《台灣個表妹嚟咗我屋企住》【完】: (十九)祈求

我仍然忘記唔到七月十九號呢一日。

當日突如其來嘅一個噩耗，就咁徹底改變咗我嘅家庭。

一朝早，阿爸就車埋我同小南去到墳場。

好似話係唔放心留佢一個喺屋企⋯⋯雖然我都已經試過幾次留佢一個喺屋企。

我預先將今日嘅事話畀小南聽，等佢有定心理準備，唔好亂咁噏，因為我唔想佢再勾起阿爸嘅傷心回憶。





但人無可避免總要見到呢啲回憶。

我哋行到去到媽媽嘅墳前，見到媽媽嘅樣子依然同我印像中一模一樣，依舊美麗，冇改變過。

由於無論係唔係到咗媽媽嘅死忌，抑或係清明節嗰啲日子，阿爸間唔中都會嚟拜祭下媽媽，我記得有一年嘅清明節，嗰日落緊好大嘅雨，但阿爸都係會風雨不改咁嚟拜祭媽媽，所以喺阿爸嘅悉心打理下，每一次見到媽媽嘅墳位，都唔會見到有任何雜草，而且長期保持住整潔嘅環境。

同上年一樣，墳前依舊放咗一束淡白色嘅菊花⋯⋯

「屌，我老婆先唔想收啲仆街嘅嘢！」阿爸講完之後，就一手掉走嗰束花，因為嗰束花就係當年嘅兇手放低。





「老婆，我又嚟睇你喇。」阿爸慢慢跪喺地下，拎咗張濕紙巾出嚟抹一抹媽媽張相，而佢從眼神中所流露出無限嘅思念，咁多年嚟都冇減弱過。

同自己最愛嘅人要陰陽相隔，呢一世都冇可能再見返面⋯⋯我都有啲感受。

如果係一對情侶鬧咗交話要分手，咁都仲有機會可以挽救返段感情，因為佢哋仲可以見到對方，仲有機會同對方道歉；但係如果其中一方好不幸咁樣出咗事，咁呢個機會就只能夠留待下一世，而剩低嘅另一個人就要好努力咁樣生存落去，只可以祈求下一世上天會願意畀呢個機會自己。

我深信阿爸都係一直祈求緊呢個機會。