《台灣個表妹嚟咗我屋企住》【完】: (十三)低B
「喂！星星表哥你行緊去邊呀？休息完嘅話我哋就快啲再去玩啦，好悶呀！」小南話。
「吓⋯⋯帶你去玩下一啲好好玩嘅嘢囉。」我咁講其實係唔想再畀表妹拉我去玩埋啲極之刺激嘅機動遊戲，但都要諗下帶佢去邊到玩。
「不如我哋過去嗰邊睇下⋯⋯」
「但係我想玩跳樓機喎。」睇嚟小南依然死心不息，想將我置于死地。
佢一面悶悶不樂嘅樣子望住我，等待緊我嘅答允。
我又點可能答應小南嚟虐待自己呢？但都要搵個地方去下，於是我環觀四周，見到冇幾遠就有個冇咁激烈嘅機動遊戲。
「表妹，你睇下嗰邊，我就係想帶你去玩嗰個啦！咪鬼玩啲跳樓機咁高風險嘅嘢啦，我哋去玩嗰個啦，好好玩㗎！」我指住喺冇幾遠嗰隻巴斯光年話，而心入面就一直唸住：「你快啲話好啦⋯好啦⋯好啦⋯」
「好啦，咁過去啦。」
「嘻嘻！搞掂。」我不禁暗笑。
「你笑咩呀？快啲行啦。」小南又拉住我行咗過去，跟住我哋就入咗一個好黑嘅地方，仲上埋一架唔知咩嘢車。
而小南似乎好清楚啲玩法，一上到車就拎起把槍扮哂神槍手咁。
「星星隊員，一陣要盡力射殺敵人呀！」見佢咁嚴肅同我講，反而令我笑咗起嚟，覺得佢傻傻地。
「哈哈！表妹呀，我哋玩遊戲咋，使唔使cosplay埋呀？」
「再係咁唔認真，我就將你軍法處置。」小南用把槍指住我話。
「哈⋯好囉好囉，女長官，我聽候你嘅差遣。」我決定陪埋佢傻。
「一陣記住要盡全力呀！如果唔係就唔放過你！」
「Yes madam！」
架車開始行，小南就好食錯藥一樣異常冗奮，喺呢個漆黑嘅環境當中，見嘢就射，有殺錯冇放過，而我就當然喺佢後面hea住射啦，做佢背後嘅小男人。
「快啲射嗰邊啦。」
「好！」
「幫手射埋依邊呀！」
「係！」
好快⋯⋯我哋就喺亂光四射之下玩完個遊戲，得分都幾高下，可能小南出盡全力嘅緣故，睇得出佢都開始有啲倦意，終於冇頭先咁活躍。
巴斯光年，你真係人類嘅好朋友。
今次玩完，唔使再要小南扶住，反而係佢拉住我隻手臂慢慢咁行，見到小南終於識得咩叫做攰，冇再催我去跳樓，真係令我幾安慰。
我哋繼續漫無目的咁一直周圍行，忽然小南停低咗腳步，拉一拉我嘅手臂。
然後佢指住一隻米奇老鼠，好似哥倫布發現咗新大陸咁話：「咦！係米奇老鼠呀！點解頭先周圍行嘅時候見到其他迪士尼嘅人物都見唔到佢嘅？」
「哦，係喎。」見到充滿好奇心嘅表妹，雙眼對住隻米奇老鼠閃閃發光，我就問佢：「咁不如我哋過去同佢影相啦好冇？」
「真係得㗎？」
「梗係啦，你想唔想呀？」
「我想呀！咁快啲去啦。」
於是我哋就走過去排隊，等咗陣終於輪到我哋影，小南好迅速咁走過去攪住隻人型老鼠，而我就好生硬咁企喺隻老鼠隔離，然後整咗個連我自己都覺得柒嘅V字手勢。
見到我哋準備好哂，攝影師都扎返個馬步，拎起部相機。
