【夢幻】《我從來冇諗過我會有咁正既女朋友》: 敏兒經歷
白濛濛一片既畫面又再次出現！好快我就見到有一塊好大既牌寫住「長洲」！點解我會黎左長洲既....
「快啲去租單車啦！好耐都冇踩過單車啦！」下一秒已經聽到敏兒把聲，佢起我旁邊拖住我隻手去緊租單車既鋪頭！
「重有啊！今日我要食好多好多野！有大粒魚蛋啦！芒果糯米池啦！雪花冰啦！巨薯棒啦！總知就要食好多好多啦！」敏兒就好似一個大細路咁不斷講自己要食咩食咩！真係好活潑可愛，如果係其他人我應該會覺得好撚煩膠！
「靚女！你想租情侶單車定一人一架車啊？」單車鋪老闆好熱情咁介紹佢間鋪有既車款
「我要自己一架啊！唔該你！」敏兒好快手就揀好左自己既戰車！
「你唔想我車你咩？」我有少少失望，因為我心諗敏兒一定會揀果架情侶單車架嘛！
「我想自己踩一架單車啊！哈哈！」敏兒一邊講一邊調較緊個單車座位，睇黎佢都係懷着未出發先興奮既心情架喇！
「好啦咁！我都揀返架戰車唔好輸蝕比你先！」男仔係呢個時候揀車，最緊要係型！就算係單車都係咁話！
「好啦！開始出發啦!GO GO GO ! 」敏兒好快就偷步開車走左！
而我都唔執輸跟隨起敏兒車尾！好彩街道上冇乜行人姐！
由碼頭轉左再沿海邊踩，我地沿途欣賞長洲既景色，經過一列食肆球場，就會見到一個冇船停泊既海邊。
我地停左落黎欣賞海旁既景色，真係好靚！香港應該做多啲綠化既工程，而唔係起埋啲乜鐵乜公路再瘋狂填海！
真係唔好浪費左一個好靚既海港！
海風吹埋黎真係好舒服，重有一陣啖啖既海水味。此時此刻，再加上有敏兒起我旁邊相伴，我真係覺得自己係全世界最幸福既人！
叮！叮！叮！叮！無錯！我比whatsapp既訊息提示聲嘈撚醒左！今日明明day off邊春個咁早啊！
「Hey ！死仔起左身未？」下刪一千個問號！原來係志威個仆街仔晨早流流擾人清夢！好明顯佢係有心嘈醒我架喇！
「屌你啊！比你嘈撚醒左啦！」我即刻打電話比志威屌佢，對住志威永遠都可以做返自己。
「拿！而家有好野益你！我公司搞左個戶外活動，但呢而家就唔係好夠「腳」，所以就打算預埋你同你條女黎一齊玩！」唔知點解由志威把口講出黎成件事又真係好似我賺左咁！不過一場老死，明知係為左湊人數都要去架啦！
「好啦！應該冇問題！一陣再覆你confirm！」跟手我就打左比敏兒啦！平時敏兒咁鍾意玩戶外活動，我相信佢一聽到即刻會換衫出黎！
「好啊！幾點邊到等啊！」如我所料....敏兒二話不說就答應左！
「十二點！好似話大埔！我諗都係行山果啲架啦！你著對舒服啲既鞋就實冇死架啦！」
「好啦！一陣見啦！拜拜！」敏兒應該都係搵緊衫，我有啲期待佢今日會係咩打扮 。
我地約左起沙田站等，跟住再一齊搭火車入大埔！
今日敏兒著住一件淺藍色既「連身背心牛仔褲」，大家應該都想屌我講緊乜春架啦！又連身又背心又牛仔褲咁鬼死複雜既... 唉！我都費事解釋有幾吸引...你地自己睇圖就明。
敏兒同呢個打扮唯一既分別就係...佢入面件打底係白色，同埋今日敏兒係all back 頭，更加突顯佢既完美額頭。 咩係完美額頭？就係額部平坦，微微向上突起喇！
身邊有一個咁正既女朋友，我相信今日都會招人妒忌架喇！唉...我都唔想...
