《台灣個表妹嚟咗我屋企住》【完】: (一百一十八)朋友樂

八月二十二日 星期四 晴

可以同自己嘅深愛之人相擁而眠，係一種福氣。

而且一瞓醒擘大眼第一件事就係同枕邊人講一聲⋯⋯

「早晨。」我嘅手指輕拂過小南嘅瀏海。

依偎住我嘅小南漸漸醒來，打咗個喊露，「早晨呀⋯⋯表哥～」





呢一日，我又約咗三個死黨出嚟一齊玩。

嗯，最後一位死黨歸隊，依家有三個。

五人行，去咗唱K。

小南點咗好多首五月天嘅歌，逼我哋聽佢嘅歌聲。

但唔講唔知，原來平時講嘢有娃娃音嘅小南，唱起歌嚟係五音不全，唱得好鬼難聽。





有時阿榮呢個咪霸又加埋把聲落去，簡直係雙重噪音。

軒少阿yo同埋我就只好表示無奈，喺K房一角吹下水。

經過K房一役，我先知小南最鍾意嘅歌叫星空。

黃家星，記住呀！第日記住要帶小南去睇五月天嘅演唱會，你個嘅偶像Eason就暫時忘記下。

其實間中聯誼一下都唔錯，夜晚又同呢班死黨去咗食飯，邊食邊吹水，我暗地裏又可以向佢哋吐下苦水，講下小南啲口氣有幾嚴重⋯⋯





我諗，真正嘅朋友，係有別於親人與情人。

佢哋係會一直喺身邊支持你，你有咩事都第一時間挺身而出，只係你冇察覺。如果冇佢哋，我諗我會崩潰得更快。

多謝你哋，軒少、阿榮、阿yo。

呢一日，叫做朋友樂。