《台灣個表妹嚟咗我屋企住》【完】: (八)日常
咦⋯係小南？
為咗確認眼前事實，我又再捽一捽眼睛，捽完左眼又捽右眼，但係此情景仍然留喺我眼內，小南騎住咗我⋯而窗外就有一道晨光照射咗入嚟，代表已經天光。
喺晨光嘅照射，,我更加肯定小南係張開咗大脾，當正我係一隻馬咁樣騎住我，搞到我都忍唔住有啲生理反應。
同尋晚一樣，一身Hello kitty嘅睡衣，本來紥起嘅馬尾放咗落嚟。
小南睡眼惺鬆咁望住我，我諗佢應該都係啱啱瞓醒。
而且佢都好似都注意到我都醒咗，於是大家就係咁喺我張床上面默不作聲咁互相對望，沉默咗幾秒之後⋯⋯
佢終於打破咗沉默。
「表哥起身啦！」小南先開聲話：「今日你要帶我去玩呀！」
「吓⋯玩？」完全搞唔清楚情況嘅我微微瞇起雙眼，再望望身邊嘅鐘話：「朝早八點鐘咋喎，使唔使咁早起身⋯」
「同埋，你做咩入嚟我間房，仲要騎住我呀⋯」我問。
小南先露出一個奸狡嘅笑容，然後企起身用力一扯，將蓋喺我身上嘅被扯開。
「表妹你做咩呀！」佢突如其來嘅舉動將我嚇到，我立即縮瑟於床上一角。
「你想點呀？」呢個時候嘅我完全失去咗對異性嘅低抗力。
「嘻嘻！」小南再次奸笑起嚟咁話：「我想你快啲起身，帶我去玩呀！」
「吓⋯」其實我仲想瞓多陣。
「求下你啦，星星表哥⋯」小南向住我撒嬌。
「唉⋯好啦好啦。」面對小南嘅撒嬌攻擊，我只好舉手投降問佢：「你想去邊度玩呀？」
「迪士尼！」小南亳不猶豫咁講。
「嗯嗯⋯」
「咁快啲起身換衫去啦。」
「好⋯好囉。」我慢慢落床，坐喺床邊無奈地講：「咁你都要畀我換衫先㗎，你喺依到我仲點換⋯⋯」
呢刻喺我面前嘅小南依舊可愛，但係明明尋日第一次見嗰陣仲好好傾，畀人感覺十足賢妻良母；而今日又完全唔同哂，變咗一個活潑好動嘅小朋友。
小南就好似突然由小天使化身做小惡魔咁。
「但係我有樣嘢想問下你先喎。」小南起身走近我張書枱，從一疊試卷隔離拎起咗一張相。「我想問點解你會有我細個嘅相㗎？」
小南拎住嘅係嗰張我之前放喺枱面嘅四人合照。
我同埋一個好樣衰嘅大肥妹，一個樣子普通但皮膚好黑十足非洲黑人嘅女仔，仲有一個哨牙嘅高妹。
「吓，邊個係你？」我問。
「依個囉。」小南指住張相入面十足非洲黑人嘅女仔話：「係咪唔似呢？」
我望一望張相，再望下小南，完全係天淵之別，真係俗語所謂嘅女大十八變，眼前嘅小南簡直可以用脫胎換骨嚟形容。
「完全唔似囉。」我難以置信咁問：「點解個樣完全唔同哂嘅？」
「嘻！秘密。」小南充滿神秘感咁講。「但係表哥你未答我喎。」
「哦⋯我細個嚟你屋企嗰陣影㗎。」
「係咩？咦⋯又好似係喎，哈哈。」小南笑一笑再話：「你細個都好肥喎，好似隻肥豬，但依家⋯就唔同啲啦。」
「有咩唔同呀？都係咁靚仔？」我開玩笑咁講。
「嘻！都係秘密。」小南再話：「我哋都幾有緣份喎，以前係你嚟我屋企住，依家就係我嚟你屋企住，風水輪流轉呀。」
「緣份？可能真係緣份⋯」我細細聲講。
「好啦，咪講住先啦。」小南放返低張相話：「換衫先啦表哥，去迪士尼呀！」
「嗯，好呀。」說罷，我就企起身。
『我不願讓你一個人 一個人在人海浮沉』
『我不願你獨自走過⋯⋯』
突然我嘅電話響起，我馬上拎起放喺床邊嘅電話一聽⋯⋯
「喂，星爺。」
呢把熟悉嘅聲線，同埋呢個對我嘅稱呼，一定我嘅死黨軒少。
「做咩事呀軒少？咁好搵我嘅？」
「柒頭！你唔記得咗呀？今日補課呀！八點啦，Miss Li叫我打畀你叫你返嚟呀。」
「吓⋯」我立即衝去客廳睇一睇月曆，原來今日係七月十五號星期一，放榜之後約好咗返學校補課嘅大日子。
「頂！我唔記得咗呀!」
「快啲返嚟啦，Miss Li屌屌聲啦。」
「嗯嗯，好快好快。」
「快啦。」講完之後，軒少就收咗我線。
點解我咁都唔記得補課㗎⋯今次真係大獲啦。
我衝返入房，攞哂啲補課要用嘅嘢同埋疊試卷出嚟。
正當我喺到攞緊嘅時候⋯⋯
「表哥，頭先嗰首係咪五月天⋯」企喺我身邊嘅小南話。
「對唔住呀小南！」我心急如焚咁一邊執書包，一邊話：「表哥今日要返去學校補課，唔得閒同你去迪士尼啦。」
「吓！你反口囉。」小南好失望咁講。
「真係sorry呀！你出去先啦。」我將小南推出門外。
然後我以極速換好哂校服，拎埋書包，就開門打算衝出去⋯⋯
「表哥，咁我今日咪好悶囉？姨丈又返咗工，如果連你都走埋⋯⋯」小南企咗喺我房門口，微微咬住下唇，好唔開心咁講。
「嗯⋯」呢個時候我心諗：「如果我咁樣一走了之，又真係好衰嘅⋯但係又要返學補課，唔返學嘅話又會畀Miss Li鬧，唔理表妹嘅話又會畀阿爸鬧，進退兩難呀！點算好呀？」
最後喺呢個無計可施嘅地步之下，我急中生智⋯⋯
「小南，你識唔識用電腦上網？」我問。
「都識嘅，以前喺同學屋企用過下⋯」
「咁就好啦！」我馬上帶小南入我間房開埋部電腦，然後用咗十分鐘教佢上唔同嘅網站，上一啲嘅討論區。
「就係咁用啦，表哥真係趕時間呀！要走先啦，對唔住呀小南。」我摸一摸小南個頭話。
「哦⋯咁好啦⋯拜拜啦。」小南由一個活潑好動嘅小朋友變成一個好似做錯事畀人鬧緊嘅小朋友。
「對唔住呀！拜拜。」
之後我就一支箭咁飛返學校。
我都唔記得咗，原來我仲有日常嘅生活⋯⋯