早兩日OT遲收工,女上司叫我上去佢屋企..: 19

你班契弟....暈左又好,死左又好,
關我撚事咩, 咪阻住我同Jenny吹水先得架....
 
呢個念頭一閃而過, 但身體唔受控制,
好快跟住Jenny衝左過去.
 
Jenny好焦急咁問: 發生咩事呀?
露宿者一二三四號: 唔知呀, 阿九岩岩話肚痛, 訓下教就冇事, 但突然間就暈左, 岩岩仲係咁嘔添呀!!
 
我望一望阿九, 佢臉都青埋, 鬍鬚都係口水, 神智不清咁,




心裡一寒, 肚痛? 唔係呀化, 唔通係食左我d飯?
你班粉腸食左成個星期明明冇事, 偏偏最後一日先有事?
 
Jenny望左阿九一眼, 即刻拎電話出黎: 報警啦!!!
 
乜話......報...報....報.....報警?
簡單兩個字, 聽到我個心都震埋,
望住Jenny開始禁電話, 我手足無措,
搶佢電話過黎?
但搶完之後用咩原因?




咪浪費地球資源?
唔得....唔可以....點算...點算好?
唉, 唔理, 搶左先算,
一定唔可以報警!!!!!
 
正當我想搶過黎, 突然間有隻手比我仲快,
蓋住Jenny隻手, 我抬頭一睇,
只見岩岩衝過黎果個露宿者,
一臉凝重, 咁搖搖頭.
 




其他露宿者似乎都知咩事, 個個苦笑.
 
"報警冇用, 警察唔會理我地,
我地條命,唔值錢, 唔會有人理...."
 
Jenny呆左, 差少少就禁到撥號,
我鬆左一口氣, 你條垃圾呢世人做得最好係呢次喇.
 
"之前我地俾d街童打....我去左報警...
警察黎到...冇幫我地查不特止....仲拖我地去角落頭打....
話我地阻住佢地食宵夜.....屌佢老母...."
 
隔離一二三四號露宿者都加把嘴:
"佢地仲時不時過黎搵我地發洩...
話打死我地都冇人會在意, 冇人會理....當我地免費沙包...屌佢老母..."




 
露宿者苦笑, 再搖頭:
" Jenny姐...你既好意我地心領喇....我地...承受唔起"
 
生活係中產階級既Jenny, 聽完之後係完全呆左.
可能, 佢從來冇諗過, 世界係如此黑暗.
 
"阿九,佢訓下就得架喇...訓醒冇事架喇...多謝你地d飯...我地訓覺啦....早抖"
 
露宿者一二三四五號好似若無其事, 慢慢咁番去自己個狗竇,
留番Jenny同我棟係到,
Jenny望住佢地捐入地鋪, 仍然呆左係到.