《台灣個表妹嚟咗我屋企住》【完】: (十)hello kitty

啱啱返到屋企，一踏進家門就只係覺得一片寂靜，鴉雀無聲。

「小南！我返嚟啦。」我大聲咁講，但就無人回應。

唔通佢瞓咗？

我走近自己間房嘅房門，本來閂埋嘅門畀我慢慢咁推開。

而眼前就只見正喺我床上呼呼大睡嘅表妹，電腦螢幕仍然發緊光。





睇嚟表妹上網上到又攰又悶，忍唔住就瞓著咗，仲要瞓咗冇幾耐。

我忍唔住望多佢幾眼，瞓喺床上嘅小南，原本就有著花容月貌，再加上熟睡中嘅佢，那嬰兒般嘅睡容又添幾分醉人，咁樣叫人如何忍耐呢?

心中嘅邪念再起⋯

「喂！唔得㗎黃家星！佢係你表妹嚟㗎，傻咗咩你？表妹都想搞，忍住呀！」我拍一拍自己塊臉，畀自己保持理智、冷靜同清醒。

而我為咗心無雜念，就喺心入面一直唸唸有詞：「眼前嘅係我表妹嚟⋯表妹嚟⋯表妹嚟呀！」畢竟我又唔係乜嘢色狼，好快我就調整返個心態。





之後我就小心翼翼咁將個書包放低，為免擾人清夢，整醒咗小南。

我坐喺電腦前面，諗住睇下小南上緊啲咩嘢網，但奇怪嘅係佢唔係上緊我教佢嘅一啲討論區，而係一啲尋人網，莫非佢搵緊人？而見佢搵嘅人大多都係啲同我差唔多年紀大嘅男仔，甚至列出埋班友嘅興趣同學歷，與其話係尋人網，反而可以話係一啲交友網。

正當我嘗試想查下佢究竟搵緊咩嘢人嘅時候⋯⋯

「咦？星星表哥？」原來身後嘅小南已經醒咗，一雙憂鬱嘅大眼睛正擘大望住我。

「嗯⋯你醒喇？」坐喺度嘅我立即扮嘢，扮到好似咩都冇做過咁，因為無緣無故咁睇人嘅嘢，好似侵犯咗人哋嘅私人，有啲啲衰格。





「嗯⋯表哥你做緊咩呀？」

「冇！等你醒囉。」

「係咪㗎？古古惑惑咁嘅。」小南露出一個相當懷疑我嘅神情。

「真係㗎！冇呃你。」

「咕嚕咕嚕⋯」一段熟悉嘅聲音又從耳邊傳嚟，依刻我先發現自己有啲咩嘢唔記得咗。

「表哥，我又肚餓啦⋯」

我記起原來自己冇帶表妹去食午餐。

「唉呀⋯對唔住呀，表哥掛住自己去食嘢，唔記得咗小南你原來仲未食嘢。」我搶住話。





「唔緊要嘅。」小南又好失望咁講，但今次嘅失望係源自於肚餓。

「咁我哋依家出街食嘢喇。」

「好呀！」小南餓鬼嘅樣子原形畢露。

跟住我就帶住小南去附近嘅商場，去咗一間快餐店食嘢，雖然我只係睇住佢食，但見佢絲毫不顧形象起勢咁食，食相同美貌格格不入，搞到我都忍唔住偷笑起嚟。

食完之後，我見天色尚早就同佢周圍行下商場，因為商場對於小南嚟講都係新鮮事，香港仲要咁多商場，真係有排行。

沿途我哋都係一直行下，吹下水，直到行到一間公仔店嘅門口，小南突然停低腳步，雙眼凝視住一隻好可愛嘅Hello Kitty公仔。

「你鍾意？」我問。





「係呀！」小南滿滿童真咁答：「我細細個就好鍾意Hello Kitty㗎啦。」

「哈哈⋯唔怪得你連件睡衣都係Hello Kitty啦。」我又忍唔住笑一笑佢嘅童真。

「嘻！咁都畀你發現咗添。」

「你係咪好想要呀？」

「嗯！係呀⋯⋯但係我又冇錢帶喺身。」

「放心啦！有表哥喺到。」

我二話不說就行咗入間公仔店入面，然後買咗隻Hello Kitty送畀小南。

「多謝你呀！星星表哥。」





「咁就乖啦。」

見住佢收嗰份禮物時可愛又充滿童真嘅一面，感覺就好似照顧緊自己個女咁，又或者係照顧緊自己嘅妹妹一樣，但當小南拎住隻Hello Kitty同我並肩咁行返屋企時，途人對我哋所投放嘅目光就唔同講法了，喺佢哋眼中我同小南就如同一對幸福嘅小情侶。

去到樓下大堂，連看更陳伯都係呢種目光。

人哋單憑表面咁睇又點會估到佢係我表妹呢？如果係軒少同阿yo見到我身邊有個咁靚嘅女仔，想必認為我溝咗佢啦。

返到屋企嘅時候，我將聽日唔使補課嘅事話畀小南知，所以就可以同佢去迪士尼玩，果然不出我所料，小南又變咗一個好天真傻氣嘅小朋友不斷歡呼。

小南亦都視我送嘅Hello Kitty如珠如寶，一直都攬到實一實，好怕會唔見咗咁。

多咗個表妹一齊住嘅第二個晚上，我腦海諗住嘅唔係聽日去迪士尼玩咩好，反而係嗰一個尋人網。





小南到底係咪有啲嘢唔可以畀我知呢？

莫非佢搵緊人？