早兩日OT遲收工,女上司叫我上去佢屋企..: 18

"我食!"
 
一瞬間,我搶走個飯盒, 再整跌佢既匙羹,
即刻狼吞虎嚥, 大啖大啖咁食, 由我一手煮出黎既飯盒.
 
Jenny呆左一呆, 可能佢從來未見過我咁激動,
我食左Jenny個飯盒, 個肚已經好飽,
再加埋我知道呢盒係人肉既心情,
根本完全冇食慾.
 




但我一啖, 又一啖, 將果d肥油滿瀉既人肉同飯, 放入口中,
幾乎咬都冇咬, 就吞入食道.
 
可能, 呢d係報應
 
人肉既味道, 同牛肉冇咩分別, 感覺上味道仲濃郁d添,
加埋我醃製左咁耐, 又落埋醬汁, 同茶記果d燒汁扒飯差唔多,
但係, 我最清楚, 呢d係人肉, 係我一手一腳係martin身上,
全手鮮血, 割落黎既肉.
 




Jenny好安靜咁望住我, 我好快就食哂, 同佢兩眼相接,
突然間諗起其實我可以掃跌盒飯 , 咁大家唔洗食,
但唔得....
因為, 唔可以浪費食物....
唔知幾時開始, 我已經俾Jenny感染....
 
"阿冷....你冇野呀嘛?"
 
我忍住想嘔吐既感覺,搖搖頭
 




Jenny好擔憂咁望住我,
我等到最後一啖落隔, 終於呼出口氣: 飽哂.
Jenny : 有冇咁肚餓呀? 人地想試下你d手勢都唔得...
 
我: 我煮得冇你咁好食....點敢係大廚面前獻醜...
 
Jenny笑得好甜, 最後打左我一下就算,
呢個女仔真係完全冇機心....
突然間覺得, 盒人肉飯都唔係咁難頂姐.



"係喎,阿冷,你係咩星座架?"
 
我從來都唔信星座, 不過Jenny問到,




我唯有講係雙子座, 毒氣果隻
 
Jenny好驚訝: 咦? 咁你生日未?
我: 嗯...好似未...今日幾多號?
Jenny: 唔係掛? 生日都唔知過左未? 你幾號生日?
 
我講左個日期, Jenny更加驚訝咁講: 咦!!!!月尾就係啦喎!!!
我: 係咩, 冇所謂, 年年都係咁過
Jenny: 點過? 同女朋友慶祝?
我苦笑: 痴線, 我都冇女朋友, 係屋企打通宵機渡過囉
Jenny: 好毒呀你....
我: 毒氣雙子就係咁....冇計....
Jenny: 哼哼, 咁我大發慈悲, 幫你慶祝下啦!
 
我呆左呆, 正想說話, 但聽到成班露宿者係到嘈,




岩岩果個露宿者跑過黎大叫: 救命呀!!!!!冷仔, Jenny姐 , 阿九佢暈左呀!!!!