《台灣個表妹嚟咗我屋企住》【完】: (三十)夢遊

小南沖完涼出嚟，就返咗入房攞風筒吹乾個頭。

而我就過去同佢講：「表妹，露台啲衫係咪你㗎？」

小南一邊吹頭一邊慢慢轉身過嚟。

「係呀係我㗎。」

「部洗衣機壞咗㗎啦，洗唔到衫㗎。」我再話：「你將啲污糟衫褲照放嗰度，我搵日幫你拎去洗衣舖洗啦。」



「嗯！好呀，唔該表哥。」小南向我微笑一下。

「仲有呀，我聽日帶你去我個朋友屋企燒嘢食呀。」差啲唔記得講埋依單嘢。

一聽到個食字，小南一定會好興奮咁話：「好呀！」

輪到我沖完涼之後就準備返房瞓覺，諗返起前幾日小南喺我個書櫃度攞咗啲書去睇，我去望一望我個書櫃，發現好似幾整齊咁一本書都冇少過，我估可能啲書小南啱睇啩。

其實我唔淨止睇小說，書櫃度都有好多多啦A夢嘅漫畫，係我細細個嘅時候睇，我諗每個人嘅童年都有自己鍾意嘅卡通人物，如果小南係鍾意hello kitty，咁我就係鍾意多啦A夢。



因為多啦A夢有好多好多法寶，每當大雄遇上困難嘅時候，總會有一件法寶可以幫到大雄，只可惜喺現實生活入面根本就唔會有法寶去解決困難，好多時候都要靠我哋自己。

喺無人夜深熄咗燈之後，瞓瞓下⋯⋯

突然喺門外又傳出一啲怪聲⋯⋯

死啦！唔通啲鬼係醫院跟住我嚟咗屋企？雖然我唔信有鬼，但心理作用下都係覺得好似有啲嘢。

嗰情況就如同我上個星期咁一樣，表妹第一晚喺屋企住嘅時候⋯⋯



又係有腳步聲，好似有個人徘徊喺客廳度咁。

上次太攰冇理到，今次點都要睇下咩事㗎啦，如果係鬼我諗都未必會驚，因為睇得太多鬼故嘅關係已經產生咗抗體，但係如果係賊，我諗真係會驚一驚，然後要大嗌阿爸過嚟，咁先制服到個賊。

我冇開燈，然後起身行過去緩慢咁打開房門⋯⋯

就喺眼前⋯⋯又一個人企咗喺度，烏黑嘅長髮遮蓋咗佢嘅面孔，佢嘅身上散發著一陣陰森恐怖嘅感覺。

我當場呆咗，莫非佢就係傳說中嘅貞子？我再呆呆地咁由佢身上望落去，見到hello kitty⋯⋯

噗！

突然之間，眼前嘅''人''成個身撲埋嚟將我推落床上，然之後成個人瞓落嚟壓住我，而我只係感覺到胸前好似有啲軟軟地嘅嘢。

睇真啲，原來係小南⋯⋯



佢嘅雙眼合埋咗，而且嘴角仲流咗啲口水，佢咁嘅模樣應該係瞓緊覺，進入咗夢鄉。

佢半個身壓住咗我嘅右臂，令到我動彈不得。

睇嚟小南係有夢遊，所以先至會盲中中遊咗入嚟。

叫唔叫佢起身好呢？我一直喺度掙扎緊依個問題，我將可以空出嘅左手舉起想拍一拍小南，但又停咗一停，諗咗一諗。

我驚嘈醒佢⋯⋯

又唔想佢走喎⋯⋯

所以我又放返低隻左手，而右手因爲畀佢壓住咗，開始有麻痺嘅感覺，完全郁唔到。



「表⋯哥⋯我⋯要⋯食⋯嘢⋯啦⋯」估唔到喺夢鄉嘅小南，連發開口夢都係講緊食嘢。

睇嚟呢個姿勢應該要持續落去渡過一晚，我驚小南會凍親，於是用我僅有嘅左手捉住喺床邊嗰張被，之後用力一拉，啱啱好蓋住我同小南嘅身軀。

最後我就係被逼以咁嘅姿勢瞓覺。