當我地去到大埔火車站之後就好快見到志威同佢公司既人，志威真係成個大老闆咁款，雖然佢真係....
我相信佢將來一定會成功，唔洗比人話靠佢老豆！
佢公司班男人見到敏兒個個都「目不轉晴」咁望實佢，不過好快佢地都見到我地兩個隻手係拖埋一齊，咁大家都好識做冇望落去喇！
「拿！夠哂比面你喇掛！兩個人都出現哂！今日有咩搞先」我搭一搭志威膊頭
「今日我地去踩單車，踩到入大尾篤再去燒野食！係咪好正先！」志威係今日既搞手，所以佢一路講既時候到好興奮！比佢搞到我都high埋一份！
明明琴日先發完夢同敏兒去踩單車，今日又再實現左！屌！有冇咁益我啊個天！
「敏兒！今日天氣咁好真係岩哂去踩單車，你應該都實識踩架啦！」當我講呢句說話既時候，我留意到敏兒既面色開始有所轉變！
「敏兒！你係咩呆哂啊！係咪唔舒服啊？」敏兒冇比反應我，淨係成個人呆左咁企起道！
「我唔想踩單車，我最憎就係踩單車！」敏兒冇啦啦好激動咁講，我都係第一次見到敏兒用咁激動既語氣講野。
我見到敏兒咁大反應，我都呆左一下！唔識比反應佢...
我拉埋左敏兒行開一邊，再同志威講聲叫佢地行先，一陣再call佢！ 志威見到敏兒咁唔尋常既反應佢都好識做咁自己出發先！因為志威都見過敏兒好幾次，佢都清楚知道敏兒係一個點樣既女仔！
諗走前重打左個眼色比我，叫我有咩事記得call佢！
「敏兒！你做咩冇啦啦咁激動啊！發生咩事啊！」我捉住敏兒雙手，希望佢可以冷靜落黎！
起呢一刻敏兒冇啦啦喊住咁攬實我....
「爸爸！我好掛住你啊！」敏兒攬得我好實好實...我冇再問佢任何問題，只係互相擁抱著對方...
持續左五至十分鐘左右，敏兒開始冷靜落黎，將佢雙手放開...
「仲成..對唔住啊！岩岩咁大反應，係咪嚇親你啊？」敏兒個人都平靜左落黎望住我講
「冇事！你而家平靜返就好啦！岩岩我好擔心你啊！」我一面擔憂既表情望住敏兒
「你係咪從來都好少聽我提起我屋企人...」敏兒用好低既聲線咁問我，感覺上佢好似要講佢曾經一段憂傷既經歷...
我並冇回答，只係示意敏兒可以繼續講落去。
「我爸爸係一位單車運動員，佢好鍾意踩單車果一刻既快感，同埋一陣陣涼風吹埋黎另佢感到好輕鬆自在既感覺。當佢起踩單車既時候，係佢最開心做返自己既時候！
佢同媽咪好細個就結婚生左我出黎！佢地結婚係因為有左我，果時媽媽已經即刻打算去醫院落左我，但爸爸堅決反對。因為佢覺得我點都係一條生命，要佢唔要我佢真係做唔出。
最後媽媽起我好細個既時候已經再嫁左去美國，我地一直都好少接觸。
而我學識踩單車都係因為我爸爸教我....果時我都重係一個小朋友。
由一開始不段跌倒，要佢扶住我架車向前推我，直到佢慢慢放手比我自己去嘗試。
中間我失敗過好多次，但我好記得爸爸同我講過，人生總係有起有跌。起邊到跌低就係邊到企返起身...
呢句說話好多人都識講，好多人都知道。但又有幾多人可以真正做到...?
我同爸爸一直關係都好好，佢亦都好錫我，我好感謝上天比我有一個咁痛錫我既爸爸。
直到有一次，爸爸佢因為一次比賽而意外受傷....
