早兩日OT遲收工,女上司叫我上去佢屋企..: 20

我: 走吧啦....
Jenny眨左下眼, 突然間禁撥號,
我反應得黎果陣, 佢已經係到講: "喂, 999呀? 呢到係...."
露宿者一二三四五號, 成班即刻彈起身, 係咁叫唔好,
但Jenny冇理佢地, 講左聲ok , 好快就收左線....
 
靜左一陣, Jenny終於開口, 好溫柔咁講: 唔理你地係邊個, 生命就係生命, 係冇價.
 
"如果班警察對你地做咩事,即管同我講, 我一定會竭盡所能, 去幫助你地!!"




露宿者....屌...唔講幾多號喇 ,總之佢地一臉感動,
仲有幾個流馬尿添....
 
點解呢個女人會咁固執?
點解呢個女人, 弱不禁風, 但好似一座山咁穩固?
點解呢個女人....會咁好?
 
如果我係一個壞燈泡, 佢就係可以修理我既灰士.
重新照亮番我既生命.


 
Jenny用肘批左我一下: 阿冷仔同我一樣, 都會支持你地, 撐你地撐到底, 可?
我沉默左一陣....
 
"嗯"
醫院長櫈,
我同Jenny坐左係到, 好安靜,
佢真係好擔心阿九, 而我,
對眼一直偷偷地望住果兩個係汽水機吹緊水既警察,
表面好震定, 但心一直忐忑不安.


 
胡思亂想左一陣,突然係到諗,
我到底做緊d乜. 點解會係呢到?
我應該好快派完飯就走, 完滿結束消肉行動,
但...但我竟然係最後都支持Jenny報警....
天啊.....



"唔該 , 有冇安九既親屬係到?"
 
聽見護士叫, Jenny扯住我: 係係係!!!!
 
兩條警察跟住我後面, 我吞左啖口水,
抱住死就死啦既心態入去,


 
一入到去, 個醫生就罵: 你地到底俾佢食過啲乜呀?
 
我臉如死灰, 冇喇...估唔到呢個四眼仔咁勁,
一檢查就check到係人肉.....
 
我望一望後面既警察,
阿冷....不如而家自首啦?
自首刑期會輕D....
 
但會累左Angela....因為我咁蠢...而累左佢....
唔得....唔可以.....點算....
 
當我心灰意冷時候, 隔離既Jenny好正常咁講:
"冇呀, 咪俾左我地平時煮既飯佢地食囉....啊!!!...我見今日天氣熱, 請左佢地食雪糕...啊!!!...阿九食完之後就咁....唔知關唔關事...."


 
醫生拍左下響指 :
"right! 病人年紀唔細, 腸胃有問題, 非常敏感, 普通飯菜冇問題, 但冷冰食物, 一啖仔都唔可以食."
 
阿九已經醒番, 只見佢一臉憔悴,
醫生一個華麗轉身, 對住佢講:
"自己身體, 自己最清楚, 你冇理由唔知."
 
阿九哈哈笑左聲, 望住Jenny:
"靚女一番好意....小小痛苦又有咩所謂呀...我呀, 成世人, 都未食過咁好食既雪糕呀....咳咳...."
 
Jenny忍唔住掩住番臉, 佢忍住眼淚 : 等你好番, 我再買俾你食....
 
雖然場面好感動, 我個心情亦由地獄衝番天堂, 但...我屌你, 明知自己有事就咪撚食啦!!!
 


醫生呢個時候突然間講: 仲有, 呢排安九係食咩架?
Jenny同阿九望住我, 我有d心虛: 肥牛肉...
 
醫生對眼好銳利, 似乎想望穿我咁, 望到我靈魂深處....
但一秒之後, 佢就再拍左下響指: oh! 佢腸胃唔好, 肥肉都應該盡力要避免...ok?
 
我猛咁點頭: okokokokokok!!!!!
 
"好, 出去等拎藥啦 , 佢可以即刻出院架喇."
 
嗚呀....大步攬過....
身後果兩個警察, 都似乎靚仔左
 
順番條氣, 突然間又諗起,
阿九岩岩都冇食我d飯, 早一日既應該都消化哂啦,


就算拎出黎check ,果一團消化物, 應該都唔會check到啦....
屌...白緊張一場....