【夢幻】《我從來冇諗過我會有咁正既女朋友》: 紀念日
話咁快就到左我地既一百紀念日啦！
我一早已經搵左一間餐廳book左位食飯！雖然唔係咩五星級大酒店，但我相信係一個敏兒會鍾意去既餐廳黎！
今日既我選擇著一套西裝去食飯！我好記得對上一次著西裝已經係唔知幾時去「飲」既時候，好彩套西裝都重未發毛鋪哂塵姐！
我約左敏兒起間餐廳門口等！我並冇揀去尖沙嘴中環既地方食飯！但並唔係因為錢既問題....
我地去左近近地「沙田新城市廣場」七樓一間食牛扒既餐廳食飯！
無錯！「新城市廣場」又名「大陸人購物聖地」！
唔知點解永遠去親都有好多人「喼神」上身咁撚樣，重有成撚日撞到人都可以當冇事發生既仆街！
所以平時我都好少行新城市,因為真係好撚恐怖！尤其是係藥房同萬寧門口，果到直頭係重災區。
住沙田既人就會明我講緊咩！我真係好懷念好多年前，細個成人去既「史努比 」公園玩，果陣時既新城市廣場都重未係咁大陸化。
好記得永遠約朋友都會係話「起噴水池果到等啦！」
但而家「史努比 」已經變左「屎努比」，因為上次咁岩經過既時候，我真係見到有個大人抱住個小朋友起到.....
而家既香港重係咪香港...
前果排起facebook 見到一個post ，「五一黃金週正式開始，新城市廣場依舊有不少大陸旅客。但名店明顯較以往冷清」
起呢個時候，我諗起一句大陸人口中既金句，就係「要不是中央政府照顧你們香港，早就完蛋了。」 我真係得當堂嚇一跳，然後得啖笑。
對唔住，好似真係扯遠左少少 ..講返正經事先！
其實我會揀呢到都係因為漫淇同我講過話敏兒最鍾意就係食呢間餐廳既牛扒！
咁我一早去到就拎定位坐低先啦！
原因就係因為我打算比一個驚喜敏兒！放心啦！唔會係好似拍劇咁塞份禮物落個甜品囉！咁樣做真係真心膠！
但敏兒亦都好準時到左起間餐廳門口！佢今日好明顯有刻意打扮過先出黎！
今日敏兒佢著左一條黑色露膊既連身短裙，更加突顯佢性感既鎖骨同埋白滑既肌膚。再襯埋一對白色既高踭鞋突出佢完美既線條！
一句講哂「冇得輸」！好彩我今日都著返套幾型既西裝！
敏兒雖然成日都會做運動，但佢並冇因為咁而曬黑，皮膚都重係咁白滑，可能呢啲野真係天生架！
「你好早已經到左啦？」敏兒見到我都好開心咁向住我既方向行緊埋黎
「唔係啊！岩岩到炸！你今日好靚喎！」我企左起身幫佢拉開張凳，之後就發現佢今日噴左香水！平時敏兒都冇噴香水既習慣架！但今日佢噴既香水散發出淡淡既花香味比人感覺好清新！
「你今日都著左套西裝喎！第一次見你著到咁斯文，都幾好睇啊。」敏兒笑住咁講，我相信佢都睇得出我因為呢次慶祝花左唔少既心機！
成餐飯我地都食得好開心！大家有講有笑，敏兒係一個好易滿足既女仔！佢追求簡單快樂既生活！今日呢餐飯既目的都係想我地之間有多一個深刻既美好回憶！
食完主菜之後就到甜品時間，亦都係有驚喜既時候。
事前我已經叫左個待應用醬汁起個甜品隔離寫左四個號碼！呢四個號碼正正就係我iphone既密碼。
「點解咁搞笑既！冇啦啦有四個號碼起到既！」敏兒用天真可愛既眼神望住我。
我跟住就遞左我部iphone比佢叫佢打開黎睇下！
「搞咩啊你！神神秘秘咁既！」敏兒雖然覺得好疑惑，但都有跟住我既說話去做！
打開左之後正路應該會見到我既wall paper係有一個note 寫住打開「photos」最後一張相。
「打開photos?」敏先望住我傻笑之後都跟住我照做
當敏兒開最後一張相既時候會見到一個盒仔，之後隔離有提示寫住「睇第一張相」。
「哈哈！做咩又要睇返第一張相啊！乜重未完架咩！」第一次見到敏兒咁心急既樣！睇黎佢都好想知道我起到搞乜鬼！ 當佢專心check返第一張相既時候，我隻手已經揸住左條頸鏈！
第一張相其實係我用effect blur 左既頸鏈相！隔離會寫住「係咪好想知係咩呢！想知就...望下前面啦！
當敏兒望向前面既一刻，佢見到我手中拎住一條頸鏈表現得又驚又喜！
起呢個時候我就行埋去敏兒旁邊準備帶佢帶起條頸鏈！
「你花咁多心思原來就係為左送條頸鏈比我啊！」敏兒表露出好驚訝同好感動既神情！
「係啊！因為想用特別啲既方式去送條頸鏈比你！」我好開心見到敏兒又驚又喜既樣！
「從來未試過有人試過咁送禮物比我架！多謝你啊仲成！條頸鏈好靚我真係好鍾意啊！」我睇得出我今次製造既驚喜十分成功！
「你鍾意我就已經好開心架啦！」呢一句說話係我用好真誠既態度講出口
「其實我都準備左一份禮物送比你！」敏兒起手袋拎左個盒仔出黎！
我接過之後就懷著興奮又期待既心情打開份禮物！打開後發現原來係一個黑色皮革銀包黎！天啊！係我人生第一份女朋友送既禮物啊！
「個銀包都好靚啊！多謝你！係我收過最鍾意既禮物黎架！」我咁講完全冇虛偽成分，因為我真係第一收女仔送比我既禮物！
「識到你我真係覺得好幸福！我好想永遠都同你起埋一齊啊！」聽到敏兒呢一句說話，我花咁多心思去準備呢一切都係非常值得架！
「我都係！所以我點都會痴實你！你走唔甩架啦！哈哈！」起呢一刻我覺得我地兩個都認定左大家係真愛！
經歷過今次咁難忘既紀念日之後，我感覺到我地之間既關係又再有進一步既昇華。
雖然我地已經係起唔同公司做野，但因為我地住得好近既關係，所以我地好多時都會約出黎！敏兒已經成為左我生命中不可或缺既一部分！
我地之間經歷左頭三個月既戀愛新鮮期之後都開始慢慢變左「世水長流」既愛情！
但我又點會估到，因為今晚既一個夢令我發現原來敏兒曾經有咁痛苦既經歷...