《台灣個表妹嚟咗我屋企住》【完】: (二十七)仲要繼續

到咗第二朝返學校補課，就繼續我未完嘅DSE亡命之旅。

雖然我係有恐懼症，但都無阻我呢趟旅程，因為我仲睇到字讀到書。

我冇同軒少阿yo佢哋講我有呢個病，甚至因為呢個病而暈咗，所以佢哋都唔知道。

喺學校聽住Miss Li講書，測驗，然後溫書再操卷，就咁周而復始。因為其他科上次都好高分，唯一係英文衰咗，因而要惡補下。

返到屋企要溫書其實唔難，只要將麻煩嘅表妹困住喺我間房度，然後⋯⋯畀部電腦佢用嚟上網，我就用阿哥間房嚟溫書，佢又可以研究下煮嘢食，又唔會阻到我，簡直係兩全其美。





到咗夜晚，等到阿爸放咗工放嚟，我哋三個又喺屋企煮飯食，最難得嘅係小南好樂意煮，而我哋就樂意食，當然跟住就梗係我同阿爸執嘢洗碗啦。

好在畀小南睇過媽媽煮過嘅餸嘅相，呢兩日佢就煮咗唔同嘅餸，款式多啲好過日日都食過幾樣餸呀。

而小南嘅廚藝都終於去返正常嘅水平，我同阿爸依家係寧願食小南煮嘅嘢都唔想食外賣。

喺小南嘅佳餚加持之下，溫書都特別起勁。

如果佢可以煮到我去DSE就好啦，雖然都知冇可能⋯⋯