原來……由始至終我都只係一隻 觀.音.兵: 12
又過左一日，我地出左去中央圖書館度整IPHONE殼DIY
其間我見佢不斷同人MSN
雖然我個心都有D唔舒服
但係我不斷咁同自己講「算啦，人地個人都比我霸住左，唔通同朋友MSN都唔比咩」
所以我都冇理佢
食飯既時候，佢同我講
：你個樣好似有D唔開心喎，你係咪有D野想講呀？ 
：冇呀 ：阿邊個邊個而家冇男朋友喎，不如你去媾人啦
(聽到佢咁講，其實我個心好唔舒服)
：好地地做乜要媾人姐？你明知我鍾意你架
其實去到呢個地步，係佢仲未接受我既時候，我知道我已經輸哂
我本來話請佢食，但係佢話
：唔好啦你又唔係我邊個，你請我我會唔好意思架 但係最後我都好堅持咁幫佢比左錢
之後我地坐同一架車番屋企，早我幾個站落車既佢
一落車就即刻好急咁即刻打電話
我唔知電話裡面係邊個
唔通係B？冇可能既M平時講到佢咁乞人憎
唔通係果個澳州番黎既朋友？有可能喎佢地咁熟…
所以一跟住落黎果幾日我都有點鬱鬱不歡，直至1月11日…
今日中午既時候佢MSN震我
：大鋼砲，我係咪好樣衰呀？ ：唔係，點解你咁講呀？ ：琴晚同B既朋友一齊食飯，當中有一個女仔，人人都讚佢靚讚佢可愛，我好自卑呀… ：你咁多人疼錫都自卑？咁我點算 ：我講真架我真係好唔開心 ：點解要同人比較喎，而且你都好可愛，如果因為人地靚過你你就唔開心，咁你咪好唔得閒？ ：我喊了，個個都鍾意同佢玩，佢地覺得我幼稚，因為佢又識玩飯啤酒又識玩骰盅，而我就淨係識得坐係度傻笑 ：咁又點？ ：好過我，淨係識得去迪士尼，猜包剪踎，飲果汁，成床公仔，咁大個人都仲成個小朋友咁，我好羨慕佢，成熟又得，可愛又得，幼稚同小朋友，就跟我一世 ：我就覺得，好似你咁純情既女仔而家已經好少見，唔通一定要做一D對自已冇益既野先至叫做成熟？，起碼你潔身自愛 ：不過呢年代仲興純情咩？ ：有邊個唔鍾意乖乖女？有分年代既咩？你冇必要為左迎合人地而改變自己喎 ：我認我純情，不過呢個社會已經好少人鍾意，好彩比我識到你
1月12號，星期三
我約左班朋友去左旺角唱K
其間我同M一路都冇聯絡
直至我地成班人行去沙嗲王食晚飯既時候
電話響起，係M
：喂，你係邊呀？ ：我係旺角呀 ：係旺角？邊個批准你去旺角呀？ ：我同班朋友去唱K咋嘛 ：有冇女仔架？ ：有既但係我唔識佢地架 ：哦！有女仔！你應承過我唔同女仔出街架！ ：對唔住呀，而家我地食緊飯呀，不如我番到屋企打比你丫 ：你而家同我講你掛住我丫 ：下…而家成班人望住我好尷尬喎 ：快D講呀！ ：哦…我…好掛住你囉 ： 你番到屋企打比我啦，ByeBye去到1月14號 果輪我岩岩跟我老豆學攝影
我就提議一齊出去玩，順便叫佢比我做攝影既練習對象
於是我同佢去左郊外地方一邊玩一邊影相
我地都玩得好開心
走既時候，因為果度好暗，佢話
：好黑呀，我驚驚地，不如你拖住我丫 於是我好開心咁拖實佢隻手
行左一陣，佢話
：算啦你都係搭實我膊頭啦 於是我照做，但係我已經好好好開心了
沿途大家都傾左好多計
：哼，你話過唔會同第D女仔出街，但係前日你先破左戒 ：對唔住囉 反正果D女仔我都唔識既 ：哼，果度入面實有人鍾意你啦 ：咁…你鍾唔鍾意我呀？ ：唔知呢 1月15號
我地再出去赤柱影相兼郊遊
赤柱夜晚既時候，海邊既樹都會有燈飾
個感覺好浪漫
有一刻我係度較緊部相機，M係隔離望住我
：做咩事呀 ：冇呀，岩岩有一秒既衝動想錫落你度 呢兩日我地真係玩得好開心
不過赤柱海風大，比我搞病左佢
又過左兩日，因為呢輪開始搞ADD/DROP 我同佢講好左大家夾個時間一模一樣既TIMETABLE
果晚我就一路同M傾住電話一路搞ADD/DROP搞左三粒幾鐘
臨走既時候佢係電話同我講
：大鋼砲我好掛住你呀，我好想見到你 ：既然咁想見到我，不如你索性做我女朋友啦… ：咁又唔好，太急進喇 之後我地約好左兩日後又去迪士尼玩1月21號
我地又去左迪士尼玩
果日佢病病地
夜晚睇煙花果時佢挨落我膊頭度同我講
：你真係對我好好呀 ：其實咁多男仔追你，我呢D算得乜野吖 ：冇呀，咁多個之中你對係最好架 跟住我攬住佢錫左佢塊面一下
佢亦都冇抗拒
走左之後，我同左佢去睇醫生，佢媽咪亦都黎左
佢媽咪同我講
「平時我個女一病我就騰哂雞，有你睇住我真係放心哂」
其實我好開心，平時我人緣不嬲都唔太好
有幾可連人地阿媽都鍾意我
之後既一個月，我地雖然唔係情侶，但係關係一直好好
幾乎一個星期見足七日
就快到情人節啦…
我諗住早D約佢廢事佢會比第二個男仔約左
情人節前既三個星期我已經開始問佢得唔得閒
但係佢一直支吾以對
：我都唔知呀，你睇我而家病成咁，我都唔知到時我好番未 所以我唯有等到到時先再約佢