天使原來是男生（舊名：魯莽天使）[小甜][變身][男變女][籃球]: 65
~咦...無啦啦邊個會上離搵我呢，唔通係一軍?...嘻嘻...。
~…嚓...~我好開心咁睇都冇睇就開左度大門添...。
「…吓....。」但係企喺門口嘅...竟然係芝姐同芝姐嘅家姐囉....。
「…開門啦....阿俊係咪喺入面。」芝家姐好似帶人捉黃腳雞果啲三姑六婆咁...，
而家帶住芝姐企左喺我門口度。
~...嚓....~我開左大閘比佢地入離，因為我覺得越描會越黑，
所以我諗住光明正大咁...等俊哥將成件事講比佢地聽。
「…阿俊...你好出離啦。」說時遲那時快，
我一開門，芝家姐已經拖住左芝姐衝左入離啦。
「...吓....珠姐...。」啱啱喺廚房行返出離嘅俊哥，
一見到芝家姐就好似見鬼咁...腳都震埋...。
「…仲唔比我捉到你兩個姦夫淫婦，係咪呀..芝...，
我都話頭先冇估錯架啦，兩個仲咁好閑情逸致喺度整蛋糕添，
都唔知有冇整整吓整到上埋床添呀!」芝家姐得勢不堯人咁一輪嘴不停講。
「…整蛋糕吖哪!!!」之後仲行左埋去我個多啦a夢蛋糕度一手將個蛋糕推左落地囉。
「…喂....。」我大叫都已經為時已晚啦，
睇住自己整得咁辛苦諗住整比一軍食嘅多啦a夢蛋糕成個散哂...
喺依一刻...我個心都徹底散哂啦。
「...嗚....嗚....。」我跪左喺個蛋糕前面起勢咁喊，唳水不停咁流。
「...死八婆...仲喺度扮可憐添。」芝家姐繼續奚落我，
但係我而家根本就傷心到咩都聽唔到。
「…珠姐呀...你太過份啦，成件事根本就唔係你地諗咁樣。」俊哥發火啦，
雖然就唔敢直接鬧芝家姐，但係終於都將成件事嘅來龍去脈講哂出離。
「...吓...冇啦啦點解要咁神秘去學整蛋糕喎?」芝姐有啲疑惑咁講。
之後俊哥就行左入廚房拎左佢整嘅poohpooh蛋糕出離啦。
「…吓...poohpooh!!!」見到個蛋糕，芝姐好驚訝...
而家連最嘈果個珠姐都啞口無言。
「…就行因為...我想比個意外驚喜你...，阿芝...你願意嫁比我嗎?」
俊哥單手拎住個蛋糕，單腳跪左喺度，再用第二隻手喺個褲袋度拎左一隻戒子出離。
「...噗....嗯...。」芝姐索一索鼻水，眼發唳光咁點一點頭....應承左俊哥，
終於都結束左五年嘅愛情長跑啦。
之後芝姐行左埋離我度，單腳跪左喺我側邊。
「...對...對唔住呀...小欣，一直都怪錯左你...我家姐仲整爛埋你個蛋糕添...對唔住呀。」
芝姐喺我側邊猛咁同我say sorry，但係我就仲係遊緊魂咁望住自己個蛋糕。
~…叮噹....~門鐘再一次響起。
俊哥幫我開左門，係一軍呀...一軍上左離搵我。
「...發生咩事呀...小欣。」見到我跪左喺地下度，一軍即刻衝左埋離。
「...嗚....一軍...。」我攬住左一軍喊，俊哥，
同芝姐佢地就企左喺側邊靜哂...一句說話都唔敢講。
「...唔好喊啦。..小欣，個蛋糕爛左我同你整過囉。」
一軍見到地下散哂嘅多啦a夢蛋糕，大約估到我喊嘅原因。
芝家姐見到一軍咁高大仲凶神惡煞咁嘅樣，
而家標哂冷汗好驚我會指證佢咁。
「…佢地係咩人呀...小欣?」一軍轉身望一望俊哥佢地，之後問我。
「…er...你好呀，我喺泳琳嘅阿哥呀，今日上離係搵小欣教我整蛋糕嘅....。」俊哥開聲介紹。
「…哦...聽小欣講過...你好。」一軍講。
「...er...個蛋糕呢...係....」俊哥好似想講果陣。
