天使原來是男生（舊名：魯莽天使）[小甜][變身][男變女][籃球]: 90倪金兒內心世界

~...幾年後...。一個星期六嘅朝早。




 倪金兒內心世界。






 大家好我叫做倪金兒，不過大家都應該叫慣左我做kimmy架啦。

早幾年有一日我喺街度撞到我嘅best friend家蔚喎，估唔到家蔚原來有個表姐囉，
一直都冇聽佢講過嘅，而且佢仲要好靚女添。

果日之後雖然我同家蔚表姐交換左電話，但係佢就一直都冇搵過我，
直到開學之後幾日再見返佢，原來佢離左我地學校讀書呀，仲要坐我隔離添。

 因為坐我隔離嘅關係，所以我可以成日搵佢傾計，原來佢啱啱喺台灣返離架，
了解佢多左之後，我發覺子欣佢份人好真又有愛心做朋友一流。



但係唔知點解佢一見到阿哥就好似撈亂骨頭咁，
嘻嘻...其實我覺得佢地好嚫架...如果子欣可以做我阿嫂就好啦。

之後我一直都搵機會撮合佢地，去海洋公園果陣呢，我知道阿嫂驚鬼喎，
咁入鬼屋果陣咪專登推阿哥埋去比機會佢囉，嘻嘻...雖然果次之後佢地兩個關係好似好左好多，
但係就始終唔知佢地係咪已經一齊左，直到台灣之旅之後，佢地終於都一齊左啦。

之後我同阿嫂嘅感情就更加好...我同阿成...阿哥...
阿嫂就好似一家人咁...好開心呀。



我地一齊經歷左好多野，籃球比賽...澳門之旅，
一日阿嫂一世都係阿嫂，希望佢同阿哥可以白頭到老啦。

 今日呢...嘻嘻...係一個好特別嘅日子，我朝早時間就去到銅鑼灣信和廣場。
 「…黃太...早晨。」樓下接待員同我講，嘻嘻...你地冇聽錯呀...大學畢業之後呢，
我就嫁左比阿成啦。我而家咪就係要搵我嘅好老公囉。

 「...黃太...早晨。」

 「…黃太...早晨。」

 「...早晨。」上樓期間不斷有啲唔識嘅同事向我打招呼，
其實我一早已經習慣左啦...，亦都會好有禮貌咁回應。



 「…黃太...早晨，細黃生喺房呀，洗唔洗通知佢你離左呀?」秘書joyce見到我之後講。

 「…唔洗啦...我想比個驚喜佢。」我揮一揮手之後呢...就偷偷地行入去阿成間房度啦。

 「...係...係...係...無煙城果個發展項目我會跟好啲架啦...daddy。」
嘻嘻...原來阿成傾緊電話呀，個樣仲鬼死咁認真，見到佢就辛苦啦。

 「...咦...離左牙...老婆。」收左線之後阿成終於都見到我啦。

 「…老公呀...忙還忙呀，唔好比太大壓力自己呀，早餐又唔食...放喺度放到凍哂啦。」
我行左埋去指住果碗放左喺枱面已經封塵嘅火腿通粉講。

 「...哈哈...老婆呀，我想做啲成績比daddy睇吓吖嘛，總之我應承你，無煙城依個項目一搞掂，
我就即刻放大假陪你多啲，我地可以去金字塔啦...喜馬拉雅山啦...我地去勻哂世界上每一角落度睇日出，
總之你想去邊我就陪你去邊。」阿成笑笑口咁搭住我膊頭講，我覺得依個男人真係全世界最好架。



 「…嘻嘻...算你啦，喂吖...記唔記得今日係咩日子呀...，阿嫂千叮萬囑叫我地記得要準時到架，
一陣搞埋啲手尾我地好行啦。」我好緊張咁提醒阿成，因為今日係一個重要日子...
吖...打個電話去提吓家蔚個衰婆先。


 倪金兒內心世界完。