《台灣個表妹嚟咗我屋企住》【完】: (二十六)住家飯

瞓醒之後又到咗夜晚，喺醫院瞓唔著依家先補充返啲精力，但一瞓醒就聞到一陣又一陣令人垂涎三尺嘅香味。

究竟喺邊度傳嚟嘅呢？香味好似係喺客廳傳入嚟㗎喎，唔通係阿爸買返嚟嘅外賣？但冇可能會咁香㗎⋯⋯唔會又係表妹呀？

源源不絕嘅香氣傳入我嘅鼻，令到我覺得好肚餓，所以就起身出去一探究竟，一打開門就見到阿爸坐咗喺度，而小南就係喺廚房度慢慢攞啲餸出嚟，枱面有三餸一湯三碗白飯⋯⋯我已經知道發生啲乜嘢事。

阿爸好無助咁樣坐咗喺度，絕望嘅眼神當中流露住悔疚嘅感情，佢就好似等緊畀人槍斃嘅犯人一樣，而我就係啱啱入到刑場嘅犯人。

「表哥你醒喇？」小南一見到我就好興奮咁講。「我煮咗飯畀你食呀，你病呀嘛就唔好食出面嘅嘢啦，快啲過嚟坐低試下啦。」





「唉，完了。」通常聽住士兵嘅命令，犯人如果唔服從就只有死路一條。

我慢慢咁坐低，見到阿爸就嚟想喊咁嘅樣，然後佢靠近我嘅耳邊細細聲咁同我講：「星仔，對唔住，我⋯⋯我阻止唔到你表妹。」

算啦，米已成炊，點都要食㗎啦。

我就安慰返佢：「唔緊要啦阿爸，我知你盡咗力㗎喇。」

「我有阻止過佢㗎⋯⋯唉⋯⋯」





「算啦，阿爸你食少啲咪得囉，最多我幫你食多啲啦。」

「咁⋯咁辛苦你啦星仔。」

見到我哋兩個竊竊私語，小南就話：「喂！你兩個講緊啲咩呀？仲唔快啲試下我煮嘅嘢？」

雖然我都知道前車可鑑，但係都冇辦法，我知道呢一餐點都要食埋佢，如果小南肯乖乖地睇小說咪好囉。

蝦仁炒蛋，仲有菜心炒牛肉，再加上蔥香黃花魚⋯⋯我係好鍾意食眼前嘅餸，但係唔想食表妹親手煮囉，我驚再食落肚我會好憎眼前呢三碟餸，連對媽媽僅有嘅回憶同情感都冇埋。





「表妹，點解又係依三碟餸嘅？」我問。

「你食咗試下先啦！」

我知道食邊一碟餸先都係冇咩分別。

我拎起筷子慢慢將一塊牛肉放入口，然後迅速咁咀嚼，務求以最快速度吞咗落肚。

但係食食下⋯⋯

咦！點解好似唔同咗味嘅？

口入面所品嚐嘅係絕非平凡嘅牛肉味，味道適中又唔太鹹，仲落咗少少糖調味，而牛肉嘅質感唔靭之餘仲入口即溶，再唔係嗰陣時好難食嘅味道。雖然我唔係個專業食家，但係我要講一聲—好好味！

我馬上再試埋其他餸，啲蛋同埋條魚都係咁好食，今次真係媽媽嘅味道，小南真係煮得出媽媽嘅水準，不過我覺得總係缺少咗一啲嘢，總係唔會夠媽媽煮嘅好食。





跟住我滿心歡喜咁同阿爸講：「快啲食啦阿爸，今次食得落肚㗎喇！」

聽完我咁講，阿爸都係好唔放心，隻手震下震下咁攞住支筷子夾咗嚿蛋食。

「咦⋯⋯」

阿爸個樣即刻好驚訝，我估我同佢都係一樣難以置信。

「真係食得喎，仲好好味喎。」阿爸話。

「係呀！我冇呃你㗎！真係好好味。」我附和佢話。

聽到我哋兩個對餸菜嘅讚美，小南由心而發咁樣笑咗出嚟。





「哈哈！不枉我一番心機。」小南睇嚟相當之開心。

但係⋯⋯

「點解會咁好食嘅？」我問。

同上次嘅味道真係天淵之別，究竟表妹用咗乜嘢法寶先整得咁好食呢？我好想知。

「咁係因為我係咁睇食譜咋。」因為得到我哋嘅認同，所以小南好有滿足感。「我都知你上次覺得唔好食㗎喇，所以我就一直咁研究點樣煮得好食啲，今次終於得咗啦，哈哈！」

唔怪得之前見到小南用我部電腦上過一啲食譜嘅網站啦，原來係咁。

我同阿爸好耐都冇試過食飯食得咁盡興，可以大啖大啖咁食，多得小南我先可以再一次感受到呢種只有住家飯先可以搵到嘅溫馨，多得佢我先至可以食得返由六年前已經冇得食嘅一餐正常住家飯。

只見阿爸一舉手一投足就已經食完一碗飯同清咗一碟餸，我同小南當然唔執輸啦，搏命咁食。





最後飲埋一碗我好鍾意飲嘅粟米蘿蔔湯。

正呀！個肚同埋我都覺得好滿足。

「表妹呀，真係好好味呀，點解你會同你姨母煮埋同一樣嘅餸嘅？」我問咗個一直都想問嘅問題。

「係咩？」小南自己都覺得好意外。「原來姨母都鍾意煮依啲餸㗎？其實我都係媽媽教我煮，由細到大佢都係煮呢啲嘢畀我食，所以我都好鍾意煮嚟食咋。」

「我都係喎⋯⋯」而我更加意外。「不如我畀我阿媽煮過嘅餸啲相你睇下啦，畀你再鑽研多啲。」

諗返起媽媽，佢好鍾意煮完啲嘢食就影低啲相。

我想畀小南睇下媽媽煮過啲咩嘢食，希望佢下一餐可以有啲新意。





「好呀！我都想睇下。」小南話。

諗下先⋯⋯啲相應該放咗喺阿爸間房度。

「阿爸，我去你間房攞返阿媽啲相呀。」

「吓！」阿爸突然好似好緊張咁。「執埋啲餸先啦，一陣我拎畀你睇。」

「哦，好囉。」

做乜阿爸咁驚我入佢間房嘅？算啦，咁一陣先啦。

之後我哋就執好哂啲嘢，各自做自己嘅嘢。

阿爸喺坐喺客廳張梳化上睇電視，而我就同小南睇返媽媽煮過嗰啲賣相幾好嘅餸菜相片。

真係好滿足⋯⋯

估唔到依餐居然會咁好食。