《台灣個表妹嚟咗我屋企住》【完】: (六)三餸一湯

由機場返去屋企嘅路上，天色開始越嚟越昏暗，而且漸入夜幕。

「差唔多返到屋企㗎啦。」由上車開始就畀我同小南無視咗好耐嘅阿爸話。

我望一望出車窗外，原來已經到咗屋企附近。

「咕嚕咕嚕⋯⋯」

好明顯係肚餓嘅聲音傳到我耳邊，而且仲要係好大聲。





搞到我立即摸下自己肚。

唔通係我發出嘅？但我又唔係好肚餓喎⋯

「唔好意思呀⋯」見到坐喺我身邊嘅小南面紅紅尷尬咁講：「其實我平時呢個時候就食完晚飯㗎啦，所以⋯依家有啲肚餓⋯」

「嗯⋯唔緊要。」

咁又難怪嘅，小南喺台南嗰啲鄉下地方一向正常都係好早食飯，而且又好早訓，點似得我哋啲城市人咁，每日忙碌咁做唔同嘅嘢，有時甚至廢寢忘餐，連晚飯都唔食，有時更會日夜顛倒，應該休息嘅時候偏偏做緊嘢，可以話係一種城市人病態嘅生活方式。





「哦。」習慣咗生活一成不變嘅阿爸好直接咁講：「一係返屋企先，然後再買外賣食？」

「吓⋯阿爸，乜你咁失禮人㗎？過門都係客呀。」我有少少指責阿爸咁講。「依家咁夜，一係就帶人出街食飯啦。」

「哦⋯咁好囉，你哋想食啲咩？」見到阿爸好失望咁樣講，其實我都好懷疑佢究竟係咪愛上咗食外賣⋯我都唔想小南呢兩個月都食外賣，如果咁食法，我都要講聲唔好意思啦。

「其實可以嘅話，我煮都得嘅⋯」小南怕怕羞羞咁講。「如果你地唔嫌我煮得難食嘅話⋯」

「點會呢？」我莫名有種歡喜從心底裏湧出嚟。「估唔到你識煮飯喎。」





「因為我細細個就要幫手煮飯畀屋企人食，所以⋯⋯」

「咁咪會煮得好好食囉？」

「都唔算好食嘅，哈哈⋯⋯」

「你會煮啲咩先？我都好耐冇食過煮家菜啦。」

冇錯，真係好耐，自從媽媽離開咗之後⋯⋯

「三餸一湯囉，但係太夜啦⋯煮啲餸畀你哋食啦，湯就唔整啦，依家整嘅話到瞓覺都未飲得。」

「咁去街市買餸先？」阿爸突然打斷我哋嘅對話。

「好呀，去街市先啦。」我話。





真係估唔到小南連煮飯都識，對比起喺香港同年齡嘅女仔，都只係識煮個出前一丁，再加上佢話細細個就開始煮，咁一定好好味啦！

對於已經有一段時間未嘗過家常便飯嘅我，可以話係滿心期待，雖然啱啱先話過過門都係客，依家又要人煮飯畀我哋食⋯但唔理啦，我好想一嘗小南嘅手勢。

然後話咁快阿爸就車咗我哋去街市，於是我哋就等小南喺街市轉咗幾個圈，最後等佢買咗啲餸就返屋企了。

小南買完之後又冇講買咗咩，唔知道佢最後買咗咩餸煮嚟食呢？我諗我一陣就會知⋯⋯

返到去屋企大堂門口，見到看更陳伯，可能佢見我帶咗個女仔返嚟，而阿爸又一齊跟住行，所以佢無啦啦就大大聲咁問阿爸：「黃生，乜咁好嘅？阿仔帶埋新抱返屋企呀？仲要帶埋行李嚟，唔通⋯⋯」

「新咩抱呀？佢係星仔表妹嚟㗎！」阿爸有少少怒氣咁講。

行喺前面嘅我同小南都不約而同咁偷偷地笑，但隨之而嚟嘅係好尷尬嘅氣氛⋯⋯





之後我哋就急急腳返到屋企。

一踏入屋企⋯⋯

「嘩！好靚呀！」小南話。

「好明顯你冇住過城市啦。」我回應佢話：「同你鄉下嘅屋唔同㗎，喺香港好多樓都起得好高。」

我同阿爸住喺嘅呢間屋，係由我出世住到依家，話新唔新，話舊唔舊，但係喺小南眼中就好靚。

「你放啲行李入我阿哥間房先啦，我幫你拎啲餸入廚房。」我指住阿哥間房話：「以後嗰間房就係你住啦。」

「好啦，唔該哂星星表哥。」

拎哂啲餸入廚房之後，我就同阿爸坐喺梳化上面睇電視，好安心咁將廚房嘅生死大權交托畀小南。





當我睇住電視等緊嘅時候，都不忘去偷望一下小南，其實都唔係咁安心⋯⋯但又畀小南趕返出嚟。

廚房傳出一陣又一陣嘅噪音之後，就見到小南煮好咗三碟餸，然後滿頭大汗咁行出嚟。

而我同阿爸就一早開好哂枱，十足隻餓鬼一樣等緊小南。

「食得啦！」小南話。

見佢放咗三碟賣相當好嘅餸喺枱面，而我哋就已經一早準備好哂白飯同筷子，等埋小南出嚟一齊食。

只見眼前，

一碟蝦仁炒蛋⋯⋯





一碟菜心炒牛肉⋯⋯

一碟葱香黃花魚⋯⋯

估唔到，眼前全部都係我鍾意食嘅餸，亦係媽媽以前成日煮開嘅餸⋯⋯