《台灣個表妹嚟咗我屋企住》【完】: (十一)要去迪士尼啦

又係喺一個清晨，每日如常嘅晨光映射喺我嘅臉龐上，呢次係第二次感覺到一個咁特別嘅起身儀式。

點解會叫做起身儀式呢？因為通常我都係賴一陣床先落床，每朝都好似要搞下儀式咁先起到身。

咁點解今次又叫做特別嘅起身儀式呢？因為小南又騎住我啦⋯⋯一身淺藍色嘅Hello Kitty睡衣，一頭亂髮，騎我嘅方式同尋日無異，然後我哋又係靜靜咁互望咗幾秒鐘，我估我已經知道呢個女仔下一步嘅行動，就係會扯走我張被，令我唔可以舉行正常嘅起身儀式。

「星星表哥！起身啦！」果然，小南左手拉弓，大喊一聲，迅速扯走咗我張被，動作流暢得沒有半點嘅猶豫，睇嚟已經苦練咗多年。

「嘩！」即使早知結果嘅我，亦都喺本能反應下嚇咗一嚇，再問咗句：「表妹做咩你又喺我間房出現㗎？」





「為咗叫你起身囉，你話今日帶我去迪士尼玩㗎喎。」小南傻傻咁答我。

「咁點解一定要騎住我先叫得我起身呀⋯正正常常唔得咩？」我有啲怨氣咁講。

「我習慣咗呀嘛。」小南落返床，去到我張電腦櫈到坐低，然後話：「我喺台灣都係咁樣叫我嘅姐姐同媽媽起身㗎，佢哋以前點叫都唔起身，但自從我用咗呢個方法之後，佢哋一叫就起身啦。」

「哦⋯」雖然小南講到言之有理，而且有個咁靚嘅女仔可以日日騎住我叫我起身，正常人都夢寐以求啦，之但係我仲有良知㗎！畢竟男女授授不親，於是我就一本正經咁同小南講：「但係我係男仔嚟，咁樣做唔好呀，以後唔準咁做喇。」

小南聽完，依然嬉皮笑臉咁話：「有咩所謂啫？嘻嘻⋯」





面對眼前呢個任性嘅小女孩，我知道好言相勸係起唔到作用，所以我就加重語氣，略帶怒氣咁講：「我話唔準就唔準啦！如果唔係嘅話就唔帶你去迪士尼㗎喇！」

小南一聽到話我會唔帶佢去迪士尼，立即一面愁容，只係耷低頭低聲咁講咗一句：「哦⋯我知啦。」

本來我以為出依一招就可以好快咁搞掂小南，點知換嚟咗反效果⋯就係搭車去迪士尼嘅路上，小南全程黑哂面，簡直係黑過粒墨屎，同佢講咗幾句嘢，都係hea下hea下咁答我，我就知道佢一定係嬲咗我，所以之後都決定少講為妙。

話咁快就到咗迪士尼，跟住我就同小南去排隊買飛，之後一個好後生嘅女職員見到我哋過嚟嘅時候，居然多口問咗句：「咦，小情侶嚟呢到拍拖呀？」

因為呢一句說話搞到小南紅都面哂，而我就連忙解釋返：「唔係呀⋯唔係呀⋯我係佢表哥嚟咋，帶佢嚟玩咋。」





「哦⋯唔好意思⋯」女職員都知自己柒咗。

買完飛後，我同小南一入到去迪士尼，就見到人山人海嘅情景。而宛如三歲小朋友嘅小南就傻頭傻腦咁衝咗入人群，想捉都捉唔住，周圍又有咁多人，我好驚同小南走散，於是我就跟住呢個白痴表妹逼咗入人群之中，不停畀身後嘅人推向前，我就十足一個波咁畀人不停咁推。

睇嚟小南都好似做足功課咁，諗好哂玩啲咩嘢先。

「表哥快啲嚟玩嗰個啦。」喺人群中仍然清楚聽到小南嘅聲線。

「喂！小南，你⋯你⋯你等埋我先啦⋯⋯」而一直畀人推到抖啖氣都難嘅我，都急忙呼叫不遠處嘅小南，好驚佢嬌小嘅身影從人海中消失。

「快啲啦！」但小南似乎完全聽唔到我叫佢。

「喂⋯⋯」

最後我哋從一條擠擁嘅大街逼下逼下，終於離開咗人群。





眼見眼前嘅小南面唔再黑，變得笑容滿面，睇嚟啱啱嗰位女職員嘅無心插柳，幫我哄返掂佢。

「呀⋯⋯呀⋯⋯喂⋯⋯表妹，你⋯⋯你咪走咁快啦⋯⋯」我一邊抖氣，一邊話。

「星星表哥，我想去玩呢個轉轉咖啡杯呀！嚟啦！」小南無視咗我嘅說話，講完之後就拉住我隻手扯我過去玩。

「轉轉咖啡杯？咁次死啦⋯死啦⋯」我心知不妙，開始喃喃自語。

冇幾耐，我就喺迷迷糊糊之際被強逼坐上咗咖啡杯。

「轉啦！」小南立刻控制咖啡杯不停咁轉，仲要越轉越快。

我合實雙眼，任由空氣撕裂我嘅身體，全個世界頓時喺天旋地轉之間，甚至有一刻我好覺得想嘔，只係希望快啲完結。





「轉呀⋯轉呀⋯轉呀⋯」咖啡杯轉緊嘅時候，我仲隱約聽到小南傻咗咁係咁講。

「轉呀⋯轉呀⋯」

「轉呀！」

突然，呢個轉下轉下嘅咖啡杯終於都停低咗，終於可以畀我鬆一口氣啦⋯雖然只係過咗三分鐘，但感覺就好似係度秒如年，真係喊出嚟。

完嗰一刻我轉到頭暈到想嘔咁濟，腳步不穩咁行出去，但身邊小南依然面不改容，活蹦亂跳咁嘅樣，仲笑住問我：「哈哈⋯表哥有冇事呀？」

「面青口唇白啦！仲問我有冇事？」我心入面雖然係咁諗，但都只係弱弱咁答咗句：「冇⋯冇事呀⋯」

唉⋯點知講完之後就大件事啦！

小南微笑住問我：「真係冇事？」





跟住再話：「咁我哋去玩過山車啦！」