《台灣個表妹嚟咗我屋企住》【完】: (二十五)又要瞓

因為我喺書展暈低嘅時候已經接近傍晚，而我係醫院醒返之後就已經差唔多接近凌晨時分，所以嗰日畀醫生檢查完之後，我就順理成章喺醫院過咗晚。

話時話，醫院嘅服務質素真係同坊間所言一樣係極差，就連護士姐姐嘅質素都差唔多係咁⋯⋯所以真係住一晚就夠哂，住多一陣都厭辛苦。

夜晚嘅時候又唔知做咩瞓唔着，可能係我以前聽得太多醫院嘅鬼故，瞓喺醫院諗返起啲鬼故，真係嚇到個心都離一離。

知唔知點解醫院嘅殮房一定會喺地牢嘅位置呢⋯⋯

有冇聽過殮房入邊嘅屍體離奇消失嘅事件呢⋯⋯





傳聞中嘅醫院紅衫女鬼⋯⋯

夜晚間唔中出現嘅bb喊聲⋯⋯

就因為咁搞到我成晚都冇覺好瞓，早知睇少啲鬼故喇。

我好辛苦咁捱終於捱到天光，一朝早阿爸就揸架車同小南一齊嚟接我出院，佢哋兩個好快手就幫我執曬啲嘢，然後拎埋上車，再搞埋啲手續。

而精神欠佳嘅我一上到車就即刻恰眼瞓⋯⋯





「喂！星仔搞咩呀？尋晚冇瞓咩？」阿爸問。

「我⋯⋯我瞓唔慣醫院呀。」我捽一捽自己嘅雙眼話。

「嗱，你啲電話銀包。」阿爸將屬於我嘅物件遞畀我。

「唔該阿爸。」我接過嚟，但總覺得好似少咗啲嘢咁。

之後就開車返屋企⋯⋯





諗嚟諗去都係記唔起咁，只係突然畀小南一句說話無意中提醒咗我。

「表哥呀，返去你要畀啲小說我睇呀！」坐喺我隔離嘅小南話。

「小說⋯」我終於記得啦。「小南你記唔記我喺暈之前咪有本簽咗名嘅小說嘅。」

「哦⋯排咗好耐隊先簽到嗰本呀嘛。」

「係呀係呀，嗰本嘢依家喺邊呀？」我好緊張咁講。

「吓⋯我唔知喎。」睇嚟小南佢都唔知道。「喺你暈咗之後送咗去醫院，就好似冇再見到本小說囉喎，我見你瞓低嗰陣時都冇攞住喺手嘅。」

「咁大獲？」

死火！本書一定係畀啲有心人拎走咗啦，人海茫茫，搵返嘅機會都好渺茫。





有意義嘅簽名版小說咁就冇咗，唉！算啦，怪得邊個呀？唯有第日有機會先再簽返啦。

「唔好唔開心啦表哥。」小南溫柔地話。

「嗯。」

好難開心喎⋯自己鍾意嘅書唔見咗，我諗我依家嘅口面一定成塊苦瓜乾咁，所以小南先至咁同我講。

「最多今晚我煲粥畀你食呀。」

小南一講呢句嘅時候，連揸緊車嘅阿爸都下意識睜大雙眼，O曬嘴咁。

我仲好記得上次佢嗰三餸一湯食到我同阿爸差啲想嘔，如果佢煲粥嘅話咁咪⋯⋯算啦，我真係唔敢再想像，唔想食完佢兜粥之後，又返去頭先嗰個鬼地方呀。





為咗我同阿爸著想，踩過一次屎就足夠喇。

所以我好婉轉咁拒絕：「表妹，我有焦慮啫，唔係有重病呀，唔洗戒口㗎！今晚食外賣算啦。」

估唔到我竟然寧願食外賣，都唔想食表妹煮嘅嘢。

「咁好囉⋯」小南因為冇得大展廚藝，所以好失落咁話。

我同阿爸都即時鬆咗一口氣。

好快就返到屋企，我食完醫生畀我嗰啲藥之後，因為尋晚真係冇瞓過，就即刻返間房趴咗落床瞓。

「喂！表哥咪瞓住呀！你又話畀啲小說我睇嘅。」我對眼合埋都唔夠一分鐘，小南就已經衝咗入嚟叫醒我。

「嗰邊電腦枱上面一大堆呀，你畀我瞓喇⋯⋯」我隨隨便便咁指一指電腦枱敷衍下佢，跟住個頭又瞓返落枕頭度。





「哦，好呀。」

聽住小南不停摷嘢嘅聲音⋯⋯

勁攰嘅我就咁瞓咗。