【夢幻】《我從來冇諗過我會有咁正既女朋友》: 漫淇
話時話，就算同左敏兒一齊，我都重會時不時起夢中夢見佢！但係感覺又好似好唔同咁....
但我又講唔出有咩大分別....
但我地兩個起夢入面所有舉動都更加親暱！雖然我地而家都好sweet, 但夢中既我地就好似真係拍左拖好耐，已經係準備結婚果種關係咁！
唯一解釋到既就係...應該係我好想同敏兒發展到呢一種關係！
起夢入面，我地一齊經歷左好多野。例如佢幫我搞左個生日驚喜party，我又送左條心型手鏈比佢慶祝佢生日！我地兩個就好似一直都陪伴住對方一樣！有一種勁老士「非她不娶」既感覺！
不過都唔出其既！小學雞既時候成日睇叮噹都知道大雄成日起夢中ff同靜香結婚架啦！
我就係果個ff怪大雄，而敏兒就係一個又pure又true既靜香！真係天生一對的一對！
敏兒好快就搵到份新工，係起一間廣告公司到做。
聽佢講佢同班同事都相處得好好，敏兒話起呢間公司做令到佢見識多左眼界亦都廣闊左。
起呢段日子就算我地起唔同公司工作緊，敏兒佢成日都會鼓勵我，而家我成個人都脫胎換骨咁樣！自信亦都多左！陣「毒撚」味都好似慢慢開始冇左咁！
我一直都諗緊送咩禮物比敏兒好！話哂我地第一個一百日喎！作為男朋友既我都好應該買份禮物氹下佢開心啦！ 其實我真係覺得你有幾鍾意一個人就會肯付出幾多起佢身上。
所以如果一對情侶，只有一方不段咁付出，多數最尾都係唔會有好結果！
始終有一日對方都會攰，唔想再單方面無了期咁付出落去！
敏兒有一個好朋友，佢叫漫淇。
個樣就普普通通正常女仔樣咁啦！未拍拖之前敏兒都比較少提起佢身邊既朋友。
而我識漫淇係因為同敏兒拍左拖之後佢先正式介紹比大家認識！
漫淇第一次同我見面既時候有少少驚訝，重發呆左幾秒。
但明明敏兒同我講話我地見面之前有send過我地既合照比漫淇睇！
佢應該唔會係覺得我真人同相好大分別掛...應該都唔會啊…
總知個感覺就好奇怪啦...而我對佢既感覺都有少少熟悉，好似唔知起邊到見過咁！
不過漫淇個樣都算大眾女仔樣，可能真係見過都唔出其..
但我地第一次見面佢真係由頭望到我落腳，唔通我之前真係見過佢但自己又唔記得左...
敏兒同我講話其實佢地唔係認識左好耐但就一見如故！所以好快佢地就做左好朋友！
敏兒話佢地係起一次朋友聚會到認識對方，呢一切都係緣份黎！所以佢都好珍惜佢地之間既友誼！
果次一齊食飯都睇得出佢地感情好好，所以我都諗緊問唔問下漫淇應該買咩送比敏兒做禮物好。
「hello ! 我係阿成啊！」最後我都係whatsapp左佢
「hello!搵我有咩事啊！」漫淇佢好快就覆左我
「我想買份禮物比敏兒，但係我又唔知應該送咩好...如果我問佢個傻女一定話叫我唔好哂錢買野送比佢！所以我都問下你意見！」我都費事轉灣未角，直接講重點！
「哦！明白！你聽日放工得唔得閒？我可以出黎陪你去揀下！」漫淇果然係一個好爽快既女仔，咁既性格都幾好。
「ok啊我！聽日見啦咁！唔該哂你！」好，聽日如果順利買得成就唔洗成日都心掛掛。
放工之後我走左去搵漫淇但我並冇同敏兒講，我只係同佢講好攰想返屋企休息下！
因為我都唔想比佢知道我約左漫淇去買禮物，打算比個驚喜佢！
雖然我係一個完全唔識製造驚喜既人，所以今次我真係要搞盡腦汁諗下點樣將成件事變得更加深刻難忘。
我同漫淇約左起尖沙嘴等！其實我本身都擔心大家又唔係話好熟會有少少尷尬，但出到黎都有幾多話題傾比我想像中更加輕鬆自在！
果然同得敏兒做好朋友既都係一個好女仔黎！
但今次見面漫淇佢比上次自然左好多，冇再好似上次咁望實我。
期間佢都有提起同敏兒點認識，都係同敏兒所講既差唔多！
但當我一提起敏兒曾經有腫瘤既事....
佢比我突如其來既提問表現出有少少嚇親...
跟住佢就開始回避我既眼神。 「醫生係咪真係話敏兒腦入面個腫瘤復發機會好微啊？」我見到佢咁既反應亦都表現出好緊張！一直追問落去，因為我好想知道敏兒會唔會對我有所隱瞞佢既病情...
漫淇見到我不段追問佢，只好停下腳步回答我既問題。
「係啊…雖然果時我未認識敏兒，但我都聽佢提起過呢件事。你真係唔洗咁緊張同擔心，你睇下而家敏兒佢幾健康先得架...佢都同我講左醫生話切除左個腫瘤所以復發既機會係好微！所以佢唔會有事...」
但我睇得出漫淇講呢一返說話既時候，佢係刻意唔望住我黎講！
而且當我一提起敏兒曾經生腫瘤既事，佢顯得有點不知所操同埋雙眼通紅，好似想喊但又死忍住咁...
我唔明點解我一提起呢件事，漫淇會有呢個反應。
我唔知漫淇係因為心痛佢好朋友曾經有呢一個咁痛苦既經歷，定係中間有啲係我唔知道既事....
又有可能係我諗得太多，因為上次果一個夢始終令我心入面有所顧慮.... 後尾我起到諗，如果敏兒真係有機會舊病復發的話，我相信佢係唔會答應同我一齊！所以我都冇再追問落去....
我地最後去左一間賣首飾既鋪頭買左條頸鏈，係一條寫住「The One 」既玫瑰金色頸鏈。簡單得黎又帶出到個意思！ 你是我的唯一喎！我係女見到都會好冧啦！
「我相信敏兒一定會鍾意呢條頸鏈！」漫淇既眼神好肯定咁講呢一句說話
「我都覺得係！今日真係唔該哂你啊！如果冇你起道我真係有排都諗唔到買咩禮物好。」
「你對敏兒好就得架啦...記得好好珍惜敏兒...」佢係用一個好認真既態度望住我講並唔係語中帶笑，而且我睇我出佢眼神有一種好隱晦既感覺。
不過就算佢冇咁同我講我都會咁做。
我並冇同漫淇一齊食飯，亦都冇好似成日起高登都會見到「仆街啦！唔小心中出左女朋友best friend ！」既情節，都係大家各有各返屋企！
雖然唔係同漫淇好熟，但我既直覺覺得漫淇一定有啲野..
可能未必關於敏兒既病情，佢比我既感覺就好似自己收埋左好多野起心入面，但係又唔會同人透露既事。
佢望住我面帶微笑揮手講拜拜，但我睇我出並唔係由內心發出既笑容，似係強顏歡笑多啲。
但我都冇理到佢咁多喇！可能佢份人係比較奇怪少少啦....
而家既我反而係開始期待敏兒收到份禮物會係有咩心情！