咔嚓！
就係咁，好快就影咗第一張相。
「噢⋯⋯再影多張。」攝影師話。
小南聽到就立即走過嚟我身邊淘氣咁扮咗個鬼臉，一時三刻要我轉另一個影相姿勢，真係搞到我反應唔切，呆咗一陣。
「好，三⋯」
「二⋯」
「一⋯」
睇嚟攝影師都係趕住收工，最後我就學小南咁扮咗個鬼臉，喺影嘅前一秒，我都不自覺將身體靠近佢。
咔嚓！
就係咁樣，我哋去買埋嗰兩張曬哂出嚟嘅相，滿戴而歸。
「哈！表哥你個樣咁得意嘅。」小南一抹微笑，睇住第一張相話。
「都唔夠你得意啦。」
「哼！口甜舌滑啦你，衰人表哥！」
「你話我係衰人？唉⋯⋯早知就唔帶你嚟啦。」我開玩笑咁講。
「講下笑咋⋯⋯你係最好囉，得未呀？」
「當然係最好啦。」我暗暗摸摸自己個銀包心諗：「今日洗咗咁多錢，梗係好，好慘個好。」
「點解你第二張相學我嘅？」小南繼續講返啲相。
「係咩？攞嚟睇下先啦。」我將啲相拎過嚟睇一睇。
喺第一張相入面小南攪住隻米奇老鼠笑得好燦爛，同我生硬嘅笑容形成咗一個強烈嘅對比。
而第二張相我同小南都係扮鬼臉而且仲要靠得好埋，佢就當然扮得好可愛啦，相反我就⋯唔使講啦，而隻米奇老鼠就好孤獨咁企喺度做陪襯。
「咁啱啫，證明我哋心有靈犀嘛。」我話。
「信你至奇！你一定係有偷睇過我先至抄我。」小南質疑我嘅說話。
「嗯⋯⋯係啦係啦，我有偷睇到你扮鬼臉，我錯啦。」我投降話。
「哼！知錯就放過你啦！」小南高傲咁話。
匆匆過去嘅一日快樂時光就係咁完結，之後我就同小南搭車返屋企。
一開車，體力透支嘅小南就好似小朋友一樣瞓咗落我膊頭，搞到我都唔敢閉目休息一下，好驚連自己都瞓埋，仲要最驚係整醒咗佢，畢竟有個女仔借用緊自己嘅膊頭，是有種責任的⋯⋯如是者，我就同表妹靜靜咁一齊坐喺車度，而我就睇住天色慢慢變得灰暗。
令我又諗返起以前一啲嘢⋯⋯
差唔多到站時，見到小南正喺到睡得甜美，令我都唔忍心整醒佢，但無奈到最後都要拍一拍佢。
「小南，差唔多要落車啦。」
「嗯⋯⋯咦⋯⋯我瞓咗好耐？」小南坐返好，呆呆咁問我。
「都⋯都算係嘅，差唔多落車㗎喇，返去先再訓啦。」我回答佢。
「多謝你。」呢三個字，我有印象曾幾何時都聽過。
「多謝我做咩？」
「多謝你今日肯陪我嚟玩囉，嘻嘻。」
「傻妹⋯咁我係你表哥嚟嘛。」唔知點解，我居然好溫柔咁同表妹講。
「我邊到傻呀？你就傻！」小南好似有啲唔服氣。
「嗯，我傻啦，行啦⋯返去屋企喇。」
「哼！」
真係好耐都冇試過抽一日嘅時間出嚟係完全放心咁去玩，就咁去完迪士尼輕輕鬆鬆咁玩完，其實諗返轉頭都係多得小南我先可以令自己放心去玩，無後顧之憂咁去玩。
特別係當人大咗，邊有人仲會咁低B走去迪士尼玩呢？唔使讀書？唔使返工搵食咩？
雖然喺我身邊真係有個咁低B嘅人。