醫生話呢一次受傷係因為比賽時外力的衝撞, 摔車導致的身體結構傷害。所以爸爸需要接受一段好長時間既物理治療，亦需
要好長時間去慢慢康復。
呢次受傷最大既代價就係....
永遠都唔會再做到職業單車手...
試問對一個由細到大既夢想都係做職業單車手既人黎講，係一件幾殘忍既事....
果時我重係讀緊中三....
我眼見爸爸咁樣我真係冇辦法可以專上堂同讀書...
爸爸日日都會去「睇人」進行單車訓練，佢起我前見裝扮到好樂觀日日都去醫院接受物理治療，但其實我知道..佢內心好難受好痛苦...
其實爸爸可以有其他既出路，佢可以選擇做教練...但佢冇....
最後佢都係放唔低....佢選擇左輕生。
有一日返學上堂既時候，我收到一個令我崩潰既消息。
爸爸因為自殺入左醫院，經過努力搶救之後証實不治....
我個腦果一刻係一片空白...個身不段係咁震...我同自己講唔會係真架...唔會架....爸爸唔會自殺架..
明明爸爸講過起邊到跌低就要起邊到企返起身架...
點解我聽佢話，我做得到！我跌到起身再嘗試踩單車...點解佢唔可以啊….
果一刻我唔再相信呢一句說話...點解佢要扔低我自己一個...點解我起媽咪個肚入面既時候，佢堅決要生我出黎...但十四年之後...點解佢要咁對我....
有一刻我對爸爸係帶點憎恨，但好快...我將憎恨轉變成痛苦。
呢件事上哂新聞..而身邊熟悉我既朋友都知道，我對踩單車有一種心理陰影。我以後都唔想再踩單車....
起街道上，我見到有人踩單車我會冇乜特別感覺。但我自己就真係做唔到，我知道自己一踏上單車果一刻，腦海裡面就一定會浮現起爸爸係因為「單車」而去自殺呢個事實..
我腦海裡面，自動浮現左一首歌既歌詞同旋律。
陳奕迅 － 單車
不要不要假設我知道 一切一切也都是為我而做
為何這麼偉大 如此感覺不到 不說一句的愛有多好？
只有一次記得實在接觸到...
騎著單車的我倆 懷緊貼背的擁抱
難離難捨想抱緊些 茫茫人生好像荒野 如孩兒能伏於爸爸的肩膊
誰要下車 難離難捨總有一些 常情如此不可推卸 任世間再冷酷 想起這單車還有幸福可借
https://www.youtube.com/watch?v=lfXYMDGk7ek
“難離難捨，想抱緊些”，寫出左對呢份父愛既眷戀與不捨，就好似敏兒一樣。
我同自己講....我呢一世都唔會再踩單車...係呢一世都唔會....
敏兒一路講一路不停流下眼淚….我見到佢咁我個心真係好痛好痛...就好似自己親身經歷咁一樣....
「好對唔住...勾起你咁難過既記憶...」我再比敏兒一個擁抱，因為我知道...呢一刻敏兒最需要既係溫暖同愛....
如果唔係因為今次既事...我諗敏兒都唔會主動向我提起佢以前既經歷...
我亦從來唔會過問起人地屋企既家事，因為我都唔會鍾意人地問起關於我屋企既事。
因為呢一次，我對敏兒之前既事的確了解多左。亦都因為我知道左佢既悲慘過去，更加想比到幸福呢個女仔。
我從來都冇諗過，敏兒燦爛既笑容背後原來係隱藏住一種悲傷。
究竟我對佢既認識係多左…定係我從來都未真正認識過佢呢...
究竟夢中好享受踩單車果一刻既敏兒，又係唔係真係佢呢...
我開始發覺...現實中既敏兒同夢中既敏兒真係有好大既出入....
佢地雖然性格係相似，但係佢地比我既感覺真係好唔同。
雖然我明知夢中既佢，並唔可以代表現實中既敏兒....
但相比之下...現實中既敏兒比我愈來愈陌生既感覺，原來有好多野我都未了解清楚佢....
又或者係...我從來都冇了解過佢.....