「...我唔小心整跌嘅....。」我衝口講左出離，
因為我唔想再搞大件事啦...算啦。
「...哦....唔緊要啦，再整過囉。」一軍喺側邊繼續安慰我，
所以我心情已經平復返唔小啦。
「…俊哥...你地走先啦，啲手尾等我同男友搞得架啦。」我企返起身同俊哥講。
「…但係...。」俊哥好唔好意思咁嘅樣。
「…擺酒記住要請我離飲喎...嘻嘻。」雖然對眼係喊到腫哂，
但係我都繼續微笑住咁同俊哥佢地講。
「...小欣...多謝你呀，我仲一直誤會你...嗚。」
芝姐行左埋離攬住左我想喊咁講。
「...傻啦...，我冇野喎。」我拍一拍芝姐膊頭講。
「...今晚上離食飯吖....個蛋糕咁靚，師傅點可以唔喺度架。」芝姐講。
「...吓....er...。」我唔知點好。
「…離啦...小欣。」芝姐繼續誠懇要請。
「...咁...咁好啦。」我答應左。
之後俊哥同芝姐佢地，就拎住個蛋糕走左啦，而我呢...就同一軍兩個喺度清理緊個地下，
睇住要將個爛蛋糕掉落垃圾桶，果下簡直就好似親手殺左自己個親生仔咁。
之後一軍話陪我一齊整過個喎，於是我地就用剩餘物資繼續整啦。
嘻嘻...一軍有煮開野真係唔同啲架，我教佢啲技巧佢勁快上手囉，
我地合作搞左成個鐘，終於都整好左啦，雖然已經整唔返多啦a夢，
但係就用俊哥用淨嘅啡色忌廉整左個細細個嘅鬆弛熊出離。
「…嘩...你整得好靚呀...小欣。」一軍喺背後攬住我條腰講。
「...咩呀...一軍你都有份整架喎。」我講。
「...邊係呢...最後唧花係你唧架嘛...，唔係邊有咁靚喎。」一軍繼續讚我。
我同一軍即刻拎住個蛋糕係咁影相，影完緊係即刻up上facebook曬吓先啦...。
「...嘻嘻...攞返去同kimmy一齊食啦。」之後我同一軍講。
「...你唔食...?」一軍問。
「...你唔記得我應承左俊哥上佢屋企食飯咩?」我雙手搣住一軍塊面講。
「…吖...好痛呀...小欣。」一軍講。
「…嘻嘻...好q呀...一軍你個樣。」我笑住講。
「…咁好啦...我拎返去同kimmy食啦，個衰女一定鍾意食姐。」一軍笑笑口咁講。
我同一軍一齊洗返乾淨，執返好哂啲野之後呢，
一軍再坐多一陣就拎住個蛋糕走左啦，而我呢...就戰戰兢兢咁出發去泳琳屋企啦。
唔知點解呢...行到去泳琳屋企門口果陣...開始有小小淆底添....，
我企左喺門口係咁踱步....始終都係唔敢入去，終於比啱啱返到離嘅敏姐撞到。
「...咦...小欣，企喺度做咩呀...仲唔入去?」敏姐邊行埋離邊講。
「...er...我啱啱到咋嘛...。」我講，之後敏姐就開門帶左我入屋啦。
「...咦...小欣...，離左拿。」俊哥見到我之後講，
而坐左喺電腦枱前我嘅泳琳見到我之後成個人呆哂咁...粒聲唔出。
「...咦...芝姐都喺度牙。」敏姐望一望芝姐講，雖然敏姐細過俊哥，
但係就早過俊哥兩年已經嫁左人，所以而家唔喺度住嘅，只係間中返離食飯架姐。
入左屋之後呢，因為泳琳冇理到我，所以我好尷尬咁自己一個人坐左喺梳化度，唔知做咩好。
「...喂...小小，你個小欣離左喎。」敏姐叫一叫坐左喺電腦枱嘅泳琳。
「…嗯...。」泳琳應左一應，之後就起身行左埋離。
「...小欣牙...，陪我落街買啲野吖。」泳琳望住我講。
「…er....哦。」哦完之後，我就跟左泳琳出門口啦，然後我地行左去後樓梯。