《台灣個表妹嚟咗我屋企住》【完】: (五)真嘅表妹

我耷低頭眼見面前有一個紥住馬尾嘅少女⋯⋯自然側分嘅瀏，而且生得白皙漂亮，身材嬌小可愛，同我相差大約一個頭。

佢着住一件純白色T恤，一條青綠色長裙，手拉住一個紫色行李喼，呆呆咁望住我。

「你是⋯黃家星？」少女滿面通紅，用國語好怕羞咁問我。

一個又靚又講國語嘅女仔正正企喺我面前，佢個樣就好似細細粒嘅郭雪芙。

女神落咗嚟凡間？



呢個畫面⋯好靚好靚。

我畀眼前嘅女仔迷住，心跳不斷加快，莫非真係心動嘅感覺？

依種感覺雖然之前都試過，但係今次卻係最強烈嘅一次，我開始有啲唔相信眼前嘅景象。

佢就係我表妹？

感覺就好似置身於夢中仙境當中⋯⋯



「喂！」少女一嗌，將我拉回現實。

見佢原本滿面通紅嘅樣子顯得更紅，更為可愛，而且佢好似好驚認錯人咁，身體開始慢慢傾後，好似好想立即離開我嘅視線範圍。

冇錯啦！佢應該就係我嘅表妹啦！

「係，我係呀！」我一時口快，唔記得咗表妹應該只係識國語，於是轉一轉語言話：「是呀！我就是呀！」

「真係太好啦！」表妹將臉靠近我，一雙憂鬱嘅大眼睛目不轉睛咁望實我話：「你知唔知我搵咗你幾耐呀？媽媽話有個叫黃家星嘅表哥會嚟接我機，我見到每個同你差唔多嘅男仔都問下，問咗好耐先搵到你咋，你去咗邊到呀？」



表妹講完之後，心情好似有啲激動，眼角亦有少許淚光。

由細到大，只要見到女仔想喊，我就開始心軟，而且唔知點算好。

但呢刻我除左有啲歉意之外，仲彈出咗個疑問⋯⋯

「咦⋯點解你識講廣東話嘅？」我問。

「因為我叻囉！哈哈⋯⋯」表妹笑得好燦爛，帶點傻氣咁回答我。

見到佢天真無邪嘅神情，心裏又不禁跳動咗一下。

「玩你咋！」表妹笑一笑之後就話：「其實係媽媽細個嘅時候教我講㗎。」

「唔怪得啦⋯⋯」



「係喎，我應該點叫你呀？」

叫我？諗返起⋯我都未知道表妹叫咩名，總唔能夠一直叫佢做表妹啩。

「星⋯」

「星星表哥？哈哈⋯」表妹又笑起嚟，真係唔知話佢笑點低，定係叫做性格開朗。

不過我都係第一次畀人叫到好成熟咁，感覺就好似多咗一個妹妹咁。

「咁你呢？」我問。

「我？叫我做⋯小南啦！」



小南⋯⋯個名聽落好得意，唔知點解我會有一種好想識佢多啲嘅感覺。

「咁⋯點解小南你會嚟香港嘅？」

「嚟玩囉。」小南話：「等星星表哥你帶我周圍玩。」

「原來係咁⋯⋯」

雖然對呢個原因都半信半疑，但我都再冇追問落去。

之後我哋就企咗喺機場唔知傾左幾耐⋯⋯

我哋之間有種一見如故嘅感覺，好似是但一句廢話都傾到落去。

雖然好細個嘅時候都已經見過一次面，但咁多年後再見返，有一種難以言喻嘅感覺⋯⋯好熟悉又好陌生，好多對小南嘅記憶喺童年時就流走哂，所以亦都可以話我係第一日識佢。



直到阿爸柯完尿過返嚟，我先幫小南拎啲行李上車，然後喺返去我屋企嘅路程途中，繼續我哋未完嘅廢話。

一時講下小南喺台灣嘅生活。

一時分享下我喺香港嘅點滴。

佢講一句，我就好自然咁接落去。

就咁沒完沒了⋯⋯

傾傾下，又令我忽然諗起⋯⋯

「好耐都冇人同我傾咁耐計⋯⋯」我自言自語話。



確實自從DSE之後，我就再冇見過班中學同學，我連謝師宴都冇出席，平時有聯絡開嘅朋友都潛哂水，要遲啲返學補課先見到佢哋，而同阿爸傾開又係啲無聊嘢，想搵個人同我真真正正傾一陣計都難。

而同小南傾計，就令我覺得好自在。

「係咩？咁你以後要同我傾多啲啦。」小南又充滿傻氣咁答我。

「嗯⋯好呀。」

我望住小南天真爛漫嘅樣子，嗰個可愛嘅臉蛋。

心中竟起咗個邪念⋯⋯

台灣個表妹嚟咗我屋企住，我想做乜都得啦⋯⋯