《台灣個表妹嚟咗我屋企住》【完】: (十四)搵人

「唔好走呀！」我喺到追住一個痩弱嘅背影。

「哈哈⋯快啲追到我啦。」一把溫柔中帶點頑皮嘅聲線傳到我耳邊，而且係一把女仔嘅聲音。

又會係依一個夢嘅⋯⋯但咁次好似變咗少少⋯⋯

但唯一不變嘅係⋯又係無論點追都好，我都追唔到佢⋯⋯

嗰個女仔再度消失於我眼前。





我有見過依個畫面嗎？

點解又發埋啲咁嘅夢㗎？到底意味住啲咩意思？

咁耐以嚟發完嘅夢我都唔會刻意記住，唯獨係依一個夢我連想忘記都唔得，因為就好似我記憶中嘅一部分，完全無法抹去。

莫非嗰個女仔真係佢？

我曾經失去過嘅一個人。





「黃家星！」

我瞓喺一張木枱上面，雙手曲住形成咗一個迷你小洞，再將我嘅頭放入去，就係咁呼呼大睡緊嘅我，突然畀人叫醒咗，被人從夢中拉回現實。係邊個連少少時間都唔畀我休息下呀？我緩緩將頭抬起，眼見嘅現實係一個人人專心聽緊書，氣氛異常凝重嘅課室。

「嗯⋯⋯」眼前叫醒我嘅原來係Miss Li。

「你做咩瞓教呀？唔該你返得嚟補課就認真啲好冇？」又係為人熟悉嘅平淡語氣。

「係⋯⋯sorry呀，Miss Li。」我又耷低頭咁講。





「唉⋯⋯」

Miss Li轉身返去繼續教書，而我就帶住倦意聽佢講書，坐我隔離嘅阿yo同軒少都專心咁聽緊書，或者去到依個階段⋯已經冇可能仲好似以前咁hea下hea下笑住過一堂，而係要為咗目標而努力奮鬥。

面對現實啦黃家星⋯但今日嘅我覺得特別攰，可能係因為尋日去迪士尼陪表妹玩得太耐？我諗應該都係啦。

見到兩個好朋友都咁畀心機上堂，我都無意打搞佢哋。

「各位同學，唔該拎返前日份卷出嚟。」

前日嗰份卷嗎？我伸手入去書包想搵份卷出嚟。

要搵啲嘢？

突然我諗返起之前無意中見到表妹用我部電腦好似想搵一個人，到底係邊個嚟呢？





唔知係咪好奇心作祟，令我想知道呢個充滿神秘感嘅表妹。

可能佢係我唯一捉摸唔到嘅人，我好似識佢，但又唔清楚佢⋯⋯

諗諗下，我就將心思放哂去''表妹搵人''依件事上，好快就補完課，我冇同阿yo軒少佢哋食嘢，跟住就返咗屋企。

大熱天時，只係著住一條短褲同一件白色T恤嘅小南趴咗喺梳化到睇緊電視，露出一雙美腿，但我冇咩心情欣賞。

「咦，表哥你返啦？」

「嗯，喺學校補完課啦。」

「係啦，我肚餓啦，你今日帶我去邊食呀？」小南摸住肚話。





「嗯⋯⋯」餓鬼化身嘅表妹又發功啦，好彩阿爸有畀咗錢我帶表妹食嘢啫，如果唔係就大獲了。「一陣你就知㗎啦，等表哥做埋少少嘢，半個鐘之後再帶你出街食嘢啦，好冇？」

「好呀！咁我換衫等你先。」小南熄咗電視機，好興奮咁走咗入房。

之後我就返房放低書包，開著電腦睇下個瀏覽記錄，見到小南之前上過嘅網都係一啲教煮嘢食，仲有係尋人網同埋討論區⋯⋯

今次我撳落去尋人網睇，認真咁慢慢睇，原來小南搵緊嘅係一個男人，個人資料上面話佢叫做陳國良，今年20歲，住觀塘，而張個人照片就係一個樣唔錯嘅青年，莫非⋯佢係小南嘅男朋友？係異地戀？當時我係咁樣諗，唔知點解有啲驚訝？又有啲失落⋯⋯

而我就更加想搞清楚件事，但又唔敢直接問小南⋯⋯

跟住我都換好咗衫，決定親自去搵個答案出嚟。

出到去廳，小南已經換咗條熱褲同黑色T恤坐喺梳化等我，咁樣睇落去佢都有幾分MK妹味。

「星星表哥搞掂喇？咁我哋快啲出發啦。」小南迫不及待咁講。





「好嘅好嘅，表哥今日就帶你去遠啲食！好！西！」講呢一句嘢嘅時候都覺得自己有啲奸。

「食好西？」

「冇錯⋯食好東西。」

「你話㗎！」

我帶住表妹冇去到附近嘅商場，反而行咗去同商場相反嘅路，搭住港鐵去個目的地，順便畀表妹接觸下香港人最依賴同時又最討厭嘅交通工具。

過咗一陣⋯⋯

小南原本笑笑口咁跟住我，都開始有啲顯得唔耐煩。





「表哥呀！我就快餓死啦，你究竟想帶我去邊食嘢呀？」

「唔使心急啦，就到㗎啦。」

呢個時候，車廂入面嘅廣播開始播出埋站嘅聲音⋯⋯

''下一站，觀塘''