《台灣個表妹嚟咗我屋企住》【完】: (十八)沉重

落到樓下經過個籃球場，見到一班年紀稍為大我少少嘅人喺到打緊波。

佢哋之間一邊打波一邊有講有笑，而我亦好似見到自己嘅影子身處喺當中，但係呢個影子無可能再浮現，畢竟打波都唔係我鍾意同擅長嘅嘢，我又何需要去刻意迎合人哋呢？

我繼續喺條街到漫無目的咁散步，唔經唔覺我竟然又返咗嚟依家書店⋯⋯

睇嚟睇書先係我最鍾意嘅嘢，所以我嘅雙腳都好自然咁行咗呢度，我再次行入去打下書釘，不自覺又去到歷史書嗰邊，睇睇下又見返嗰本《鄭成功秘史》，我仲記得佢唔係講鄭成功嘅鼻屎，而係話鄭成功深愛嘅人係佢表妹，究竟當時嘅人係點樣睇呢種親戚關係呢？明明應該當佢係屋企人，感覺就應該好似屋企人一樣咁囉，但又點會無啦啦鍾意咗對方呢？而我覺得我同表妹只係存在喺嗰種溫馨嘅家庭感覺之中。

因為當咗佢屋企人，所以有時都好想知道佢收埋咗啲咩秘密，因為熟悉先唔想變得陌生⋯⋯





打打下書釘又到咗夜晚，跟住我就慢慢咁行返屋企。

返到屋企之後，我見到阿爸同埋小南喺張枱食緊外賣，而枱面都有一盒外賣係留畀我食。

「星仔，你返嚟喇，快啲過嚟啦，買咗盒外賣畀你呀。」阿爸話。

「表哥快啲過嚟食啦。」小南附和。

「哦⋯好呀。」





我坐低打開盒外賣一睇，原來又係福建炒飯。

可能阿爸覺得我好鍾意食福建炒飯啩，所以就成日都買畀我食，但老實講啦，成日都食福建炒飯就算有幾鍾意食呢樣嘢仲有一日都會討厭㗎⋯⋯情況就好似幾鍾意一個人都好，嗰種感覺總有一日都會變淡。

「真係好味呀。」小南大啖大啖係咁食。

「小南你唔好食得咁急啦。」阿爸話。

「係嘅，姨丈。」





見到小南居然食得津津有味，可見佢真係入世未深，連外賣加咗大量味精都懵然不知，睇嚟話咁快就已經畀阿爸同化咗。

我就冇咁好胃口喇⋯⋯

只係食咗幾啖之後，我就同佢哋講有啲唔舒服，然後我就返咗入房，返到房入面我見到電腦螢幕仍然發緊光，電腦仍然開著，睇嚟表妹已經識得開機，但係佢仲未識得閂機。

我見到螢幕上面顯示緊嘅又係一啲食譜，咁即係代表住表妹又想搵我同阿爸做白老鼠啦⋯希望佢嘅廚藝有所進步喇，如果唔係可能下一次我就入咗醫院㗎啦。

不過始終都係媽媽煮得最好食⋯⋯

我又忍唔住懷念起返媽媽嘅廚藝，明明只係一般師奶煮一啲嘢食出嚟，但係點解媽媽所煮嘅味道永遠及唔上出面食嘅呢？

咚咚！

突然又有人敲門。





「表哥，你係咪唔舒服呀？不如我攞啲藥畀你食呀。」原來係小南想睇下我有冇事。

「放心啦，我冇事呀。」估唔到小南居然會咁關心我，睇嚟佢都當我係佢嘅屋企人。「我瞓一陣就冇事㗎喇。」

「哦，咁好啦你休息下啦，我唔阻你啦。」

其實我只係覺得好攰，閂咗部電腦之後，我好想休息一下，跟住我連涼都冇沖就咁瞓落張床到，今次我冇播住歌瞓，因為冇咩心情聽。

可能因為聽日係一個好重要嘅日子，心情都覺得異常沉重，好想畀自己嘅心冷靜多啲。

因為聽日就係媽媽嘅死忌。