」我心不在焉咁答。
「...多謝...你呀...。」阿成笑住咁同我講。
「…得啦...得啦，你抖吓啦。」我答。
之後都係阿成同kimmy兩個喺度講埋哂啲肉麻野，我企喺度成個電燈擔咁，
所以我就同kimmy講自己走先，比啲時間佢地兩個二人世界咁囉。
於是我就一個人走左，原來都已經夜晚八點幾啦，唔怪之得有小小肚餓啦。
我返左去屋企樓下商場度諗住求其食啲野先返去。
吖....食咩好呢...，望住個水牌，我嘅選擇困難症又發作啦，我企左喺度睇左成個字，
左諗右諗都唔知食咩好，就喺我諗住出點指兵兵嘅時候。
「...小...小欣。」邊個叫我呢?我另轉一望，....竟然又係一軍，唔通真係緣分。
「…吓...點解你喺度嘅?...」我懶係驚訝咁講。
「…冇呀...，啱啱去左阿亮屋企打機咋嘛，而家諗住返去煮飯比kimmy食。」一軍答我。
原來阿亮同我住同一條邨嘅....。
「…er...，你唔洗煮比kimmy食啦。」我口窒窒咁講。
「…吓...點解嘅?...」一軍好疑惑咁問我。
之後我將阿成比人打依單野一五一十咁講哂比一軍聽。
「原來係咁牙....，阿成個死仔，估唔到個衰妹真係會㨂佢...。」一軍有啲感嘆咁講。
「...其實...阿成份人真係唔差架，又有錢呢，起馬一定唔會餓死老婆瘟臭屋先啦....嘻嘻...。」我笑住講。
「…咁...咁都係嘅，最緊要個衰妹自己鍾意姐....，女大女世界啦。」
一軍講到好似佢老豆咁，不過一軍又真係由細照顧kimmy到大嘅。
「...係呢....你而家去邊呀?」我細細聲問一軍。
「...我牙...er...唔洗返去煮飯就是但喺附近食啲野算囉，小欣你呢...食左飯未呀?」一軍諗一諗之後問我。
「…er...我其實都諗緊食咩野...。」我面紅紅咁答。
「…咁...不如一齊食啦。」一軍有小小興奮咁問我。
「...er...好...好吖。」答完一 軍之後，我地就繼續諗吓食啲咩啦。
一軍跟住我後面，我行完一間又一間，點㨂都揀唔掂，到最後我終於都諗到啦。
「...不...不如，上我屋企食吖...，我突然好想煮野食....。」我細細聲講。
「...好吖....，你話事啦小欣。」一軍微笑住答我。
就係咁，一軍就跟住我去左商場超市度買餸啦，我地好快買完餸之後就返左我屋企。
「...er...可能會有啲亂架...，唔好介意喎。」一入到屋，我好唔好意思咁講。
「...唔係吖...，幾整潔呀，同上次差唔多姐。」一軍四圍望完之後講。
上次?...係...係喎，我都唔記得一軍上過離添....果次佢仲....。
「...er...你自己四圍望吓先啦，我入廚房先。」我求其應完一軍之後就行左入廚房。
一軍上離食飯喎，我點可以馬虎呢，我一於整幾個我最拿手嘅小菜先。
搞左大半個鐘左右，我終於煮好飯啦，我整左三餸一湯。
好..... !
快啲拎啲餸出去先。
「...咦...一軍呢...?」我拎緊啲餸出廳果陣，點解唔見左一軍嘅?於是我放低啲餸開始四圍搵佢啦。