早兩日OT遲收工,女上司叫我上去佢屋企..: 21

出到去, 等拎完藥, Jenny扶著阿九, 準備閃水
但當果兩個警察經過, Jenny忽然間叫住佢地: 喂!!!
 
嚇左我一大跳, 警察一回頭, Jenny就一輪嘴咁講:
"你地做警察既, 好心專心啲捉賊, 除暴安良啦, 露宿者係人,唔係沙包呀!!!"
 
警察似乎冇料到一野就俾人篤穿, 口窒窒咁 :你..你講咩呀? 亂講野我可以搭你番去.
 
Jenny: 拉我囉!
 


佢舉高個電話, 叉住條腰 : 呢個係我識既傳媒記者,律師, 監警會既list , 如果再有同樣事情發生, 法庭見啦.
 
警察呆左一呆, 一個想講野, 另一個就捉住佢, 最後好快走左....
 
Jenny一個女人仔, 面對住兩個牛高馬大既警察, 氣勢一啲都唔輸蝕...
佢真係好閃耀.
 
"冷....你岩岩會唔會覺得我好惡呀?"
 
送左阿九番公園, Jenny同我一齊行,


途中, 佢問左呢句說話.
 
我搖搖頭: 好正.
Jenny: 咩正呀?
我: 我講緊你, 煮野又好食, 又善良, 又不畏強權, 唔正咩?
Jenny打左我一下:口花花 ...但你又講得冇錯喎...哈哈!!
我: ...
 
好快就去到地鐵站, 同Jenny講左byebye,
轉身果時, 佢叫住我 : 冷! 月尾同你慶祝生日呀! 記得呀!


我呆左一呆, 笑住點點頭.
 
同女人慶祝生日....係我從來未諗過既事....
但我可以想像到, 同Jenny一齊過, 一定係件好溫暖既事..
 
不知不覺行番上唐樓, 一打開門, 就見到沙發坐住一個女人.
佢好靚, 但佢目無表情.
 
Angela.
 
沙發隔離, 係Angela既喼同行李,
放係到原封不動咁, 佢係岩岩番?
定係番到黎一直等緊我?
 
我唔清楚, 只係知道Angela目無表情咁望住我,


佢依然係咁靚, 小小化妝, 更突出佢既輪廓,
但我突然覺得佢有d恐怖....
因為,佢係一個殺人兇手....
推開對門後, 我好似由陽光閃耀處, 行到隧道裡, 最漆黑既地方...
由舒舒服服, 隨隨便便, 變番做戰戰兢兢既人....



Angela: 咁夜, 去邊?
我: 照計劃派飯...已經全部派完
Angela:喔.
 
佢冇再問我詳情, 冇問我點解派飯派到成十二點,
冇問我中途有冇發生咩事,
我都冇問佢去台灣點樣, 見客見成點,


異常既沉默, 令氣氛愈來愈僵硬.
 
短短一星期冇見, 點解我同佢好似變番陌生人咁?
而家先想起, 本來我地就係咁陌生....
 
突然間, 我好掛住Jenny.