《台灣個表妹嚟咗我屋企住》【完】: (二十九)生活模式

入夜之後，又到咗小南大展身手嘅時候，明明佢係嚟我屋企住，但點解好似變咗工人咁幫埋我哋煮飯嘅⋯⋯不過有得食，小南唔介意，咁就冇咩所謂啦，反正佢原本煮得咁難食，依家咪當訓練下啲廚藝囉。

出街食咁多味精，終有一日都會覺得厭，但喺屋企食住家飯，就永遠都唔會，因為食嘅唔單止只係一餐飯，仲係食緊一種溫暖。

試問每日返完工放咗學真係唔辛苦㗎咩？帶住疲倦嘅身軀返到屋企，有人喺屋企煮好返等你食，一日都諗咗咁多嘢，但嗰一刻你唔洗諗食啲咩，一日承受咗多壓力，但喺屋企有人肯陪你傾計。

媽媽畀得到我嘅，阿爸只有一部分，而小南就好似媽媽一樣畀得到我⋯⋯

食完飯之後，小南去咗沖涼，而我就洗埋啲碗，阿爸就喺廳度睇佢嘅cctvb。





今日同兩個死黨食完嘢，仲拎埋袋洗好咗嘅衫，我返入房拎返袋衫諗住攞去露台用衣架掛起佢。

因為媽媽唔喺度之後我哋已經甚少用部洗衣機，所以就算連部機壞咗我哋都冇換部新或者攞去整，而係會拎啲污糟衫去附近一間洗衣鋪度畀人哋洗，對於我同阿爸兩個比較懶嘅人，真係係覺得好方便。

將啲衫掛起曬之後，我就無意中見到喺洗衣籃入面都有啲污糟衫褲，仲有啲少女嘅內衣⋯⋯連條粉紅色底褲上都有hello kitty嘅圖案⋯⋯

一睇就知係小南㗎啦⋯⋯佢究竟有幾迷戀呢個卡通人物呢？

佢一定唔知道我哋屋企已經唔會用部洗衣機，咁一陣就同佢講返聲喇，搵日幫佢拎去洗衣舖度洗埋佢。





不過屋企多咗個女人喺度⋯⋯生活模式係改變咗，但喺生活上都好似有啲啲尷尬。