《台灣個表妹嚟咗我屋企住》【完】: (四)接機

轉眼間，我就身處喺機場⋯⋯

依個地方見證過好多人嘅悲歡離合，四周都瀰漫住一種憂傷嘅感覺，亦係個種我都經歷過嘅依依不捨。

曾幾何時，有好多人嚟到送機，朋友同親人⋯唔少人嘅眼淚滴落過呢個機場。

而呢到，可以話係人與人之間嘅終點站，同時亦係一個起步點。

好記得細細個有一位好錫我嘅姑媽，見襯我都會畀一大堆嘢食我，可能因為咁搞到我以前變咗個肥仔，但多得佢我先仲有個幸福嘅童年，如果用兩隻字嚟形容佢⋯可以話係''慈祥''，而正正因為佢呢份慈祥，就算童年有啲回憶漸漸遠去，但姑媽對我嘅好，我係永遠都唔會忘記。





但係後來佢年紀漸大，身邊嘅仔女都話要同佢一齊移民外國，縱使我有千百萬個不願意，童年時嘅我都無力對抗，只能眼白白喺機場目送佢離開，當時眼淚已經係失控咁流緊，但都唔會留得住姑媽。

由嗰時開始，我就好討厭失去嘅感覺⋯⋯

但當人大咗，先發現有啲人注定要走，係點樣都留唔住。

依家同當時送別姑媽嘅情景係好似，但動機同心情完全唔同。

當日係送機，今日係接機。





而且仲係抱住一個好奇心嚟接機。

因為我真係好心急想知道表妹到底係咩樣⋯唔係想打佢主意，純粹好奇咋。

「唉⋯⋯頂！仲要等幾耐⋯⋯」阿爸開始擺出一副唔耐煩嘅模樣，再拍一拍我膊頭話：「喂，星仔，我去柯個尿先，你自己等一等表妹先啦。」

「吓⋯咁佢點知道我接佢呀？」我未講完，阿爸已經消失於眼前，不知所蹤。

「呢個老豆，真係⋯⋯」





我開始有啲驚，因為唔知道表妹係點嘅樣⋯⋯

如果佢好樣衰，見到我再大叫表哥，成個機場啲人望住我同佢，咁咪好柒囉⋯又或者佢唔認得我，我哋就咁擦身而過，咁就實畀阿爸鬧死我。

而正當我仲喺到驚慌緊嘅時候……

「表哥！」我背後傳嚟一道聲音。

直覺話畀我知係叫緊我，於是我回首一望。

就喺不遠處，有一個人迎面而嚟，施施然向我走近嚟。

再仔細一看⋯⋯

係一個⋯肥婆？





仆街！個表妹真係一個樣衰嘅肥婆？

根據我多年目及女經驗，眼前迎面而嚟嘅唔可以稱之為''人''，反而係一塊好黑嘅肥豬肉，呢團肥肉每行一步，肉同肉之間嘅碰撞，每一下都足以造成前所未有嘅災禍。

「表哥！」肥婆再次喚叫我。

我⋯心動啦！

所謂心動，其實係肥婆把聲傳入我心藏，強力震動緊我嘅心藏，令我幾乎暴斃，抖唔到氣不在話下，更震碎咗我弱小嘅心靈以及原本對佢嘅幻想。

先不論身材，外貌上已經慘不忍睹，粗糙又黝黑嘅皮膚，扭曲埋一齊嘅眼耳口鼻，加上一頭亂鬉，我唔敢再講落去⋯⋯

如果佢係一隻黑毛豬，我都會唾涎三尺，然後殺咗佢嚟食。





但係點解？但係點解佢會係我表妹呀？

見住佢慢慢行近埋嚟⋯⋯

好想打柒佢！

我決定咗！當佢行埋嚟我面前嘅時候，我就用力一拳打落去，然後大喊：「死肥婆！咪認親認戚！」

我握實手中拳頭，怒火中燒。

雖然我知道我唔會咁做⋯⋯

諗返起尋日阿爸叮囑我叫我唔好打表妹主意。

阿爸放心啦，我打表妹都唔會打佢主意。





見住佢慢慢行過嚟。

我呆咗咁企喺原地⋯放棄一切反抗嘅念頭。

仲有幾歩⋯

兩歩⋯

一歩⋯

然後，佢從我身邊擦過⋯⋯

我立即成個人鬆哂。





「咦！」我心入面不禁起咗個疑問。

乜佢唔係我表妹嚟咩？

眼見佢前去搵嘅人係一個身型比我瘦削得多嘅小毒男。

我不但覺得極之開心，而且仲抱住幸災樂禍嘅心態，冷笑一聲再話：「哈⋯你真係有福啦！」

嗰團肥肉一見到小毒男就衝上去又攬又搞。

連小毒男都忍唔住幽幽地話：「屌你老母⋯⋯死開啦⋯⋯死肥婆⋯⋯」

然後就出現咗一場混戰，而旁邊嘅我就食住花生睇戲。

同樣係表哥接表妹機，我嘅命運就冇佢咁坎坷啦。

正當我嘅花生食得興致勃勃嘅時候⋯⋯

突然，有人拍一拍我嘅膊頭。

我擰轉頭一睇⋯⋯

「咦⋯⋯你係？」