《台灣個表妹嚟咗我屋企住》【完】: (二十八)兩個死黨

星期三喺學校補完課之後我就同咗軒少同埋阿yo去食譚仔。

因為平又唔使諗咁多⋯⋯

我就嗌左碗炸醬腩肉米線，而食開中辣嘅我，就算冷氣幾大都好，我都係食到出哂汗。

但係軒少同阿yo，佢哋係最怕辣嘅，所以食親都會嗌唔辣，仲可以正常咁講嘢。

「喂！聽日嚟唔嚟我屋企BBQ？」軒少問。





軒少一向都好鍾意請人去佢屋企燒嘢食，中一開始已經係咁⋯⋯因為佢份人本身比較豪爽，而且間屋又夠大，我諗絕對可以容納到一大班人。

「得我哋？仲有冇其他人去？」阿yo回應話。

「如果你想可以叫埋班同學㗎。」軒少再補充話：「我指以前嗰班中學同學。」

「好呀，反正好耐都冇見過佢哋⋯⋯」阿yo若有所思咁話。

「喂！星爺，你點呀？嚟唔嚟？」軒少問我。





我先將喺口內咀嚼緊嘅腩肉吞咗落肚，麻辣嘅感覺刺激緊我嘅味蕾，搞到我有口難言，所以冇即時答佢。

我飲咗啲水之後，等啲麻辣嘅感覺減弱先再答佢⋯⋯

「ok呀！」

反正聽日都冇咩嘢做，又唔想瘋狂咁溫書，其實有時磨爛蓆都未必有用，反而抖下溫下咁先會事半功倍。

「咁預埋你喇。」 說罷，軒少又突然之間露出一個甚為猥瑣嘅表情。「係喎⋯⋯你上次唔係話有個好豬扒嘅表妹㗎咩？可以叫埋佢嚟BBQ㗎喎。」





依個軒少點解成日都想打我表妹主意呢？都話明係豬扒囉，咁都唔信嘅，唔通佢依家變到飢不擇食，定係知道我昆佢呢？

不過帶埋小南嚟又冇壞嘅⋯⋯

反正都係嚟食嘢，小南呢種食貨一定好鍾意，加上軒少間屋咁大，咪當畀佢見識下乜嘢叫做有錢人。

況且我都知道軒少並唔係狗公，唔會追住我表妹嚟咬。

「咁⋯咁好囉，我帶埋佢嚟，到時你條仆街咪嚇親呀！」我答應咗佢。

「屌！得啦，有咩豬排我未見過呀？再樣衰我都食過啦。」 溝女專家又想喺度發表佢嘅偉論。「想當年呀⋯⋯」

「得啦得啦，知你叻啦。」我搶先一步阻止佢再講自己嘅情史。

但聽到佢咁講我又驚返，因為真相係我嘅表妹係個大美人，如果佢真係連豬排都唔放過，我諗我要提高下警覺。





「咦！」阿yo無啦啦嗌咗一聲。「我差啲唔記得聽日仲要返學校補課，可能要遲少少先嚟到。」

「哦，唔緊要，我哋一定玩得好夜，放心啦！慢慢嚟都得喎。」 軒少好輕鬆咁話。

因為阿yo仲有補埋其他科，而我同軒少就淨係補英文，其他科都係靠自己努力。

「記住留返啲好嘢食畀我呀！」肥婆阿yo講咗一句符合佢身型嘅說話。

「得喇！」我同軒少異口同聲話。

食埋嗰碗辣死人嘅米線，我就再同佢哋吹多陣水。

我估我已經淨返低眼前兩個死黨，不過朋友從來都唔需要多，只要搵到一兩個知己就已經好足夠，總好過識埋一大班hi bye friend，局限於表面嘅關係，到頭來連朋友都稱唔上。





到最後為免佢哋擔心，我都冇講過我有病嗰單嘢。