《台灣個表妹嚟咗我屋企住》【完】: (十二)虐待呀!

咁我哋去玩過山車啦⋯⋯

小南呢句說話徘徊喺我耳邊⋯⋯搞到我完全呆咗咁，仲諗住佢講下笑啫，點知當我一眨眼，就已經畀小南拉咗去玩過山車。

我同小南坐喺車嘅中間位置，只見安全設備緩緩咁降下，導致我嘅心情都慢慢緊張起嚟。

工作人員過嚟檢查一番之後，跟住就話畀我地知即將會開車。

「喂⋯我⋯我⋯我想落⋯落車呀⋯⋯」我顫聲咁話。





「乜你咁細膽㗎星星表哥？未開車就想落車，開咗車你驚嘅話先跳車啦，哈哈哈哈！」身邊睇嚟異常興奮嘅小南聞言後話。

「我⋯我真係唔得啦畀⋯畀我落車啦。」依刻嘅我就如同一個等緊槍斃嘅死囚，用盡最後一口氣跪地求饒，可惜我唔係陳局長個仔，又唔識鐵腿水上飄，更加冇可能拎得到一百蚊人仔出嚟，就唯有用我剩下嘅一把嘴嚟乞求：「求下你哋喇！」

坐我隔離嘅小南雙眼只注目於前方，而方圓百里都冇人理我，我承認我係膽小如鼠，但我真係唔想搞搞下連小命都不保。

「救⋯⋯」我仲未講完，架過山車就開始喐，表示我冇可能返轉頭。

架過山車慢慢咁向上行，向住最高點進發，當越嚟越接近嘅時候，小南更露出咗一個萬分期待嘅神情，因為我唔係第一次玩過山車，而我都深知跟住會發生啲咩嘢事，反而可以平靜落嚟咁等待嗰一刻來臨，反正無可避免。





好快就到咗最高點，本身向上嘅車頭都漸漸向前⋯⋯然後向下⋯⋯一股重力開始凝聚喺我身上，當我嘅身體慢慢咁向下傾嘅時候，呢股重力就更加明顯。

「呀！！！！！！」先係身邊嘅小南喺度大叫。

「呀！！！呀！！！呀！！！」跟住全車嘅人都尖叫緊。

「呀！！！呀！！！」

「呀！！！呀！！！呀！！！」





然後就叫聲四起，完全分唔清楚係邊條友叫緊，喺如同轟雷嘅尖叫聲再加上空氣衝力嘅煎熬，我只係覺得自己嘅耳膜就快被震破，連個心臟都幾乎停頓。

莫非我真係要命喪於此？個DSE都未考呀！唔甘心呀！

喺車上面，我只係覺得時間過得好慢，過山車一直漫無止境唔停咁上上下下左左右右衝嚟衝去，而尖叫聲亦不絕于耳。好似只有我一個冇尖叫，我曾經有一刻諗過聽表妹話跳車保命，但只係妄想，因為安全設備牢牢撳住咗我，我就只可以好似接受死刑咁，任由過山車不斷踐踏我弱小嘅心靈，摧殘我本來就虛弱嘅身軀。

「呀！！！呀！！！」

「呀⋯⋯」

突然之間，架過山車嘅車頭向上停低咗，眾人嘅尖叫聲亦隨之而消失，換嚟咗一陣嘅安寧。

「唔通係壊車？」本來我仲抱有一絲希望，如果係壊車就好啦，唔使再被折磨，點知就喺下一秒，我呢個假設就被推翻。

過山車無啦啦向後喐，仲要喐得好快咁向後墜，向後衝緊，嗰股離心力簡直將我嘅靈魂從身軀中抽出，我當堂三魂唔見七魄，只係識得失控咁尖叫⋯⋯





「呀！！！呀！！！呀！！！呀！！！」

唔知道叫咗幾耐，衝咗幾耐⋯當我嘅靈魂返嚟我身軀嘅時候，終於都停咗車，埋返站。

由於雙腿發軟無力，我呢次行返出嚟仲要小南扶住我行，十足一個行動不便嘅阿伯畀個孫女扶住咁，本來小南見我得返半條人命，我估佢都應該唔會再要我受刺激啦啩？點知我真係估佢唔到喎，估唔到依個表妹原來係痴線㗎⋯⋯扶下扶下竟然扶咗我去跳樓機前面。

之後佢仲要傻傻地咁問我：「表哥你行得返未呀？得嘅話我哋再玩跳樓機啦。」

我心諗：「屌！你不如畀座樓我真係跳樓死咗去算啦，講真再咁搞法，真係死得人㗎⋯⋯」

於是我求饒咁話：「親愛嘅表妹呀！請你容許表哥抖一抖先啦好嗎？我求下你喇！」

「哦⋯⋯咁好囉。」小南見我誠意拳拳咁請求佢，都肯作出讓步，然後扶我去到一間餐廰食下嘢，抖下氣。





烈日當空之下，我哋都再冇玩埋啲咁刺激嘅機動遊戲，反而周圍去睇下風景，周圍行下街。

喺迪士尼入面同小南散步雖然係幾奇怪，但行下行下又覺得幾舒服喎，可以有時間行下街，享受下箇中寧靜嘅感覺，試問又有幾多個香港人做得到呢？

雖然真係幾奇怪⋯⋯

但起碼感覺好自由自在。

不過活潑好動嘅小南又點會肯咁乖陪我散步呢？

行咗冇耐，小南就怨聲載道。