《台灣個表妹嚟咗我屋企住》【完】: (九)朋友

我以極速趕返學校之後，一打開課室門，已經見到為數十幾個陌生嘅面孔坐低哂喺課室，除左兩個人同埋企喺黑板前教緊英文嘅Miss Li。

「sorry呀⋯我遲到。」我死死氣咁講。

Miss Li先係怒啤我，轉而平淡咁話：「畀次機會你啦，下次早啲呀，快啲埋位坐低啦。」

原本有哂心理準備畀人鬧嘅我就好似重獲新生一樣，但對於眼前依個畀人第一印象係好惡好惡嘅訓導主任，居然會放過我依種補習都遲到嘅壞學生，真係令人深感疑惑。

其實我都預測到佢嘅反應，因為本來全校出哂名最惡嘅Miss Li，已經年屆六十並教書多年，同好多師兄師姐對Miss Li嘅描述同埋我對佢嘅印象真係有好大出入，可能佢由高中先開始教我英文，我所見到嘅就係Miss Li近兩年嚟完全收哂火，鬧少咗人好多，加上白髮漸多，更令人容易感受到佢嘅蒼老感，再者聽聞佢教多一年就會退休。





可能因為咁，我再feel唔到嗰種訓導主任應有嘅惡，反而有一種莫名嘅暖。

「係⋯」我靜靜咁行去一個空嘅座位放低書包坐低。

「喂，星爺，做咩嘢唔撚記得咗返學呀？打飛機打得太多嘅話，記憶力會下降㗎喎。」坐我前面嘅軒少鬼鬼祟祟咁轉身同我講。

「咪痴線啦你。」

講起軒少⋯佢係一個黑黑瘦瘦嘅高佬，原來唔經唔覺已經識咗佢六年，佢應該係我中學生涯入面最好嘅朋友，雖然有時把口都幾口臭，但份人好有義氣，對身邊嘅朋友都好好，而且家底仲要有返咁上下，以前仲成日請成班同學去佢屋企燒嘢食。





而軒少坐得喺到都證明咗佢都係想重讀。

其實我同軒少之間仲有個好朋友，但係可惜⋯⋯

「吓⋯唔通你有女喇？係咪掛住陪條女呀？」軒少話。

「係呀，有女喇。」我敷衍咁回應。

「堅㗎？幾時介紹阿嫂我識先。」





「其實我搞緊異地戀，佢住喺外國，喺網上面識咗一個禮拜就一齊咗。」我胡言亂語咁講。

「哦⋯」

見到軒少個樣信到十足，我就問佢：「你信呀？」

「我信呀！」佢好堅定咁答我。

「fake你咋，不過講起女⋯最近真係有一個嘅，不過係我嘅表妹。」突然間諗返起喺屋企嘅小南。

「表妹？」軒少馬上用一種色瞇瞇嘅眼神望實我,樣子淫蕩無比咁問：「喂，靚唔靚嘅先？」

我心諗：「雖然識咗你咁耐，又同你咁熟，但你條淫蟲都咪鬼打我表妹主意啦。」

於是我好認真咁答佢：「唔靚，豬排嚟㗎。」





「吓，有冇相先？」坐我隔離嘅女仔一直聽住我同軒少嘅對話，跟住加入埋嚟講：「有圖有真相！」

而呢個女仔叫做阿yo，係一個短頭髮而心地善良嘅肥婆，亦都係我識咗六年嘅好朋友，好多人話肥婆都唔係好女仔，我唔信！因為眼前就有一個幾好嘅女仔，而佢可以話算係唯一一個同我傾到計嘅異性朋友，雖則阿yo好肥，但五官清秀，瘦咗一定係女神級嘅質素。

而佢都係打算嚟重讀。

「冇錯啦！圖呢？」軒少話。

「你叫我點樣上堂畀你哋睇相呢？上堂啦。」我開始想回避呢個話題。

「唔得呀！快啲畀！」阿yo將聲線拉高咁講，引起咗Miss Li嘅注意。

「喂，你哋三個傾完計未呀？仲唔打開書上堂？」Miss Li又係平淡咁講。





跟住知道衰咗嘅我哋三個就開始認真上英文堂，聽Miss Li教啲應試技巧，做下練習⋯⋯

如是者就過咗半日沉悶嘅補課，而正常嚟講暑假逢禮拜一、二、三都要返學補課，但係聽日因為係畢業禮⋯一個本來我都要參加嘅典禮，因此禮拜三先再返，所以應該有時間可以陪小南去迪士尼。

諗深一層，其實我有兩個好朋友打算同我一齊重讀中六，都算係一種緣份嚟嘅，可能大家都有自己要重讀嘅目的同埋目標⋯⋯

我就唔洗講啦，為咗阿爸。

而軒少就因為唔夠分入唔到U，佢阿媽又唔畀佢讀其他嘢，係都要佢讀大學仲要讀商科，好似話係將來要幫佢阿媽打理家族生意。

阿yo就因為想做老師，而一定要讀到大學，而咁啱放榜個分又唔夠入U。

而我哋都係知道入唔到大學，準備好重讀先打算返嚟補課。

估唔到命運可以將我同呢兩位朋友拉返埋一齊，或者係畀我彌補返以前冇同佢哋一齊玩多啲嘅時光啩⋯⋯





之後，半日嘅補課終於完結咗，我哋去咗附近嘅餐廳一齊食埋飯就各自回家，而我都成功咁避開表妹呢個話題。

但係我好似有啲嘢又唔記得咗⋯⋯

我行返去屋企嘅路上諗極都諗唔起。

我到底係咪有啲嘢唔記得咗呢？