《台灣個表妹嚟咗我屋企住》【完】: (十七)好想休息

表妹話咁快就嚟咗四日，原來喺呢四日入面都已經發生咗好多嘢。

而且放榜都啱啱過咗一個禮拜，諗返起上個禮拜四⋯⋯嗰一日我返到學校收到放榜成績之後，知道自己嘅分數並唔足以入到大學，嗰一刻，我喊咗出嚟，明明自己付出咗咁多努力，但係都得唔到收穫。

喺嗰一日，我相信唔同嘅人都有唔同嘅感受⋯⋯

軒少見到個分數之後都仲可以好從容。

而阿yo亦難免覺得好傷心，陪住我一齊喊。





其他同學都有笑有淚，有啲同學笑緊有啲同我一樣喊緊。

雖然喺社會上人人都話文憑試嘅成績並唔係決定人生嘅路點樣行，但其實嗰啲只係表面說話嚟啫，試問喺個咁現實嘅社會又有邊個唔係真係睇住張cert去做人呢？

好彩嘅話考到好成績，入間好嘅大學，搵份好工，然後人生一條直路；如果唔好彩嘅話，咪唯有諗其他出路囉，但所謂嘅條條大路通羅馬其實嗰條路係幾咁冤迴曲折真係行過或者行緊嘅人先會知。

唔知道喺另一個地方嘅佢如果收到嗰張成績嘅時候，又會有啲咩嘢感受呢？

總有啲人你好想撞返佢，但係命運偏偏冇安排你遇上返佢，可能係因為冇需要再遇上嗰個人，諗返起嗰啲傷心嘅回憶，所以命運幫咗你一下，令你冇可能再遇上嗰個人，而正正因為咁樣先令你更加識得珍惜眼前嘅人。





「表哥！」

「咩事呀小南？」

「冇⋯我想問點解你之前仲要返去學校嘅？乜你唔係應該升大學㗎喇咩？你同我差唔多大㗎喎。」

今日唔洗返去學校補課，我同小南就喺呢個懶洋洋嘅暑假入面，邊度都冇去，只係喺屋企度坐喺梳化上面睇下電視，打發下啲時間。

其實我本來都想去做下啲試卷，溫下書嘅⋯但係唔知點解小南一喺到我就已經集中唔到去做呢啲事情，因為佢就會好似咁樣係咁問我問題煩住我，而突然之間就畀佢問咗個咁樣嘅問題⋯⋯





「因為呢⋯喺香港讀大學其實好難嘅⋯唔似台灣咁樣比較容易啲，同埋最主要⋯係因為你表哥我讀書成績廢囉⋯」咁樣講起上嚟都搞到我有啲無地自容。

聽到我咁直接咁講，小南都再冇追問落去，搞到個氣氛都有啲僵硬起嚟⋯於是我問返佢：「咁你仲有冇啲咩地方想去玩㗎？如果有嘅話表哥可以再帶你去喎。」

只見小南沉思咗一陣，然後說：「嗯⋯我未諗到呀，我諗到就再話你知啦，一係你有冇啲咩介紹呀？」

作為一個宅男，平時足不出戶嘅我畀佢咁樣問法我都唔知點樣答好，所以我都係話未諗到住。

我同小南就咁樣靜靜地坐喺到睇電視，雖然感覺上就好似一對小情侶咁，但真正嘅情侶就算唔出聲坐埋一齊都唔會覺得緊張或者尷尬，反而我同小南就會有一種咁樣嘅感覺，唔通係我仲未習慣多咗一個屋企人？估唔到喺阿爸返咗工之後竟然仲有人可以同我傾計。

「咦⋯係喎，表哥呀⋯我想問呢⋯其實你係咪好鍾意食家常便飯㗎？」小南又嘗試打破依種奇怪嘅氣氛。

「都⋯係嘅，點解你咁問嘅？」我反問道。

「冇呀⋯問下啫。」





好快我哋之間又陷入返沉默當中。

「係喇，表哥呀⋯可唔可以借你部電腦嚟用下呀？」

「可以呀，你識點用㗎啦。」

「嗯，應該識嘅。」

之後小南就入咗我間房，我終於又變返一個人喺到睇電視，諗諗下都係做返啲我想做嘅嘢算啦。

「喂！小南，我出去一陣行下街喇，你小心啲啦，有咩事打畀我呀。」我向表妹交待一聲。

「哦，好呀。」而喺房入面嘅小南就大聲咁答返我。





跟住我就打開門落街去咗散下心。

其實有時候係人都需要有一個自私嘅休息空間。